Jun Märkl, Euskadiko Orkestrako zuzendari titularra
Jun Märkl alemaniar maisuak Euskadiko Orkestra Sinfonikoaren zuzendari titular bilkaturik zuzenduko du kontzertu-programa berria (azaroaren 5, 6 eta 8an). Orkestra zuzentzeko Euskadira itzultzearekin batera, zuzendari nagusi Oriol Rochek Jun Märkl 2014/2015 eta 2015/2016 denboraldietan Euskadiko Orkestraren arduradun artistiko gorena izango dela berretsi du gaur. Erabaki honek Administrazio Kontseiluaren onespena izan du.
Duela hilabete batzuk, Jun Märkl Euskadiko Orkestra Sinfonikoko Musika Aholkulari izendatu zuten. Orduan, Eusko Jaurlaritzako Hezkuntza, Hizkuntza Politika eta Kultura Sailak, Jun Märklek eta orduko Orkestraren zuzendari nagusi Iñigo Alberdik egoki ikusi zuten zuzendaritza nagusi berriak kargu hartu arte itxarotea harreman hau etorkizunera begira baieztatzeko. Azaroaren 3tik aurrera Jun Märkl Euskadiko Orkestra Sinfonikoaren zuzendari titularra izango da datozen bi denboraldietan.
Orkestraren Miramongo egoitzan izandako aurkezpen ofizialean, Eusko Jaurlaritzaren Kultura, Gazteria eta Kirol sailburuorde Joxean Muñozek zera adierazi du: "Zuzendari titular gisa berrestearekin batera, guztiok (Eusko Jaurlaritzak, zuzendaritza nagusiak eta zuzendari titularrak) Orkestraren etengabeko hobekuntzaren alde lan egiteko bat egin dugu.Eta zera gehitu du: "Musikari hertsiki loturik sortarazi zuen interesaz gain, oso interesgarri gertatu zitzaigun Orkestra herri baten eraikuntzarako tresna gisa zuen ikuspegia eta baita kulturaren ikuspegi zabala, gizarte-tresna den heinean". Oriol Rochek, berriz, "berrespen honek Orkestraren egonkortasuna bermatzen duela" esan du. "Modu berean ulertzen dugu proiektua. Orkestrak bere etegabeko hobekuntza-bideari jarraitu behar dio, zuzendaritza nagusi zein musikalaren galderei erantzunez" gaineratu du. Jun Märkl "betebehar berri honi heltzeagatik oso pozik" agertu da; eta zera ere adierazi du: "Orkestrak etorkizun handia du eta lan-talde honekin Orkestraren eta bere entzulegoaren etorkizunaren alde lan egiteko irrikitan nago".
Zuzendari titular berriak ondo ezagutzen du Euskadiko Orkestra. 2012an zuzendu zuen estreinakoz, Biarritzen, Musique en Côte Basque jaialdiaren baitan. Ordutik, alemaniar maisuak Abonu Denboraldiko programa ezberdinetan zuzendu du Orkestra, eta baita joan den Musika Hamabostaldian ere.
Bere ibilbideari dagokionez, Jun Märkl nazioarte mailan ibilbide oso luzea duen zuzendari ezaguna da, alemaniar zein frantziar errepertorioan eskarmentu handiduna. Erreferentziazko orkestra sinfonikoen zuzendari titularra izana da: Orchestre National de Lyon (2005-2011) eta MDR Sinfonierorchester Leipzig (2012.era arte). Halaber, Cleveland, Philadelphia, Txekiar Orkestra Filarmonikoa eta Municheko Orkestra Filarmonikoa ere zuzentzen ditu, besteak beste. Operaren alorrean ere biziki jarduten duen zuzendaria da Märkl, Viena, Berlin, Munich, Budapest eta Dresdengo estatu operen lankide delarik. Bere grabaketa ugarien artean aipagarrienak, Mahler eta Schumannen lanak bilduz egindakoak eta Debussyri eskainitako bederatzi bolumenek osatutako bilduma arrakastatsua. (Honekin batera biografia osoa doa)
Zuzendari titular izendatu berri, Jun Märklek Orkestraren musika zuzendaritza osotuko du, Zuzendari Printzipal Gonbidatu izaten jarraituko duen Andrey Boreykorekin batera.
