Euskadiko Orkestrak ‘Patria’-ren soinu-banda grabatu du Fernando Velázquezen zuzendaritzapean
Aitor Gabilondok sortutako telesaila, Fernando Aramburuk idatzitako eta Tusquets Editoresek Espainian argitaratutako 'best-seller' eleberrian oinarritua, HBO Españak estreinatuko du datorren maiatzean.
Euskadiko Orkestra Sinfonikoak grabatu du maiatzean estreinatuko den 'Patria' telesailerako Fernando Velázquez konpositore getxotarrak sortutako partitura originala. Fernando Arambururen best-seller eleberrian oinarritutako telesaila da.
Euskadiko Orkestrak eskarmentu handia du soinu-banda zinematografikoak grabatzen. Beti Fernando Velázquezen eskutik, arrakasta handiko soinu-bandak grabatu ditu, horien artean J.A. Bayonak zuzendutako A Monster Calls, eta horri esker Velazquezek jatorrizko musika onenaren Goya saria eskuratu zuen. 2017an musikagile bizkaitarrak Submergence Wim Wendersen film luzerako idatzitako musika grabatu zuen. Orkestraren eta Fernando Velázquezen lankidetza oparoaren ondorioz, 2012an The Impossible (J.A. Bayona) filmaren soinu-banda estreinatu zen zuzenean, Donostia Zinemaldiko Sail Ofizialean egin zen aurkezpenarekin bat etorriz.
Fernando Velázquez (@FVelazquezMusic) firma la partitura original de #PatriaHBO. Estreno en mayo 2020. pic.twitter.com/6w5bSlZkPv
— HBO España (@HBO_ES) February 11, 2020
Fernando Velázquezi buruz
Sari ugari eskuratu dituen Fernando Velázquez musikagile eta orkestra-zuzendari ospetsua zinemarako eta telebistarako musikako egileen belaunaldi berri baten adierazgarri nagusia da Espainian eta AEBetan. 1999an hasitako bere ibilbide luzeak 50 film baino gehiago eta serie nazional eta nazioarteko gehiago barne hartzen ditu, eta horiei kontzertu-obren, antzerki-musika intzidentalaren eta mota guztietako artisten enkarguen katalogo garrantzitsu bat gehitu behar zaie.
Getxoko, Bilboko eta Gasteizko kontserbatorioetan musika-ikasketak egin zituen, eta karrera amaierako aparteko saria irabazi zuen. Ondoren, Parisen eskolak jasotzen jarraitu zuen. Konposizioa ikasi zuen Madrilgo Goi Mailako Errege Kontserbatorioan, eta Historia Garaikideko lizentziaduna da Deustuko Unibertsitatean. Biolontxelista gisa, Santa Cecilia Ganbera Orkestrarekin, Edinburgh University Music Society Symphonic Orchestrarekin, Euskal Herriko Gazte Orkestrarekin, Euskadiko Orkestra Sinfonikoarekin eta Madrilgo Orkestra Sinfonikoarekin elkarlanean aritu da.
Espainiako eta nazioarteko zuzendari handientzat egin du lan, besteak beste, J. A. Bayona, Patricia Ferreira, Mateo Gil, Emilio Martinez Lazaro, Guillermo del Toro, Nacho Vigalondo edo Wim Wendersentzat. Bere estilo nahasezina, sinfonismo posromantikoaren eta Hollywoodeko konpositore handien oinordekoa, zentzu melodiko handia, orkestraren ezagutza tinko zehatza eta soinu-banda bakoitza berez artelan bihurtzen duten tempoen kontrol dinamikoa ditu ezaugarri.
Bere ibilbidean zehar, oso esanguratsua izan da J. A. Bayonarekin izandako harremana, eta harekin El orfanato (2007), The Impossible (2012) eta A Monster Calls (2017) filmen soinu-bandak egin ditu. Gure mugetatik kanpo, Savage Grace (Tom Kalin, 2007), BabyCall (Pal Sletaune, 2011), Mama (Andrés Muschietti, 2013), La cumbre escarlata (Guillermo del Toro, 2015, Espainian Crimson Peak izenburuarekin ere ezaguna) eta Pride and Prejudice and Zombies (Burr Steers, 2016) sinatu ditu.
Besteak beste, honako orkestra hauek zuzendu ditu: Bilbo, Euskadi, Extremadura, Galizia, Madrilgo Erkidegoa, Malaga, Nafarroa, Asturaiaseko Printzerria, RTVE, Sevilla, Budapesteko Irratia, Londresko Phillarmonia, London Metropolitan eta Txekiar Orkestra Nazionala.
