Euskadiko Orkestra Sinfonikoa

Irailaren 22 ostiralean, "Submergence" Wim Wenders zuzendariaren film berriak inauguratuko du Donostiako 65. Zinemaldia. Fernando Velázquezek idatzi eta Euskadiko Orkestra Sinfonikoak grabatutako musika duen luzemetraia Sail Ofizialean lehian egongo da.

Irailaren 23an, "Ikus-entzunezko gozamena" izenburupean, Orkestrak Belodromoan emango duen zinema-musika kontzerturako doako sarrerak eskuragarri daude jada. Zinemaldiaren informazio-guneetan (Okendo plaza eta Kursaal) zein Donostia Turismoaren bulegoan jaso daitezke, jarleku-kopurua agortu arte.

Irailaren 30 larunbatean abiatuko da Miramongo Matinéen 2017/2018 denboraldia. Orkestraren ganbera-zikloa, 26. denboraldira iritsita 16 emanaldi proposatzen dituena, klasiko bat da asteburuetako kultur-eskaintzan. Matinéek etengabean berritzen dute euren soinu-katalogo zabala; horrela, ezin konta ahala lurrinek eta forma melodikoek kontakizun oroitarazlea eraikitzen dute.