"Eresoinka", Garikoitz Mendizabal eta Marta Zabaleta/Miguel Borges Coelho duoa: Euskadiko Orkestraren hurrengo kontzertuen argudio nagusiak
La Biennale di Venezia jaialdian izandako esku-hartze gogoangarriaren ondoren Euskadiko Orkestra Sinfonikoak bere Abonu Denboraldiari heldu dio berriz ere; Donostian izango den lehenbiziko Abonu-programa izango da eta bigarrena Gasteiz, Bilbo eta Iruñearen kasuan.
Asko dira eszenatokian, eta baita eszenatokitik kanpo ere, bilduko diren argudioak. Programa hau Eresoinkari omenaldia izango da, erbestean garatu zen euskal kulturaren enbaxada hau desegin zenetik 75 urte betetzen diren honetan. Hori dela-eta, Euskadiko Orkestrak "Eresoinka", txistu bakarlari eta orkestra sinfonikorako obra eskatu zion Isabel Urrutia musikagile algortarrari. SGAE Fundazioaren eta AEOSen laguntza izan duen obra honek Garikoitz Mendizabal izango du bakarlari eta Euskadiko Orkestraren lehenbiziko zuzendari Enrique Jordá eta Jordá bera lankide izan zuen euskal foklore-taldea omentzen ditu. Honi loturik, eta Bilboko kontzerturako, Bilboko Arte Ederren Museoarekin lankidetza berri bati esker, Antonio Guezalaren mihise gaineko bi olio-lan izango dira ikusgai. Margolari hau Eresoinkaren eszenografia, dekoratu eta jantziak diseinatzeaz arduratu zen. Bi margolanak, 1939 sortuak eta parea osatzen dutenak, taldearen muntaketa lanak dituzte mintzagai; Eresoinka 20h45 eta Eresoinka 8h45 izenburupean, lanen garapena islatzen dute, 12 orduko tartearekin.
"Eresoinka"ren estreinaldiaren ondoren, Orkestrak Marta Zabaleta eta Miguel Borges Coelhok osaturiko piano-duoari egingo dio bide, W.A. Mozarten Bi piano eta orkestrarako kontzertua interpretatzeko. Marta Zabaletak eta Miguel Borges Coelhok ikasle garaian elkar ezagutu eta ordutik duo moduan jarduten dute. Bakarlari ospetsu hauek Mozarten Bi pianorako eta orkestrarako kontzertua, K.365 obra eskainiko dute, Salzburgoko musikariak 1776. urte inguruan idatzitako galdera eta erantzun musikalen jolas bizia. Azkenik, 15 urtetan Welsh National Operako zuzendari eta Orkestraren lankide sarria den Carlo Rizzik Brahmsen 1. Sinfonia do minorrean zuzenduko du. Lan honi esker, konpositorea garaiko sinfoniagile onenetako bat bilakatu zen.
Kontzertuak eta Sarrerak Urtarrila
