12. Matinéea: Euskal Herriko Gazte Abesbatza

Musika eta kantua betidanik erabili izan dira sentimenduak adierazi eta azaleratzeko. Era berean, irudi, paisaia eta hainbat egoera islatzeko ere baliabide ezin hobeak dira. Musikaren ahalmen hori oinarri hartuta eratu du Euskal Herriko Gazte Abesbatzak programa hau.

Argia eta itzala, bizitza eta heriotza, eguna eta gaua, negua eta uda… ideia kontrajarriak dira, baina elkarren arteko lotura estua dute. Hainbeste, non batak ez duen zentzurik bestea gabe. XX. eta XXI. mendeetako koru-musikak kontzeptu horiek guztiak nola uztartu eta adierazi dituen erakutsiko du Matinée honetan gazte-abesbatzak.

Euskal Herriko Abesbatzen Elkarteak Euskal Herriko Gazte Abesbatza lurraldeko 40 ahots gazte onenetakoen aukeraketatik sortu zuen 2016 urtean. Abesbatzako kide izateko proba zorrotzak antolatzen dira.

Musikenen formazioa jasotako Esteban Urzelai eta Isabel Mantecón maisuek batera zuzentzen dute sortu zenetik. Kontzertuetarako programen prestaketa hainbat asteburu trinkotan garatzen da, eta horietan abeslari gazteen ahots-formazio indibiduala osatzeko ahots-teknikako irakasleen laguntza ere izaten dute.

Gazte-abesbatza honen helburuak honako hauek dira: euskal kultura gazteei hurbiltzea, hautatutako gazteok maila profesionaleko koru-abeslari gisa prestatzea eta gure kulturaren enbaxadore izatea Euskal Herrian eta gure mugetatik haratago maila altuko talde batekin.

Jada erreferentziazko eta kalitatezko koru gisa sendotu da. Esaterako, izugarrizko laudorioak jaso zituen koruak Tolosako Abesbatza Lehiaketaren 50. edizioari amaiera eman zionean eta proiektu berriak garatzeko gonbidapen asko jaso ditu ordutik.