16. Matinéea: Barrococo

Fagota instrumentu grabea da, baxu jarraitua jotzeko eta protagonismoa daramaten instrumentuei laguntzeko sortua hasiera batean. Pixkanaka, ordea, instrumentu hau musikaren historian onarpen nabarmenagoa lortzen joan da izen handiko konpositoreen artean, eta obra askotan instrumentu nagusiaren rola jokatzera iritsi da.

Flautajole eta fagotista birtuoso Deviennek erronka tekniko asko barne hartzen dituzten hainbat obra idatzi zituen. Konposatu zituen hiru Fagot, biolin, biola eta biolontxelorako kuartetoak, zeintzuetako hirugarrena entzungo dugun Matinée honetan, fagoterako idatzitako solista literaturaren adibide egokienetakoak dira. Mozarten Flauta eta harirako kuartetoen eredua oinarri hartuta eraikita daude obra hauek, eta horrek erakusten du besteak beste zergatik jaso izan zuen Deviennek sarritan ‘Mozart frantsesa’-ren goitizena.

Errepertorioko hurrengo obra Reichenauerren Biolin, biolontxelo, fagot eta continuorako kuartetoa izango da. Musikagile txekiarraren musika nahiko ezezaguna izan da gaur arte, baina gaur egun Txekiako musika barrokoaren egile nagusietakotzat hartzen da eta ‘Vivaldi txekiarra’ bezala izendatu izan dute.

Miramongo Matinéea Antonio Vivaldiren Biolin, biolontxelo (edo fagot), hari eta continuorako kontzertuarekin amaituko da. Ia seguru bera izan zen fagoterako bakarrik idatzitako lehendabiziko kontzertua sortu zuena, eta instrumentu horrentzat obra gehien egin dituen autorea ere bada: guztira 39, guztiak kalitate bikainekoak. Beste instrumentu batentzat bakarrik idatzi zituen lan gehiago: biolinarentzat. Hain zuzen, kontzertu honetako instrumentu solistak biolina eta fagota izango dira, nahiz eta ohikoagoa den obra honetako fagotaren zatia biolontxelo batek interpretatzea.