14. Matinéea: Bost metalak

Bost Metalak taldeak amerikar estiloko metal boskote bat proposatzen du Miramongo Matinée honetarako, hau da, tubaren ordez tronboi baxua duena, eta horrek boskote klasikoari sonoritate bereizgarria eta desberdina ematen dio.

Bidaia bat egingo dugu mundu osoan ezagunak diren musika-zentroetan barrena, musika-estilo ezberdinak bisitatuz. Tartean, New Yorkera joango gara, Eric Ewazen musikagilearekin. Bere A Philharmonic Fanfarre interpretatuko du taldeak, New Yorkeko Filarmonikako kideek Kenneth Campbelli eskaintzeko enkargatutako trioa. Konpositore beraren eskutik entzungo dugu Colchester Fantasy, Erdi Aroan eta zaldunen garaian kokatutako herri ingeles zahar eta pintoresko honi buruzko obra. Mugimendu bakoitza konpositoreak inspirazioa aurkitu zuen pubaren izenari eskainita dago.

Ondoren, 1922ko Parisera joango gara Francis Poulenc-en Sonata entzuteko. Lan honekin garai hartako musika frantsesaren sonoritatean murgilduko gara, tinbre eta kolore ugarirekin.

Bidaia XX. mendearen bigarren erdiko Buenos Aires alai, sentsual eta dibertigarrian amaituko da, garaiko musikari handienetako batekin, Astor Piazzollarekin. María de Buenos Aires opera-tangoaren moldaketa honetan lau abesti ezagunenak entzungo dira. Eta amaiera gisa, Piazzollaren tangorik ospetsuena dator, Oblivion, New Yorkeko egonaldi batean konposatu zuena ahanzturaren irudia musikalki gogora ekartzeko xedearekin.