Euskadiko Orkestrak ‘Logelan logale’ haur kantataren hirugarren edizioa egin du Miramonen

Gaur, azaroak 13, Logelan Logale-ren hirugarren edizioa egin da Miramonen. Haur abesbatza eta orkestrarako kantata honek, aurreko bi edizioetan izandako harrera bikainaren ondoren, hazten jarraitzen du eta urrats garrantzitsua eman du. Oraingoan, Amara Berri ikastetxeko haur gorren talde bat sartu da abesbatzan, keinuaren, mugimenduaren eta hainbat elementu eszenikoren bidez. Horrela, kantatako abestien erdiek keinu unibertsaletan oinarritutako narrazio bisual bat ere izan dute, haur hauei ikuskizunaren eta kantatak kontatzen duen istorioaren parte aktibo izateko aukera eman diena.

Eszenatoki gainean, kantata oso ondo ezagutzen duten hiru abesbatza federatuk lagundu diete: Easo Eskolania, Andoaingo Udal Musika Eskolako Abesbatza eta Hernaniko Udal Musika Eskolako Abesbatza. Horiek guztiek Eva Ugalderen abesbatza-koordinazioa eta -zuzendaritza izan dute.

Leire Bilbaoren libretoa eta Jagoba Astiazaranen jatorrizko musika duen ekoizpen honetan Juanjo Oconek zuzendu du Euskadiko Orkestra eta Kepa Errasti abeslari eta aktorea izan da protagonista ipuinaren narratiban. Amara Berriko ehunka ikaslek gozatu dute ikuskizunaz.

Ekoizpenak zeinu-mintzairaren bi interprete izan ditu. Horietako bat parte-hartzaileei eurei zuzenduta egon da, eta abesbatzekin, orkestrarekin eta garapen musikalarekin sinkronizatzen lagundu die. Beste interpretea publikoari zuzenduta egon da eta Kepa Errastiren interpretazioa zeinu-mintzairaren bidez helarazi du.

Logelan logale Euskadiko Orkestraren Musika Gelaren Eskola Kontzertuen baitan egin da hirugarrenez, honako erakunde hauen laguntzarekin: Gipuzkoako Batzar Nagusiak, Gipuzkoako Foru Aldundia, Donostiako Udalaren Hezkuntza Saila eta Euskal Herriko Abesbatzen Elkartea.

Obraren sinopsia: ‘Logelan logale’

Non dago errealitatea eta ametsaren arteko muga? Zer denbora eta pisu hartzen dute ametsek gure egunerokoan? Lo gaudenean eta esna gaudenean egiten ditugun ametsak leku berera doaz? Protagonista bere ohean sartzen da eta saiatzen den arren ezin da lokartu. Egunari errepasoa egiten dio eta nekatuegi sentitzen da bere gorputza eta burua loari emateko. Eta hala ere, muga hori zeharkatu nahian dabilen ordu txiki horietan norbait edo zerbait aurkituko du. Zer ote da? Zein ote da? Ez ote da bere burua izango?

Doinu eta kantu ezberdinen bidez kontatu eta kantatuko dugu, gutako bakoitzak ohera joaten den unetik eta esnatu arteko istorioa. Loa eta ametsaren fantasiari, bakoitzak bere doinua jartzeko, lo gaudenean ere abenturak bizi ditugulako.

Irakurketa errazeko gida bat eta material gehiago

Prozesuan zehar hainbat material sortu dira: dosierrak, libretoarekin lan egiteko gidak, konpositorearen eta libretoaren egilearen aurkezpena, ahots eta pianorako partiturak, abestutako zati guztiak biltzen dituen abesbatza baten grabazioa, eszenografiako materialak, maskarak prestatzea, etab.

Halaber, ekoizpen honetarako propio sortu da irakurketa errazeko gida bat. Dokumentu hau beste dokumentu mota batzuk irakurtzeko edo interpretatzeko zailtasunak dituzten kolektiboentzako irisgarritasun kognitiboa hobetzeko sortu da. Egoera horri buruzko kontzientzia sortu nahi da, eta gida-mota horien erabilera beste ekimen batzuetara zabaldu, bai eta, oro har, kultura-sektorera ere. Euskadiko Orkestraren lehen esperientzia da, eta etorkizuneko proiektuetan irakurketa errazeko gidak ezartzen jarraitzeko konpromisoa hartzen du orkestrak.

ARTIS+: Artea, gizarteratzeko

Logelan logale ekimena, baita Musika Gela ziklo osoa ere, ARTIS+: Artea, gizarteratzeko proiektuaren parte da. Mugaz gaindiko Europako lankidetza-proiektu honek helburu du kultura-ekipamenduen irisgarritasuna hobetzea bazterketa-arriskuan dauden biztanle-taldeentzat, dela desgaitasunagatik, dela arrazoi sozialengatik. Proiektu hau 2027ra arte luzatuko da eta honako bazkideak izango ditu, besteak beste: Orchestre National du Capitole de Toulouse, Bartzelonako L’Auditori eta OBC Orkestra eta Paueko Orkestra.

Informazio gehiago