Daniel Müller-Schott biolontxelojolea izango da Euskadiko Orkestraren kontzertu-programa berriaren protagonista
Alemaniako interprete bikainak Prokofieven ‘Sinfonia kontzertante’ exijenteari aurre egingo dio, XX. mendearen erdialdean Mstislav Rostropovitx biolontxeloaren maisuarentzat espresuki idatzitako lanari. Orkestrak kontzertuen bigarren zatian gutxi ezagutzen den errepertorioa deskubritzen jarraitzea proposatzen du, Alexander Scriabinen ‘2. Sinfonia’-rekin.
Stanislav Kochanovskyk zuzenduko ditu kontzertuak martxoaren 27tik apirilaren 2ra Donostia, Gasteiz, Iruña eta Bilbon. Sarrerak salgai daude 10 eta 40 euro bitartean.
Euskadiko Orkestrak ostegun honetatik aurrera 24/25 Kontzertu Denboraldiko bederatzigarren programari aurre egingo dio, ‘Prokofiev / Scriabin’ izenekoa. Kontzertuak datozen egunetan izango dira ohiko lau hiriburuetan: ostegun eta ostiralean, martxoak 27 eta 28, Donostiako Kursaal Auditoriumean; astelehenean, martxoak 31, Gasteizko Jesus Guridi Kontserbatorioan; asteartean, apirilak 1, Iruñeko Baluarte Auditoriumean; eta asteazkenean, apirilak 2, Bilboko Euskalduna Jauregian. Kontzertu guztiak 19:30ean izango dira.
San Petersburgoko Stanislav Kochanovsky zuzendaria errusiar musikako espezialista famatuenetako bat da. Euskadiko Orkestraren Denboraldi Sinfonikoan bigarrenez parte hartuko du, 23/24an Brahms eta Xostakovitxen lanekin estreinatu ondoren.
Oraingo honetan, kontzertuen lehen zatian Sergei Prokofieven Sinfonia kontzertantea zuzenduko du, 1952an estreinatutako obra. Hasiera batean, biolontxelorako kontzertua izan behar zuen, Mstislav Rostropovitx bakarlari ezin ospetsuagoarekin, baina berrikusi egin zen gero, izaera sinfonikoa nabarmentzeko, eta orduan hartu zuen gaur egun duen izena, kontzertuaren eta sinfoniaren generoen uztarketa moduan. Nolanahi ere, bakarlariaren zatiak hasierako zailtasun ikusgarriari eutsi zion, eta Daniel Müller-Schott biolontxelista alemanak hartuko du horren gaineko ardura. New York Timesen arabera, «teknika menderatzen duen interpretatzaile ausart bat da». 2010ean eta 2012an Euskadiko Orkestra bisitatu ondoren, hirugarren aldiz parte hartuko du alemaniarrak bere Denboraldi Sinfonikoan.
Bigarren zatian, Kochanovskyk San Petersburgorekin oso lotuta dagoen beste partitura bat landuko du: Alexander Scriabinen 2. Sinfonia. Gaztaroko sorkuntza-lan bat da, baina ondoko beste lan batzuen kolore harmoniko berezia eta sustrai mistikoak iragartzen ditu; adibidez, Suaren poemarenak eta Estasiaren poemarenak. 2. Sinfonia batere nabarmendu gabe estreinatu zen 1902ko abenduan, San Petersburgon. Eta, babesle handiak izan dituen arren, beste ondorengo sorkuntza izugarri batzuen itzalean mantendu da. Denborarekin, pieza giltzarria bilakatu da erreferente tradizionaletatik abiatuta Scriabin lengoaia original bat garatzera nola iritsi zen ulertzeko. Hori dela-eta, azken urteetan 2. Sinfoniak presentzia irabazi du kontzertu aretoetan.
Sarrerak salgai
Kontzertu guztietarako sarrerak salgai daude, Gasteizkorako izan ezik, euskadikoorkestra.eus webgunean eta auditoriumetako leihatila eta webguneetan, 10 eurotik aurrera.
Kontzertuak eta Sarrerak Abendua
