Fernando Velázquez, Euskadiko Orkestra Sinfonikoa, Ken Zazpi, Zea Mays eta Doctor Deseo "Fair Saturday 2016"-ren irekieran

Azaroaren 23 asteazkenean, Euskadiko Orkesta Sinfonikoak, Fernando Velázquezen gidaritzapean, "Fair Saturday" mugimenduaren inaugurazio kontzertua emango du Ken Zazpi, Zea Mays eta Doctor Deseo taldeekin batera, mugimendu kultural honen 2016ko edizioari hasiera emateko. Kontzertu hau Bizkaiko Elikagaien Bankuaren alde antolatu da eta jasotakoa gosearen eta eralgiketaren aurkako borroka bultzatuta garatzen diren ekimenetara bideratuko da. Emanaldia Bilboko Campos Antzokian izango da, iluntzeko zortzietan.

Euskadiko Orkestra aurrez aritua da Ken Zazpi taldearekin (2013an disko bat kaleratu eta hainbat kontzertu eman zituzten), baina estreinakoz igoko da eszenatokira Zea Mays eta Doctor Deseo taldeetako kideekin. Emanaldi berezi honetan entzungai izango dira, bertsio sinfonikoan, Doctor Deseo-ren "Cuánto frío hace en Saturno", "Corazón de tango" eta "Una mirada distinta"; Zea Mays-en "Gaur", "Negua joan da ta" eta "Elektrizitatea"; eta Ken Zazpi-ren "Haizea", "Gereziondoa", "Bihotz" eta "Noizbait". Kantu guztien orkestrarako moldaketak Fernando Velázquezek eginak dira. Entzungai izango da, halaber, getxotarrak "Lo Imposible" filme entzutetsurako sortutako soinu-bandaren gai nagusia.

0 Lerroa. Kontzerturako sarrerak agortu egin dira jada, baina 0 lerroa sortu da, nahi duenak ekarpenak egin ditzan www.kutxabank.es edo www.teatrocampos.com webgunean, antzokiko leihatilan eta Kutxabank kutxazainetan.

"Fair Saturday 2016"-ren irekiera kontzertua
Azaroaren 23a. Campos Antzokia, Bilbo. 20:00etan.
Fernando Velázquez, zuzendaria
Ken Zazpi (Eñaut Elorrieta, Beñat Serna)
Zea Mays (Aiora Renteria, Piti Imaz, Ainhoa Moiua)
Doctor Deseo (Francis Díez, Joe González)
Euskadiko Orkestra Sinfonikoa