Bekak eta irakasle berriak Musikene eta Euskadiko Orkestraren Masterrean

Euskal Herria goi mailako musika hezkuntzaren buruan jarri da Musikene eta Euskadiko Orkestra Sinfonikoak abian jarritako Master berritzaileari esker. Estatuan ezaugarri horietako lehenengoa izateaz gain, eta Hezkuntza, Kultura eta Kiroletarako Ministerioak homologatutako bakarra orkestra ikasketatan, bi beka izango ditu AIE (Artistas, Intérpretes o Ejecutantes) erakundearen Laguntza eta Kulturarako Fondorako Batzordearen eskutik, sarrera probetan maila hoberena erakusten duten bi ikasleentzat. Bakoitzak 1.500 euro jasoko ditu. Ikasle guztiek, halaber, 1.400 euro jasoko dituzte Euskadiko Orkestra Sinfonikoan egingo dituzten praktiken truke, ikasketa planaren barruan aurre ikusiak.

Europako hari interpretari eta irakasle onenek konfirmatu dute parte hartzea irakasle gonbidatu moduan. London Symphony Orchestrako kontzertino den Gordan Nikolic biolin jotzailea kontzertino-zuzendari modura izango dugu hari orkestra proiektu baten buru. Berarekin batera izango ditugu halaber beste artista handi batzuk: Mariana Sirbu biolin jotzaile errumaniarra eta Frithjof Grabner kontrabaxu jotzaile alemaniarra, biak irakasle Leipzig hiriko Hochschule für Musik und Theater "Felix Mendelssohn Bartholdy" ikastegian; Annemarie Moorcroft biola jotzailea, Berlingo Hans Eisler School of Music-en eta North Rhine-Westphalia-ko Centre for Orchestral Studies erakundeetan irakasle; azkenik Raphaël Pidoux biolontxelo jotzailea, Parisko Goi Mailako Musika Kontserbatorio Nazionalean irakasle. Beraiekin batera arituko dira, kontzertuetan ibilbide oparokoak guztiak, Musikene Estatuko musika-hezkuntza ikastegi nagusietakoa egin duten irakasleak, Euskadiko Orkestra Sinfonikoaren musikari entzutetsuez gain.

Masterrak, hari instrumentu jotzaileentzat Orkestra Ikasketetan ofiziala den bakarra Estatuan, heziketa espezializatua ematen du orkestra baten lan-esparruan sartzeko. Prezioa 6.720 eurokoa da, baina ikasle guztiek 1.400 euro jasoko dute Euskadiko Sinfonikoan egiten dituzten kanpo-praktikengatik. Ikasketa Planak 60 ECTS ditu, horietatik 30 derrigorrezko materiak, 4 hautazkoak eta beste 20ak aipatu praktikak EOSan.

Izen-ematea zabalik egongo da ekainaren 1arte, sarrera probak ekainaren 15 eta17a bitartean egingo dira, eta matrikulazioa berriz, online, uztailean.

Informazio gehiago