Fernando Velázquez eta Euskadiko Orkestra Donostiako Zinemaldian egongo dira 'Patria' eta 'Hil kanpaiak'-en bidez
'Patria 'eta ‘Hil kanpaiak’ soinu-bandak Fernando Velazquezek idatzitakoak dira, eta haren zuzendaritzapean grabatu ditu Euskadiko Orkestrak Miramongo egoitzan. Bi lanak Donostiako Zinemaldian aurkeztuko dituzte egunotan, lehena Sail Ofizialean eta bigarrena Zuzendari Berriak atalean.
Asko dira Fernando Velazquezek eta Euskadiko Orkestrak azken urteotan elkarrekin grabatu dituzten film eta telesailen soinu-bandak, besteak beste, A Monster Calls, Submergence, Lo imposible edota Ocho apellidos vascos. Orain zerrenda horretara gehitu dira Aitor Gabilondoren Patria eta Imanol Rayoren Hil kanpaiak.
Euskal jatorriko bi grabaketak orkestraren Miramongo egoitzan egin ziren, aurreko denboraldian, bi une ezberdinetan. Batetik, Patriak azaroan izan zuen bere momentua eta, bestetik, Hil kanpaiak martxoan grabatu zuen orkestrak, konfinamenduaren aurretik, Kup Taldea bidelagun zuela.
Fernando Velazquez konpositore eta orkestra-zuzendari saritua zinema eta telebistarako musikagileen belaunaldi berri baten erakusle nagusia da. 1999an hasi zuen bere ibilbide luzea, 50 film luze eta telesail nazional eta internazional baino gehiago biltzen dituena, eta horiei kontzertu-lanen, antzerki-musika intzidentalaren eta era guztietako artisten enkarguen katalogo garrantzitsu bat gehitzen zaie.
Kontzertuak eta Sarrerak Iraila
