Rakhmaninov / Strauss

Oharra: Martxoaren 12an, greba deialdia egin da euskal sektore publikoan. Jarraipen zabala aurreikusten denez eta, ondorioz, Iruñeko kontzertua egitea ezinezkoa izango denez, orkestrak ekainaren 18ra atzeratzea erabaki du. Kontzertu honetarako erositako sarrerek indarrean jarraituko dute ekainaren 18rako. Egun horretan joan nahi ez dutenek Euskadiko Orkestran eskatu ahal izango dute itzulketa 943 01 32 32 telefonora deituz edo abonatuak@euskadikoorkestra.eus posta elektronikora idatziz.

Aurreko kontzertuak ezohiko Rakhmaninov bat entzuteko aukera emango digu; seigarren abonu-programak, ordea, errusiarraren sorkuntza paradigmatikoa dakarkigu: Pianorako bigarren kontzertua, piano-errepertorioko obrarik ezagunenetako –eta zailenetako– bat. Italiar artisten tandem bikain batek interpretatuko du: Lehenik, Federico Colli, Salzburgoko eta Leedseko lehiaketetako irabazlea, bere belaunaldiko pianistarik irudimentsuenetako gisa goraipatua; bigarrenik, Riccardo Frizza, opera italiarreko espezialista ospetsua, errepertorio sinfonikoarekin duen trebetasuna hemen erakutsiko duena. Programaren zati bat, halaber, Italiari eskainiko zaio: Richard Straussen Aus Italien poema sinfonikoak Erromako hondarretan, Sorrentoko hondartzetan eta Napoliko kaleetan barrena bidaiatzera eramango gaitu, Funiculì, Funiculà eta beste doinu ospetsu batzuen medioz.