15. Matinéea: Dúo Ferrández

Musikarien familia batean jaioak biak, Pablo Ferrández biolontxelojoleak eta Sara Ferrández biolajoleak eskainiko dute Denboraldiko azken aurreko Miramongo Matinéea.

Euskadiko Orkestra Sinfonikoaren Abonu Denboraldian Dvoraken Biolontxelorako kontzertuaren interpretazioa egingo duen Pablo Ferrández nazioarteko ibilbide oso azkarra izaten ari da. Hiru urte zituela hasi zen biolontxeloa jotzen eta hamahirurekin Reina Sofía Goi Mailako Musika Eskolan sartu zen. Bere talentua hainbat sariren bidez aintzatetsi dute; bereziki gertukoa zaigu 2016an jaso zuen “Urteko artista gaztea” kategoriako ICMA saria, Euskadiko Orkestra Sinfonikoak eta Donostia 2016ko Europako Kultur Hiriburutzak antolatutako banaketa-galan. Nazioarteko figura bezala finkatua, Ferrándezek sona handiko orkestrekin kolaboratu du, tartean Londreseko Filarmonikoarekin eta Israelgoarekin, eta uztail honetan Los Angeleseko Filarmonikoarekin eta Gustavo Dudamelekin egingo du debuta.

Espainiako interprete gazteen artean erreferente bilakatu den Sara Ferrández biolajoleari buruz kritikak nabarmendu ditu bere soinu epela, naturaltasuna eta eszenatoki gainean erakusten duen segurtasuna. Berak ere hiru urterekin hartu zuen lehen aldiz biola eta zazpi urte zituenerako Estatuko eszenatoki garrantzitsuenetan jotzen hasia zen. Azken urteotan nazioarteko dimentsio nabarmena duen ibilbidea ari da garatzen, eta aipagarria da Berlingo Philharmonie edo Genevako Victoria Hall bezalako eszenatoki enblematikoetan jo duela.

Anai-arrebek Johann Sebastian Bachen obrez osatutako kontzertu hau eskainiko digute: Biolontxelorako 1. Suitea, Biolontxelorako 4. Suitea (biolarako transkripzioarekin) eta 15 asmakariak (klabezinerako idatzitako obra, biola eta biolontxelorako transkribatua).