SALGAI DAUDE JADA DONOSTIAKO “MUSIKA FAMILIAN” ZIKLORAKO SARRERAK
Salgai daude "Musika Familian" zikloko 2009/2010 denboraldian Donostian ospatuko diren kontzertuetarako sarrerak. Orkestrak, bere Musika Gelaren baitan, Kursaal Fundazioarekin koprodukzioan antolatutako ziklo honetarako sarrerak ohiko salmenta-bideak erabiliz eros daitezke.
Kontzertu guztietarako sarrerak Telekutxa (940 001 200), Servikutxa eta kutxa.net bidez eros daitezke. Halaber, Kursaaleko auditorioan eta ganbera-aretoan izango diren kontzertuetarako sarrerak Kursaal Auditorioko leihatilan eros daitezke 12.00etatik 14.00etara eta 18.00etatik 20.00etara, Kursaal Fundazioaren edo Euskadiko Orkestraren emankizunen bat dagoen egunetan.
Kursaalean izango diren kontzertuetarako sarreren prezioa 6€-takoa izango da, 3€-takoa 12 urtetik beherakoentzat. Orkestraren Miramongo egoitzan ospatuko diren kontzertuei dagokionez, "Haydn... bizitza oso bat" kontzerturako sarreren prezioa 6€-takoa izango da eta "Kutxa misteriotsua" kontzerturako sarrerena 3€-takoa. Azken honetan, gehienezko ikusle-kopurua 90 izango da aldi bakoitzean.
Gehienez 6 sarrera eros daitezke kreditu-txartel berarekin.
"Musika Familian" zikloa Gasteizen. Orkestrak arabar hiriburuko Udalarekin lankidetzan Gasteizen antolatzen duen "Musika Familian" zikloari dagokionez, kontzertuetarako sarrerak urtarrilaren 19tik daude salgai ohizko salmenta-bideetan.
