65. Zinemaldia

IKUS-ENTZUNEZKO GOZAMENA Euskadiko Orkestrak Zinemaldiaren barruan eskaintzen duen zinema-musikako kontzertua aurkeztu dute Euskadiko Orkestra Sinfonikoak, SGAE Fundazioak eta Donostiako Zinemaldiak. Aurten ere, Zinemaldiko lehen larunbatean Belodromoak bere ateak irekiko dizkie, eguerdi aldean, melomano, zinemazale eta ikusleria orokorrari. Ikuskizunean, soinu-banden interpretazio sinfonikoa eta beren filmetako eszenen muntaia uztartzen dira. “Ikus-entzunezko gozameneko” ordu eta erdia.

Ondoko filmetarako idatzitako musikaren moldaketak eskainiko ditu kontzertuak: Faunoaren labirintoa (Guillermo del Tororena), Ongi etorri, Mr. Marshall (Luis Garcia Berlangarena), O Apostolo (Fernando Cortizorena), Nur eta herensugearen tenplua (hil berri den Juanba Berasategirena, bere omenez) eta Borgiatarrak (Antonio Hernandezena). Moldaketak Javier Navarrete, Jesus Garcia Leoz, Xavi Font, Joserra Senperena eta Angel Illarramendirenak dira. Musikagiletako batzuk kontzertuan egon eta eszenatokira igoko dira beren lana aurkeztera.

Jose Miguel Perez-Sierraren aginduetara, Euskadiko Orkestra Sinfonikoarekin batera Nora Goyalde (mezzo) eta Sergio Falque (baxua) bakarlariak eta Donostiako Orfeoia egongo dira. 400m2ko pantailan aldi berean eskainiko diren irudien muntaia Morgan Creak egin du, berariaz kontzerturako.

Sarrera doakoa da eta beharrezkoa izango da dagokion gonbidapena jasotzea irailaren 16a eta 22a bitartean, Zinemaldiak Kursaal Aretoan eta Okendo Plazan dituen informazio-gunetan, 9:00etatik 20:00etara, bai eta Donostia Turismoko bulegoan ere (9:00etatik 20:00etara astelehenetik larunbatera eta 10:00etatik 19:00etara igandetan). Lekuak bete arte.