Euskadiko Orkestra telebista iparramerikarraren eszenatokira igo da
Covid-19aren lehen olatuaren ondoriozko itxialdiaren ostean telebistan eman zuten 'Euskadiko Orkestra Martxan! 'denboraldi txikia osatu zuten zortzi kontzertuak Stage Access plataforma digital estatubatuarrean daude ikusgai, mundu osoko interprete eta orkestra handien edukiarekin batera.
Euskadiko Orkestra Stage Access arte streaming zerbitzu berrian dago presente. Harpidetza bidezko plataforma digitale honek kontzertuak, opera, dantza eta antzerkia eskaintzen ditu. Albiste honekin batera doan irudian ikus daitekeenez, Euskadiko Orkestrak Katia Buniatishvili, Lang Lang, Berlingo Filarmonikoa edo Vienako Filarmonikoa bezalako interprete eta orkestra garrantzitsuekin partekatzen du espazioa aipatu plataforman.
Euskadiko Orkestrak eta EiTBk elkarrekin ‘Euskadiko Orkestra Martxan!’ izenburupean aurtengo maiatz eta uztaila bitartean eskaini zituen emisioak jarri ditu Stage Access plataformak eskuragai bere harpidedunentzat. Covid-19 pandemiaren lehen olatuaren eta horren ondoriozko itxialdiaren ostean lehendabizikoz eszenatokira itzuli zen orkestra aipatu ekimen horri esker. Euskadiko Orkestra Estatuko lehen orkestra eta Europako lehenengoetakoa izan zen martxan jartzen eta eszenatoki gainean berriz biltzen, eta horrek Stage Accessen interesa piztu zuen. Une hartan, tamaina txikiko orkestrarekin (gehienez 50 musikarirekin) ateak itxita 8 kontzertuko denboraldi txiki bat eskaini zuen, lehendabizi ETB2n eta ondoren orkestraren YouTubeko kanalean, zeinean 10.000 bistaratze baino gehiago pilatu dituen.
Orain, Mozart, Mendelssohn eta Brahmsen lanak biltzen dituen mini-denboraldi hau, Robert Treviñok zuzendu zuena, Stage Accessen ere eskuragarri dago (oraingoz, Ipar Amerikan eta Erresuma Batuan bizi direnentzat baino ez da eskuragarri). Aliantza horri esker, Euskadiko Orkestrak Ipar Amerikako merkatuan ezagutzera eman ahal izango du bere burua.
