16. Matinéea: Euskadiko Orkestra Sinfonikoaren Ganbera-orkestra

Kontzertu honek aukera emango digu harparen, flautaren, hariaren eta haizearen arteko elkarrizketaren bidez jende gehienarentzat ezezaguna den Mozarten alderdi bat ezagutzeko. Musikagileari omenaldi berezi bat egingo diogu, gogora ekarriz bere garaian ezagunegiak ez ziren instrumentuen —harpa kasu— garapen eta konposizioan ezinbesteko mugarri izan ziren pieza batzuk, enkargu bidez egindakoak.

Gian Luca Tocchi musikagile eta zuzendari italiarrak harpa eta harientzat 1940an transkribatutako Mozarten hiru bals txikirekin hasiko da kontzertua. Tocchiren obra gehienak orain ari dira berreskuratzen, hainbat hamarkadatan galduta egon baitira.

Ohikoak ez diren instrumentuentzat egindako bost piezaz osatutako serie bateko azken-aurrekoa da Adagio eta Rondo. Mozartek kristalezko harmonika jotzen zuen interprete itsu batentzat, Marianne Kirchgessner-entzat, idatzi zuen obra. Oraingo honetan harpak ordezkatuko du instrumentu hori.

Matinéea Flauta, harpa eta orkestrarentzako kontzertuarekin amaituko dugu, Guîneseko Dukeak eta bere alaba nagusiak eskatutakoa, flautajolea eta harpajolea, hurrenez hurren. Mozartek eskatzaileen neurrira idatzi zuen kontzertu hau, nahiz eta hauek ez zioten inoiz egindako lanagatik ordaindu konposatzaileari. Nolanahi ere, obra hau urrats garrantzitsua izan zen harparen etorkizunerako, bai instrumentu bakarlari gisa, bai flautarekin duoan —ordura arte ez zen batere ohikoa konbinazio hau—. Kontzertuaren jatorrizko eskuizkribua oraindik existitzen da eta 1948tik Krakoviako Unibertsitate Jakobianoan dago gordeta.