Beethovenek 15 urte besterik ez zituenean konposatu zituen bere hiru piano kuartetoak, zeintzuetatik bigarrena entzungo dugun Matinée honetan. Gazte idatzi zituen arren, hil eta urtebetera arte ez ziren argitaratu, 1828ra arte, alegia. Hain pieza goiztiarrak dira, ezen jatorrizko partituretan klabezinerako eta baxurako idatzita baitaude. Garai hartan, konfigurazio hori ez zen batere ohikoa, are gehiago, Mozarten bi kuarteto baino ez zeuden formazio bererako.

Mozart eta Beethovenen aroan, baita askoz beranduago ere, ez zen erraza izan emakumearentzat musikaren munduan lekua egitea, maskulinoa nagusi baitzen argi eta garbi. Paper femeninoa egongela burgesera bideratua egon zen denbora luzez, beti pianoan, eta akaso, kasuren batean, denbora-pasarako piezaren bat konposatzeko aukerarekin. Konbentzionalismo horiekin hautsi zuen Luise Adolpha Le Beauk, zuen musika-prestakuntza bikainari eta konpositore gisa zuen talentuari esker. Bere musika ederra eta sakona da, beti erromantikoa baina ausardia formal handikoa. Bere ekoizpen musikal oparotik 1885ean konposatutako bere Pianorako kuartetoa hautatu dute hitzordu hau ixteko.

Matinée honen ekarpen handiena beste emakume baten eskutik etorriko da, Marian Gutiérrez Urbaneta bilbotarraren eskutik, zeinak, enkarguz, Magma obra sortu baitu espresuki kontzertu honetarako. Horrela deskribatzen du bere lana: “Bat-batean, isiltasuna hautsi egiten da. Erresonantzia batek espazio akustikoa urratzen du, hasierako estatismotik abiatuta mugimendu progresibo bat sortuz. Pertzepzioaren mugetatik soinuaren bilakaera marrazten da, maremagnum tinbriko eta testura ia materiko batean lehertzen dena. Laba eta errautsa askatzen dira, saihestezina den bidea eginez azken hoztasunerantz. Pixkanaka, nebulosa artean, barealdia itzultzen da. Isiltasun latentea besterik ez da geratzen, berriro askatua izateko esperantzan”.