23/24 Denboraldiko hirugarren Miramongo Matinée honek flautaren alderdi desberdinak erakutsi nahi ditu eta, horretarako, Euskadiko Orkestrako bost musikarik osatzen duten talde honek instrumentu hori protagonista duten ganbera-lanak aukeratu ditu; Mozart eta Beethoven konpositore ospetsuen lanak, baina baita ezezagunagoak diren beste batzuenak ere, Buys kasu.

Kontzertua Ludwig Van Beethovenen Serenatarekin hasiko da, 1801ean sortua, G. Cappi editore hasiberriari negozio batzuk lortzen laguntzeko. Beethovenek oso musika original gutxi konposatu zuen espresuki flautarentzat, eta Serenata hau, flauta eta biolin banarako idatzia, salbuespen bakanetakoa izan zen. Soprano-instrumentuen enfasi horrek biola baxu-paperean uzten du, eta horrek izaera eguzkitsu eta erlaxatua ematen dio Serenatari.

Bigarrenik, Wolfgang Amadeus Mozarten Flautarako kuartetoa K.285 entzungo da. 1777 eta 1778 artean konposatutako lan hau Ferdinand de Jean flautista afizionatuarentzat idatzitako hiru kuartetoetako lehena da.

Matinéea amaitzeko, kontzertu honetako obrarik ezezagunena aukeratu du taldeak: Jan Brandts Buysen Flautarako kintetoa, askotan Gabonetako kinteto bezala aipatzen dena. 1903an idatzitako lan honek Berlioz eta Schuberten mundu Erromantikoa dakar gogora, eta mugimendu bakoitzak —lau guztira— Gabonekin lotutako izenburu bat du, Bibliatik ateratakoa.