16. Matinéea: Hemiola Laukotea

Hemiola Laukoteak eskainiko duen hamaseigarren eta azken hitzorduarekin emango diogu amaiera Miramongo Matinéeen 20/21 Denboraldiari, ganbera-musika zikloaren hogeita bederatzigarrena izan dena.

Euskadiko Orkestrako hari-sekzioko kideek osatutako talde honek Joseph Haydnen Kristoren azken zazpi hitzak gurutzean lanari egingo dio aurre. Obra hau Cadizeko kanonigoak Ostiral Santuaren liturgiarako enkarguz eskatutakoa da.

Lan honen izenburuak aipatzen dituen "Zazpi hitzek" Jesusek hil aurreko uneetan gurutzean esan zituen azken zazpi esaldiei egiten diete erreferentzia, Mateo, Marko, Lukas eta Joanen Ebanjelio kanonikoetan jasotzen denaren arabera.

Jatorrizko bertsioa orkestrarako idatzia dago 1786an. Urtebete geroago, 1787an, Haydnek berak hari-laukoterako bertsioa idatzi zuen, Matinée honetan entzun ahal izango dena, hain zuzen.

Lan honen aipatzeko moduko ezaugarria da Haydnek tonalitate sorta izugarri zabala erabili zuela, garai hartan ohikoa zena baina askozaz zabalagoa.

Lana sarrera-mugimendu batekin hasten da. Hark ematen die bide ardatz diren zazpi mugimenduei (adagioak), eta horietako bakoitzak Kristoren hitz bana irudikatzen du. Hitzen ziklo osoaren ondoren, ‘Lurrikara’ izeneko amaierako mugimendu kontrastatzaile batekin amaituko da obra.