Kabiar alemana

Dmitri Makhtinek, San Petersburgoko errusiarrak, bere izenkide eta herrikide Xostakovitx handiaren musika interpretatuko du. Eta, baita ere, Beethoven alemaniarra.

Bere bizitzaren amaieran idatzia, osasunez kaxkar zegoela ordurako, Xostakovitxen Biolinerako 2. Kontzertuak igarkizun biografikoak dakartza, biolina biola bihurtu nahi ei duen tonu ilun bat, bai eta 5. Sinfonia bezalako aurreko bere lanei eginiko erreferentzia zainduak ere. Garai hartako biolin-jole ospetsuena zen David Oistrakh errusiarrarentzat idatzi zuen Xostakovitxek kontzertua. Guk egungo biolin-jole errusiar onenetakoa den Dmitri Makhtin hartuko dugu, Xostakovitxen sorterri San Petersburgon jaioa ere.

Bigarren zatian, Beethovenek idatzi zituen bederatzi sinfonien artean gutxien jotzen den lana zuzenduko du Robert Treviñok, re maiorreko 2. Sinfonia. Aipatua, halere, funtsezkoa izan zen bere lengoaiaren bilakaeran. 1803. urtean amaitua, Beethovenek bere lehen estilo klasikoaren aroari amaiera eman zion lan honekin, Erromantizismoaren ateak irekitzen hasteko.