8. Matinéea: Ainara Ortega eta Iñaki Salvador

Ainara Ortega (Hernani, 1981) ilean lore bat daramala igotzen da beti eszenatokira. Horrez gain, bere nortasun artistikoak barne hartzen dituen “ni” ugari horiek dosi txiki baina eskuzabaletan agertzen dizkigun txistera itxurako motxila bat darama ere. Berekin uneoro daraman clowna (Peio Arnaez, Nestor Muzo eta Gabriel Chamerekin ikasi zuen) gure begien aurrean jarri edo, akaso, arkua irmoki hartu (ez geziak, baina) eta instrumentu horren irakasle izateko egindako ikasketetan eta, orokorrean, munduko musika guztietan eta, zehazki, Ainararen unibertso berezian errotutako usainak aterako dizkio bere biolinari. Oraingo honetan, nola ez, bere musika-malkar ugarietan bidelagun duen Iñaki Salvador piano-jole donostiarra alboan izango du ere. Berarekin batera grabatu ditu bere koroa pertsonaleko bitxi txikiak, "Te doy una canción" (Vaiven, 2009) lan arrakastatsua esaterako; eta bera da piano-jolea Ainarak interprete nagusi gisa atera duen lehen diskoan: "Scat" (Vaiven, 2015). Bikote honek Kantaginjazz bezalako musika-proposamenak sortu ditu eta gaur, hemen, Ainarak eszenatokian daramatzan bi hamarkaden balantzea egingo duen honetan, Pandoraren kutxa ireki eta bertan ezkutaturiko guztia agertuko digute.