Abian dira 2. Eskola-haurrentzako Kontzertuak

"Barrokoa, historiari begirada bat" izango da maiatzaren 10, 11 eta 12an Orkestraren Miramongo egoitzan izango diren 2. Eskola-haurrentzako Kontzertuetan eskainiko den ikuskizuna. Joan zen urtean egitasmo honek izandako arrakastaren ondoren, aurtengoan Lehen Hezkuntzako bigarren eta hirugarren zikloetako 2500 bat haur biltzea aurreikusi da. Gasteiz, Ondarroa, Donostia, Urretxu, Beasain, Errenteria, Mutriku, Altzo, Lasarte-Oria, Ataun, Berrobi, Tolosa, Oiartzun eta Elgoibarko ikastetxeetatik etorriko dira. 

Jarduera hau osatzeko, ikasleek gure Hezkuntza Depatamenduak diseinatutako material didaktikoa landu dute aurrez ikasgelatan. Hori prestatzeko, bertaratuko diren ikastetxeetako musika-irakasleek tailer bat burutu zuten duela aste batzuk.

"Barrokoa, historiari begirada bat" kontzertuak XVI, XVII eta XVIII. mendeetako musika helaraziko die haurrei, Purcell, Albinoni, Vivaldi, Telemann, Bach, Händel eta abarren lanak ezagutzera emanez. Izan ere, musikaren historian izan diren garai emankor eta luzeenetariko bat garatzeko gai izan ziren sortzaile handiak izan ziren konpositore horiek guztiak. Modu ludiko baina zorrotzean, "Barrokoa, historiari begirada bat" kontzerturako aukeratutako egitaraua Orkestrako kideek interpretatuko dute, oraingoan ganbera-orkestra osatuz, eta gainera bereziki dibertigarriak diren ahots-lanak izango dira, Lara Agudo sopranoa buru duen kantari-laukoteak abestuko dituenak. Kontzertua Euskadiko Orkestrako kontzertino gonbidatu printzipal Lorenz Nasturica Herschcowicik zuzenduko du. Ospe handiko biolinjotzaile hau Münicheko Orkestra Filarmonikoko kontzertino printzipala da 1992.etik eta bakarlari gisa Sergiu Celibidache, Christian Thielemann, Lorin Maazel edo Zubin Mehtaren zuzendaritzapean aritu da. Halaber, 2004ean Municheko Orkestra Filarmonikoaren Ganbera-Orkestraren buru izendatu zutenetik Hélène Grimaud, Anne-Sophie Mutter, Martin Stadtfeld edo Nikolaj Znaider-ekin batera aritu da. Proposamen berri hau Euskadiko Orkestraren hezkuntza departamentuko koordinatzaile Mikel Cañadaren ideia eta gidoia ditu oinarri eta musika-hezkuntzan aditua eta aktorea den Ana Hernándezek aurkeztuko du.

Aurretik FEVAS-eko 170 kide izan ziren kontzertu honetaz gozatu eta erritmoa landu eta orkestrako instrumentuak ezagutzeko tailer bat burutu zutenak.