Euskadiko Orkestra eta Malandain Ballet Biarritz “Versailles Festival: Les voix Royales” jaialdian
Euskadiko Orkestra Sinfonikoak eta Thierry Malandainek zuzentzen duen Malandain Ballet Biarritzek Errauskineren eszenaratze berria aurkezten dute. Bi erakunde hauek elkarrekin garatutako bigarren proiektua den muntaia hau EOSen Abonu Denboraldiko azkena izango den 15. programaren baitan aurkeztuko da, ekainaren 3 eta 4an Donostiako Kursaalean eta 17an Bilboko Euskalduna Jauregian. Azken kontzertu honen aurretik, Euskadiko Orkestra eta Malandain Ballet Biarritz Parisera abiatuko dira. Han, Château de Versailees-eko Opéra Royal antzokian aurkeztuko dute Errauskine/Cendrillon, Versailles Festival jaialdiaren baitan ekainaren 7, 8 eta 9an.
"Errauskine", Euskadiko Orkestraren eta Malandain Ballet Biarritzen pas de deux berria. 2011an estreinako lankidetzak izandako arrakastaren ostean (Magifique ikuskizun hartan EOSek Tchaikovskyren musika zuzenean intepretatu zuen zulogunetik), EOSek eta Malandain Ballet Biarritzek indarrak batu dituzte beste behin, oraingoan Errauskine/Cendrillon eszenaratzeko.
Lehenbiziko aldiz Versailles Festival jaialdian, Château de Versailles Spectacles kontzertu ziklo ospetsuaren uda garaiko hirugarren jaialdian. Malandain Ballet Biarritz eta Euskadiko Orkestraren egitasmo berri hau berean hartuko duen Versailles Festival jaialdia, europar zirkuituko programazio zorrotzenetako baten barnean kokatzen da, Château de Versailles Spectacles erakundearen kontzertu zikloaren barnean, alegia. Irailetik ekainera bitartean 70 bat ikuskizun eskaintzen ditu Opéra Royal antzokian eta Versalleseko Jauregiko espazio ezagunenetan.
"Les Voix Royales" (errege ahotsak) izenburupean, maiatzaren 31tik uztailaren 7ra bitartean hirugarren Versailles Festival jaialdiak artista nabarmenen emanaldiak bilduko ditu: Sir John Eliot Gardiner eta The English Baroque Soloists, Jordi Savall, Magdalena Kozena, Cecilia Bartoli, Diego Fasolis, Orchestre National de Montpelier, Monteverdi Choir eta Choeur Accentus abesbatzak eta abar ariko dira Versallesko Jauregiko Opéra Royal, Chapelle Royal edo Galerie des Glaces bezalako espazioetan, Paristik kilometro gutxira. Izen hauekin guztiekin batera agertzen dira halaber Malandain Ballet Biarritz eta Euskadiko Orkestra ere. Osagarriak diren jarduerak garatzen dituzten kultur erakundeen artean sinergiak sortzeak duen garrantzia azpimarratzen du horrek, sinergia hoiek gerora eszenatoki garrantzitsuenetan aurkeztuko diren maila goreneko sorkuntzen garapena ahalbidetzen baitute, gure kulturaren eta bide batez gure gizarte osoaren ordezkaritza onena bilakatuz.
Nazioarte mailako bira berri hau Euskadiko Orkestrak bere historian zehar egindako 15.a da eta Europa osoko eszenatoki ikusgarrienetako batean debuta egiteko aukera da, Versallesko Jauregiko Opéra Royal delakoan. Paristik ekialderuntz 17 kilometrotara kokatua eta Ange-Jacques Gabriel eta Blaise-Henri Arnoult, Luis XV.aren arkitekto eta makinista nagusiek diseinatua, Opéra Royal delakoa 1770eko maiatzaren 16an inauguratu zuten, Luis XVI. a oinordekoaren eta Maria Antonieta Austriako artxidukesaren arteko ezkontzaren ekitaldien artean. Luis Feliperen garaian Frédéric Nepveu-k apainduegi eraldatua, 1871.ean antzoki izaera galdu eta Senatuaren egoitza bilakatu zen. 1957. urtean, André Japyk zuzendutako berritze lan sakonen ondoren, itzuli zen berriro ere antzoki izatera.
