La Llama

Euskadiko Orkestra Sinfonikoak Jose Maria Usandizagaren “La Llama” operaren estreinaldi berria, kontzertu-bertsioan, jasotzen duen diskoa aurkeztu du. Deutsche Grammophonek argitaratu duen CD bikoitz hau Euskadiko Orkestra Sinfonikoak musikagile donostiarraren heriotzaren mendeurrena ospatu duen Usandizaga urteari egin dion ekarpenaren gailurra izan da.

Grabazioak proiektu handi baten emaitza jasotzen du: partituraren edizioa osatzeko eginiko lan itzela eta, ondoren, operaren estreinaldia kontzertu-bertsioan. Juan Jose Oconek zuzendua, pertsona eta erakunde askoren inplikazioa suposatu du: Juan Jose Oconek berak berreskuratu du partitura, Ana Huarteren laguntzarekin, eta Manuel Cabrera musika-kritikariak libretoa berrikusi du; prozesu horretan guztian, halaber, Eresbil Musikaren Euskal Artxiboaren laguntza izan dute. Ondokoak izan ziren estreinaldi berrian parte hartu zuten artistak: Sabina Puertolas (soprano), Mikeldi Atxalandabaso (tenore), Damian del Castillo (baritono), Miren Urbieta-Vega (esatari), Elena Barbe (soprano), Fernando Latorre (baxu-baritono), Maite Maruri (mezzosoprano) eta Xabier Anduaga (tenore); abesbatzarako zatiak Andra Mari Abesbatzak abestu ditu.

Lan hori guztirako, ezinbestekoa izan da Donostiako Udalaren eta Gipuzkoako Foru Aldundiaren laguntza.

Sabina Puertolas, Mikeldi Atxalandabaso, Damian del Castillo, Miren Urbieta-Vega, Elena Barbe, Fernando Latorre, Maite Maruri, Xabier Anduaga, Andra Mari Abesbatza.
Euskadiko Orkestra Sinfonikoa
Juan Jose Ocon, zuzendaria