Bart arratsean Iruñean bere Kontzertu Denboraldiaren lehenbiziko kontzertu-programa arrakasta handiz itxi ostean, Euskadiko Orkestra Sinfonikoa Bordelera abiatuko da orain. Han bihar ostegun eta ostiralean (hilak 19 eta 20) kontzertu bana emango du akitaniar hiriburuko Auditoriumean, Orchestre National Bordeaux Aquitaine (ONBA) orkestraren Kontzertu Denboraldian orkestra gonbidatu gisa. Bi orkestren arteko harreman estuaren baitan, ONBA-k Euskadiko Orkestraren 2017/2016 Kontzertu Denboraldia itxi zuen joan zen ekainean.

Vladimir Kulenovic zuzendari dela, bi kontzertuetako egitaraua osatzen duten obrak dira N. Rimski-Korsakoven Capricho español eta Sheherazade, eta M. Ravelen Pianorako kontzertua (ezker eskua). Ezker eskurako kontzertua jotzeko, Orkestrak Jean-Frédéric Neuburger frantziarra izango du lagun. Bai Kulenovic eta baita Neuburger ere duela gutxi jardun dira estreinakoz Euskadiko Orkestrarekin: joan zen irailean Donibane Lohitzunen aritu ziren elkarrekin, Ravel Jaialdian emandako kontzertuan.

Vladimir Kulenovic Chicagoko Lake Forest Symphony Orchestraren musika zuzendaria da egun eta berriki gonbidatu bezala zuzendu dituen orkestren artean daude Chicago Symphony, San Francisco Symphony, Houston Symphony, Leipziger Symphonieorchester eta abar. Estatu Batuetan sarritan jarduten du eta han Utahko Orkestra Sinfonikoaren eta Operaren zuzendari elkartua ere bada. Gainera Kyotoko (Japonia) Nazioarteko Musika Jaialdiaren zuzendari printzipala da. Bere ibilbidearen hastapenetan, Kurt Masur-en lankide izan zen Leipzig Gewandhaus Orchestra delakoan, Zubin Mehtarena Belgradeko Orkestra Filarmonikoan.

Jean-Frédéric Neuburger pianojotzaileak ospea du bai musikagile gisa, bai errepertorio zabaldun bakarlari gisa ere. Besteak beste, bakarlari izan duten orkestrak dira New York, Filadelfia, San Francisco edo Bambergeko filarmonikoak, Radio France, Orchestre de Paris, BBC Symphony, NHK... eta Carnegie Hall, Lincoln Center, Verbier, Lucerna, La Roque d'Anthéron eta abar bezalako areto zein jaialdietan izan da. Ganbera musikari jardunean, bere belaunaldiko hainbat artistekin aritzen da: Bertrand Chamayou, Renaud Capuçon, Quatuor Modigliani eta abar. Musika sorkuntzan, bere lanak Messiaen edo Stockhausen-en eragin nabarmenetik abiatzen dira, egungo joera ezberdinen sintesirantz.