Asteartea 17 Azaroa, 2015

Abian dira Euskadiko Orkestraren "Musika Gela"ren jarduerak

Hogeita hamar bat jarduera izango guztira, familia, ikastetxe eta askotariko taldeei eskainiak; gainera, Orkestra EMUSIK-en ariko da, DSS2016EU-ren baitan. Eskola Kontzertuen zikloaren barnean, gaur hasi eta ostirala bitartean, lehen hezkuntzako 1.800 ikaslek “Stick Dance Quartet” kontzertuaz gozatuko dute Miramonen.

Familiartean gozatzeko ekoizpen propioak eskaintzea eta musika sinfonikoa hezkuntza-maila orotako ikasleei eskuragarri gerta dakien ahalbidetzea dira Euskadiko Orkestra Sinfonikoaren estrategia pedagogikoaren zimentarriak. Estrategia hau Orkestraren Hezkuntza Departamentuak garatzen du kultur zein gizarte erakunde ezberdinekin elkarlanean. Jarduera hauek publikoari Musika Gela markapean heltzen zaizkio eta denboraldi honetan 30 jardueratik gora eskainiko ditugu horren baitan.

IKASTETXEENTZAKO JARDUERAK. Denboraldi honetan zehar, Gipuzkoako Batzar Nagusien eta Donostiako Udalaren lankidetzarekin burutzen den Eskola Kontzertuak zikloak 3 ekoizpen eskainiko ditu, hezkuntza-ziklo bakoitzeko bana. Zikloa 18 kontzertuk osatuko dute guztira eta 5.200 entzule erakarriko ditu Orkestraren Miramongo egoitzara. Bestalde, denboraldi honetan bereziki nabarmentzekoak izango dira Euskadiko Orkestraren Entsegu Irekiak: bigarren hezkuntza, batxilergo zein unibertsitate-mailako ikasleek eta musika kontserbatorio nahiz dantza eskoletako ikasleek Euskadiko Orkestraren Abonu Denboraldiko programa baten aurretiko entsegu batean izateko aukera izango dute; 5 entsegu ireki programatu ditugu (1 Bilboko Euskalduna Jauregian eta 4 Donostiako Kursaal Auditorioan).

MUSIKA FAMILIAN. Donostian, Orkestraren egoitzan "Zirrika, irrika... musika!" kontzertua izango da otsailaren 20an eta apirilaren 16an, berriz, Kursaal Eszenarekin koprodukzioan, Kursaaleko Ganbera Aretoan "Stick Dance Quartet" izango da; kontzertu hauetarako sarrerak abenduaren 21ean jarriko dira salgai. Gasteizen, Antzokien Udal Sarearekin lankidetzan, Principal Antzokian "Stick Dance Quartet" izango da apirilaren 17an eta, ondoren, maiatzaren 13an "Planeten Soinua" kontzertuaren txanda izango da Principal Antzokian, Euskadiko Orkestraren eta Juan José Ocónen eskutik; sarrerak urtarrilaren 14tik aurrera salgai.

BESTE EGITASMO BATZUK. Erabateko gizarteratzearen alde, OSE+FEVAS batasuna urtero gauzatzen da bestelakotasun funtzionala duten pertsonak protagonistatzat dituzten proiektu gogobetegarrien bidez; testuinguru horretan, datozen hilabeteotan lau tailer burutuko dira Bilbo eta Donostian. Halaber, aurten Euskadiko Orkestra, "Soinuen Mosaikoa" egitasmoan murgildu da, Orkestren Espainiar Elkarteko (AEOS) beste hainbat orkestrarekin, Plena Inclusión erakundearekin eta BBVA Fundazioarekin batera. 2016 urtean zehar garatuko den proiektu garrantzitsu honetan musika norbere garapenerako eta gizarteratzerako tresna bilakatzen da.

Horrezaz gainera, DSS2016EU-rekin lankidetzaren baitan, Euskadiko Orkestra, bere titular Jun Märklek zuzenduta, Anoetako Estadioan ariko da 2016ko maiatzean, Europako Musika Eskolen Jaialdiaren irekiera ekitaldian (EMUSIK 2016).