Euskadiko Orkestrak "Kadenza" aurkeztu du, Sofia Gubaidulinaren lana biltzen duen diskoa

Euskadiko Orkestraren ekoizpen diskografiko bat aurkeztu berri da Donostian, Loiolako Erriberatako Iesu parrokian: Sofia Gubaidulinaren lana biltzen duen Kadenza diskoa.

Kadenza Euskadiko Orkestrak lehen mailako musika garaikidearen alde egindako apostu berriaren emaitza da, oraingoan Sofia Gubaidulinaren (Cristopol, Tartaristango Errepublika, Errusiar Federazioa, 1931) lana bildu duelarik. Musika garaikideaz ari garenez paradoxa badirudi ere, musikaren mito bihurtu den konpositore baten lana dugu aurrean. Gainera diska hau gauzatzeko goi mailako bi euskal interprete izan ditu lankide: Iñaki Alberdi akordeoijotzailea eta Asier Polo biolontxelojotzailea; nazioarte mailako ibilbidea duten bi musikari hauek Sofia Gubaidulinarekin berarekin egindako elkarlan nabarmena da grabaketa honen balio nagusienetako bat. Musikari taldea Euskadiko Orkestrako hainbat kidek osatutako hari talde batek osotzen du. Guztiak José Ramón Encinar maisuak zuzenduta. Musika garaikidean sakonki aditua den zuzendari honek Francisco Escuderoren Gernika operaren estreianko grabaketan zuzendu zuen Orkestra 2008an, beste lankidetzen artean.

ET'CETERA disko etxe holandarrak argitaratutako disko honek Seven Words, In Croce, Kadenza eta Et exspecto obrak jasotzen ditu eta aukeraketa hau ezin hobea gertatzen da Sofia Gubaidulinaren obrara hurbiltzeko. Egitarauari oharren egile Elixabete Etxebesteren hitzetan, "bere konposizioek erakusten duten espiritualtasun erlijiosoa adimen ireki baten, jarrera bizi eta gizakiaren ikuspegi konstruktiboenaren, izatearen zoriontasunaren eta izatearen erantzunkinaren arteko ikuspegiaren ondorio da. Guzti honek egitarau hunkigarri, bihotz begietakoa, sakona eta trazu askotarikoa eskaintzen digu".

Aldaberatasuna ezaugarri. Duela bi aste Orkestrak Euskal Konpositoreen Bildumako XIV. zkia, Pedro Sanjuáni eskainitako aurkeztu zuen. Denboran atzera begira egin zuen orduan eta EOSek 2011/2012 denboraldian aurkezten duen bigarren disko honetan berriz aurrera begiratu eta musika garaikidea du hizpide. Musika genero hau ez zaio arrotza Orkestrari, izan ere besteak beste Ramon Lazkano, Angel Illarramendi, Luis de Pablo, edo Christian Lindberg-en lanak biltzen dituzten diskoak eta aipatu Gernika argitaratu baititu. Eta denboraldia amaitu aurretik hirugarren disko bat gehituko zaio Orkestraren diskografiari: Kepa Junkeraren lehenbiziko disko sinfonikoa.

Informazio gehiago