Euskadiko Orkestrak berriz hartuko du Frank Peter Zimmermann biolinjole handia kontzertu-programa berrian
Sona handiko biolinista alemaniarrak Elgarren ‘Biolinerako kontzertua’-ri egingo dio aurre, errepertorioko kontzertu luze eta zailenetako bat bezala hartzen denari. Horrez gain, Euskadiko Orkestrak programa berri honetan Alexander Veprik aurkeztuko du, gulagetik igaro ondoren eta hilzorian zela ‘Bi poemak’ idatzi zituen konpositore errusiar ezezaguna.
Sarrerak salgai daude apirilaren 20tik 26ra ohiko lau hiriburuetan izango diren eta Christoph-Mathias Muellerrek zuzenduko dituen kontzertu guztietarako.
Poloniara bira arrakasta osoz burutu ostean, Euskadiko Orkestrak ostegun honetatik aurrera 22-23 Denboraldiko zortzigarren programari ekingo dio, ‘Arimatik’ izenekoa. Euskadiko Orkestraren buru lehendabizikoz arituko da Christoph-Mathias Mueller datozen egunotan ohiko lau hiriburuetan izango diren bost kontzertuetan: ostegun eta ostiralean, apirilak 20 eta 21, Donostiako Kursaal Auditoriumean; astelehenean, apirilak 24, Iruñeko Baluarte Auditoriumean; asteartean, apirilak 25, Bilboko Euskalduna Jauregian; eta asteazkenean, apirilak 26, Gasteizko Principal Antzokian. Kontzertu guztiak 19:30ean izango dira.
Kontzertu-programa honen protagonista nagusia solista gonbidatua izango da, Frank Peter Zimmermann, Euskadiko Orkestraren lagun handia, duela bi hamarkadatik bere Kontzertu-Denboraldia sarri bisitatu duena. Orkestra batekin debuta egin zuenetik –10 urte zituen soilik–, Zimmermann nazioarteko orkestra garrantzitsu ia guztiekin aritu da jotzen (Bostoneko eta Chicagoko sinfonikoak eta Vienako eta Londreseko filarmonikoak, besteak beste) eta gaur egun jardunean dauden biolinista guztien arteko errepertoriorik luzeenetako bat du. “Dena irabazi, grabatu eta interpretatu du”, idatzi dute berari buruz.
Kasu honetan orkestrak Zimmermannen eskuetan britainiar errepertorioko biolinerako kontzerturik ospetsuena utziko du, errepertorio osoko luze eta zailenetakoa ere badena, askok diotenez: Edward Elgarren Biolinerako kontzertua. Zirrara biziko partitura da, Wagnerren, Beethovenen eta Brahmsen oihartzunak biltzen dituena eta Zimmermannek arreta handia jarri dio azken bi urteetan: munduko leku askotan interpretatu du, baita Madrilen eta Galizian ere, eta ekainean berriz defendatuko du, Zurichen Tonhalleko orkestrarekin.
Euskadiko Orkestraren zuzendari titular Robert Treviñoren hitzetan: “Frank Peter Zimmermann inoizko biolinjole ezagunenetako bat da. Mundu osoko audientziek miresten dute. Beti da festa gure orkestrarekin bat egiten duenean. Eta momentu hau ospatzeko biolin-kontzertu guztien errege dena aurkeztea pentsatu genuen: Elgarren Biolin Kontzertua. Ez da kontzertu soil bat; 40 minutuko tour de force bat da, non orkestrak eta bakarlariak, elkarlanean, Everest mendiko altuerara garamatzaten, bizitzak eskain diezazkiguken esperientzia guztietan barrena”.
Gainera, zortzigarren abonu-programa honek Alexander Veprik musikagile errusiarraren irudia deskubritzea proposatzen digu; gulag batean egon zen egilea —Siberiako bortxazko lanen esparru batean—, eta ondoren bere Bi poemak idatzi zituen, hilzorian zegoela. Kolorez eta energiaz betetako musika da, baina sakontasun handikoa, eta Muellerrek zuzenduko du; izan ere, berak jarri baitzuen Veprik mapan 2020an OPUS Klassik saria jaso zuen disko bikain bati esker.
Vepriken sormen-unibertsoan barneratu aurretik, Beethovenek idatzi zuen opera bakarraren, Fidelio izenekoaren, obertura entzungo dugu. Lan horrek kontatzen du bidegabeko espetxeratze bat eta askatasunaren aldeko borroka, Vepriken istorio pertsonal tragikoa markoztatzeko.
Sarrerak salgai 10 eurotik aurrera
Sarrerak salgai daude saio guztietarako euskadikoorkestra.eus-en, baita auditoriumen webgune eta leihatiletan ere, 10 eta 38 euro bitartean.
