“Saski Naski” oroituz: Aristizabal-Barandiaran piano bikotea Miramongo Matinéetan

Otsailaren 23 larunbatean, Aristizabal-Barandiaran piano bikoteak euskal musikaren inguruko emanaldi berezia eskainiko du Miramongo Matinéeak zikloan. "Saski Naskiren oihartzuna" 1945ean Argentinan sortutako "Saski Naski" ikuskizunerako Aita Madinak sortutako musika berreskuratuz Itxaso Aristizabal eta Esther Barandiaranek Eresbilen enkarguz prestatutako emanaldia dugu. 2007an estreinatu zenetik, Euskadiko herri ezberdinetan eta Europako hainbat hiriko Euskal Etxeetan eskaini dute, kritika zein entzulegoarengandik erantzun bikaina merezi izan dutelarik. Larunbatean Euskadiko Orkestraren Miramongo egoitzan izango da berau entzuteko aukera.

1945ean Argentinan bildutako euskal inmigrante talde batek "Saski Naski" ikuskizun koreografiko-musikala sortu zuen, argentinar publikoari euskal folklorea erakusteko asmoz, José Antonio Azpiazuk Aita Madinaren biografian jasotakoaren arabera. Horretarako muntaiak musika eta dantza herrikoiak biltzen zituen, eszenografia soilek lagunduta. Ekimen honen bultzatzaile nagusia Luis Mujika izan zen. Eszenografo, marrazkilari, dantzarako jantzien diseinatzaile eta zuzendaria, bera izan zen "Saski Naski"ren arima. Aita Madinak konposatu zuen musika, antzezlanetarako batzuetan eta kontzertutarako besteetan, orkestrarako zein bi pianotarako, Francisco Balaguer eta Ernesto Mastronardi musikariak lankide izan zituelarik. Musika haien aukeraketa da Aristizabal-Barandiaran bikoteak eskainiko duena.

Musika, dantza eta irudiak. Itxaso Aristizabal eta Esther Barandiaranek Aritz López eta Maider Barrutia dantzariak eta Lorea Sorzabalbere eta Irene Elizetxea izango diztuzte lagun. Gainera, Eresbil, Musikaren Euskal Artxibak utzitako irudiak emango dira.

Itxaso Aristizabal eta Esther Barandiaran pianojotzaileek osatutako bikoteak, sortu zenetik ia hogei urte igaro direla, piano bikoterako euskal musikagileek sortutako errepertorioren inguruan azterketa eta zabalkuntza lana oparoa egiten du. Informazio gehiago www.aristizabal-barandiaran.com webgunean.

Kontzertua goizeko 11etan hasiko da eta sarrerak www.kutxasarrerak.net eta Telekutxa (943 00 12 00) bidez eros daitezke, eta kontzertu egunean baita Orkestraren egoitzan ere, 10.30etatik aurrera. Halaber, gogorarazten dizuegu doako autobus zerbitzua dagoela egoitzara etortzeko, 10.25etan Gipuzkoa Plaza, 4tik atera eta Antso Jakituna, 18an eta Madrilgo Hiribidea, 34ean geldialdiak egiten dituelarik.

Informazio gehiago