14. Matinéea: Kuadrilla Lagunak

Kuadrilla Lagunak taldeak Matinée honetan aurkezten duen Biolin eta biolarako duoa Wolfgang Amadeus Mozartek Michael Haydn lagunaren ordez konposatu zuen, hark Colloredo artzapezpikuak enkargatutako sei duoko zikloa osatu ezin izan zuelako. Jakina da Mozartek eta Colloredok harreman txarra zutela eta, horregatik, Mozartek ezkutuan idatzi zituen ziklo honetako azken bi piezak, ondoren etsai ospetsuari Michael Haydnen sinadurapean entregatzeko. Mozartek trebeki imitatu zuen lagunaren estiloa, bere trillo eta apainduren erabilera zabalarekin. Engainua Michael Haydnen heriotzaren ondoren bakarrik ezagutu zen.

Bela Bartoken Bi biolinetarako duoak 44 pieza dira, oso laburrak, eta konpositorearen arabera, "Herriaren soiltasun naturala eta berezitasun melodiko eta erritmikoak" jasotzen dituzte. Bilduma hau hungariar, errumaniar, serbiar, eslovakiar eta ruteniar folklorearen abesti herrikoien transkripzioan oinarritutako lan musikal eta etnologiko liluragarria da. Taldeak ahozko tradizioko harribitxiak diren duo hauetako hamabi aukeratu ditu.

Mozarten 14. Hari-kuartetoak itxiko du Miramongo Matinéea. Lirismo handiko eta izaera baikorreko obra denez, ‘Udaberria’ ezinenez ezagutzen da. Joseph Haydni eskainitako sei kuartetoko zikloko lehena da, 1782an idatzia, eta beraz, ez da gaztaroko obra bat. Lau ahotsak nahasi egiten dira eta elkarri erantzuten diete oso ondo gauzatutako idazkera baten baitan. Azken mugimendua fuga bat da, zorrotzenetakotzat jotzen den forma.