Matinée hau Heinrich Hofmannen Flauta eta harirako serenatarekin hasiko da. New York Philharmonic Club izeneko musikari-talde batek enkargatu zuen obra hau 1885an, Eugene Weiner flautajoleak eta hari-boskote batek osatutako talde alemaniarrak, alegia. Serenatak tempo ugari ditu eta folklore hungariarreko estiloa erakusten du amaiera aldera.

Max Bruchen Kol Nidrei kutsu judaikoko pieza bat da, eta bere lanen artean hainbesteko sona lortu du non, batzuetan, Bruch konpositore judutzat jo izan den, egia izan gabe. Material melodiko etniko exotikoa erabiltzeko interes nabarmena zuen Bruchek eta argi nabari da exotismorako joera hori Kol Nidrei lanean. Alemaniarrak 1881ean konposatu zuen biolontxelo eta orkestrarako obra hau, baina Matinée honetan eskainiko den bertsioa kontrabaxu eta pianorako da.

Kontzertu hau Sergei Prokofieven Motibo hebrearren gaineko oberturarekin amaituko da. Sobietar musikagileak 1919an Estatu Batuetara egin zuen bidaia batean idatzitako obra hau oso ohikoa ez den klarinete, piano eta hari-laukote instrumentaziorako konposatua dago. 1919 urtearen hasieran, Prokofievek Sobietar Batasunetik emigratu zuen Zimro talde juduaren enkargua jaso zuen. Talde honek konpositoreari juduen abesti herrikoien liburuxka bat eman zion eta Prokofiev horretan oinarritu zen 1920an New Yorken estreinatu zen lan hau osatzeko, Prokofiev bera pianoan zuela. Obra 1924an orkestratua izan zen (Op.34b), bertsio orkestratua hain sarri interpretatzen ez den arren.