Irailaren 18 larunbatean abiatuko da Miramongo Matinéeak zikloaren 19. denboraldia
Orkestraren Miramongo Egoitzan aurkeztu da, "Etengabeko mugimenduan" lelopean, Miramongo Matinéeak zikloaren 2010/2011 denboraldia. Iñigo Alberdi, Orkestraren zuzendari nagusiak eta ziko honen hemeretzigarren denboraldia osatuko duten kontzertuetan esku hartuko duten hainbat musikarik emanaldi horien berri eman dute. Honela, hizlari izan dira Marco Caratto, Jon Larraz, Igor Torre, Elena Martínez de Murguía, Arkaitz Martínez eta Oscar López Orkestrako kideak, Araoz Gazte Abesbatzako zuzendari gorka Miranda, Jorge Pacheco perkusio-jotzailea eta Juan Vega txirula-jotzailea. Aurtengoan ere askotariko 16 kontzertu izango dira, garai orotako musika formatu ezberdinetan bilduz. Bertan izan da halaber, Iñaki Almandoz zikloaren babesle den Kutxaren ordezkari gisa.
Denboran aurrera eta atzera doan hotsa, garai batetik bestera, barrokoko musikatik musika garaikidera eta garaikidetik klasikoenera mugimenduan dabilen hotsa. Musika erlijiosotik minimalismora, abesbatzatik orkestra handira eta hortik haize, hari edo perkusio taldeetara kulunkan dabilen bulkada. Orkestra handiak edo abesbatza batek sortutako uhinak, edo haize, hari zein perkusio ganbera-taldeetatik sortzen direnak. Lehenbiziko urratsak ematen ari diren zuzendari gazteak zein arrakastaz jositako bidean aurrera doazen zuzendari gailenen indarretik jaiotako dinamismoa. Aurretik etorri eta proiektu berriak dakartzatela bueltan datozen talde ezagunak eta Euskadiko Orkestrak Miramonen duen egoitzako auditorioan estreinakoz arituko direnen energiatik datorren mugimendua. Hori da Miramongo Matinéeak zikloa: hotsa etengabeko mugimenduan.
Miramongo Matinéeak zikloaren denboraldi berria irailaren 18an hasiko da, goizeko 11etan Miramongo Egoitzan. Musika Garaikidea hizpide izango duen estreinako Matinée honetan, Minimal hari kuartetoak Michael Nyman eta Philip Glass-en obrak interpretatuko ditu.
Aurreko denboraldietan bezala, KUTXAri gure esker ona adierazi nahi diogu, bere Gizarte Ekintzaren bidez, 1993an abian jarri zenetik ziklo honen garapenerako eman duen eta egun ematen duen laguntzagatik.
Kontzertuak eta Sarrerak Abuztua
