‘Abestu Euskadiko Orkestrarekin’ ekimenaren bigarren edizioak 132 ahotsak baditu dagoeneko

Azaroaren 10ean ireki zen Abestu Euskadiko Orkestrarekin proiektuaren bigarren edizioan izena emateko epea. Proiektu horretan, abeslari ez-profesionalek Euskadiko Orkestrarekin hiru eszenatoki handitan (Baluarte, Euskalduna eta Kursaal) abesteko aukera dute. 132 ahots bilatzen ziren, baldintza bakarra izanik gutxieneko musika-prestakuntza izatea eta partiturak irakurtzen jakitea. Izen-ematearen amaieran, abenduaren 4an, 600 pertsona baino gehiago zeuden izena emanda, ekimenaren hasierako edizioan baino %20 gehiago.

Parte hartu nahi dutenen artean, edizio honek hobetu egin du jatorrizko lurraldeen eta adin-tarteen arteko oreka. Izena eman duten pertsonen %55 Gipuzkoakoak dira eta %45 gainerako probintzietakoak (%26 Bizkaikoak, %10 Arabakoak, %7 Nafarroakoak eta %2 beste leku batzuetakoak). Beste probintzien kopuru hori nabarmen igo da aurreko urtearekin alderatuta. Adinari dagokionez, %15ek 18 eta 39 urte bitartean ditu, %37k 40 eta 57 urte bitartean eta %48k 58 urte baino gehiago. Adin-tarte gazteenen parte-hartzeak nabarmen egin du gora.

Zozketa

Izena emandako 600 ahots horietatik 132 aukeratu ahal izateko, atzo, abenduak 15, zozketa publikoa egin zen Miramonen, eta emaitzak dagoeneko ikusgai daude hemen.

Zozketan 34 soprano, 32 kontralto, 32 tenor eta 34 baxu aukeratu ziren (zein ahots-taldetakoak ziren argi ez zuten pertsonek aurrez aurreko proba bat egin ahal izan zuten zozketaren aurreko egunetan). Gainera, adin-tarte eta jatorri desberdinen presentzia ahalik eta gehien orekatu nahi izan da, eta horretarako taldez taldekako zozketa egin zen, ahots mota, lurralde eta adin-taldearen arabera, alegia.

Hautatutako 132 ahotsak 66 ahotseko bi abesbatzatan banatu dira, A abesbatza eta B abesbatza izenekoak, kontzertu sinfonikoetan antolaketa, logistika eta banaketa errazteko. A abesbatza Gipuzkoa eta Nafarroako ahotsez osatuta dago, eta Baluarteko kontzertuan eta Kursaaleko lehenengoan parte hartuko du. B abesbatza Bizkaiko eta Arabako ahotsek osatzen dute, eta Euskaldunako kontzertuan eta Kursaaleko bigarrenean parte hartuko du.

Entsegu-plana
 

Abesbatza bakoitzak hamar entseguren plan espezifikoa izango du, baina horietako lau entsegu partekatuak izango dira bi taldeentzat. Entsegu gehienak Miramonen egingo dira, urtarrilaren 14tik martxoaren 12ra bitartean. Aurten, berrikuntza gisa, bigarren, hirugarren eta laugarren entseguak Bilboko Juan Crisostomo de Arriaga Kontserbatorioan errepikatuko dira, Bizkaitik eta Arabatik datozenei sarbidea errazteko. Entsegu-egutegi osoa hemen kontsulta daiteke. Lehen entsegua baino lehen, ahots- eta piano-partiturak jarriko dira parte-hartzaileen eskura.

Kontzertu sinfonikoak

Proiektua Denboraldi Sinfonikoaren barruan ikusaraziko da, Schumann / Respighi izeneko zortzigarren programa sinfonikoaren baitan eta Riccardo Frizzaren zuzendaritzapean. Kontzertuak honako egunetan izango dira: martxoaren 13an Iruñeko Baluarte Auditoriumean, martxoaren 14an Bilboko Euskalduna Jauregian, eta martxoaren 16 eta 18an Donostiako Kursaal Auditoriumean.

Errepertorio berria hiru lanek osatuko dute: Sorozabalen Euskalerria; Bizeten Carmen operako ‘Martxa eta abesbatza’; eta abeslariek datozen egunetan aukeratuko duten hirugarren lan bat. Horren guztiaren interpretazioak (abesbatza misto eta orkestrarako) kontzertuen 10 eta 15 minutu artean hartuko ditu. Herritarren abesbatzari laguntzeko, Gorka Miranda arituko da zuzendari eta Easo Abesbatzako 40 kide ere izango dira entsegu batzuetan zein eszenatokian.

Lehenengo edizioaren bideo eta argazkiak

ARTIS+, artea gizarteratzeko

Ekimen hau ARTIS+, artea gizarteratzeko proiektuaren baitan sartzen da. Euskadiko Orkestrak 2027ra arte parte hartuko du mugaz gaindiko lankidetza sustatzen duen Europako proiektu honetan, beste hainbat bazkiderekin batera, tartean, Orchestre National du Capitole de Toulouse, L’Auditori eta Bartzelonako OBC Orkestra, eta Pauko Orkestra.

Jarduera hau ARTIS+ proiektuaren parte da, eta proiektu hau Europako Batasunak finantzatzen du %65ean Interreg VI-A Espainia-Frantzia-Andorra (POCTEFA 2021-2027) programaren bidez

Informazio gehiago