Ganbera-musika eta dantza garaikidea uztartzen dituen ikuskizuna larunbat honetako Miramongo Matinéean
ARAH taldea, gehienbat Euskadiko Orkestrako musikariez eta hainbat dantzariz osatua, aurtengo lehen Matinéeko protagonista izango da, ‘Bazen Behin’ ikuskizunarekin. Emanaldiak ganbera-musika eta dantza garaikidea uztartzen ditu, euskal musika herrikoia abangoardiara ekartzeko ahaleginean.
Ikuskizun hau bihar, larunbata, urtarrilak 15, 11:00etan, eskainiko dute Miramonen. Azken orduko ordezkapen gisa sortu da, Euskadiko Orkestra Quartet baitzen hasiera batean hitzordu hau eskaini behar zuen taldea, baina kide batek Covid-en positibo eman duelako ezin izango du Matinée hau eskaini.
Denboraldi honetako Miramongo Matinéeen zazpigarren hitzordua, Gabonetako etenaldiaren ondorengo urteko lehena, larunbat honetan izango da, urtarrilak 15, 11:00etan, orkestraren egoitzan, eta ARAH taldea izango du protagonista. Ganbera-musikariak eta dantzariak biltzen dituen talde honek Bazen Behin izeneko ikuskizuna eskainiko du, Garazi Zabaleta konpositore eta pianistak idatzi eta/edo moldatutako obrekin. Zabaleta bera Miramongo Matinée honetan pianoaren buru jarriko da eta ikuskizun honen sorkuntza-prozesua eta obrak azalduko ditu.
Zabaletak Euskadiko Orkestrako kide diren musikariek osatzen duten ganbera-boskotea izango du alboan: Sara Zufiaurre (klarinetea eta klarinete baxua), Gabriel Mesado (biolontxeloa), Delphine Dupuy (biola), Raquel Cortinas (bigarren biolina) eta Larraitz Oiartzabal (lehen biolina). Euskadiko Orkestrako perkusiojole Igor Arostegik, Arantxa Gastesi pianistak eta Garazi Etxaburu eta Miren Lizeaga dantzariek ere parte hartuko dute ikuskizunean.
Emanaldi honek euskal tradizioa abangoardiara ekartzeaz gain obra berriak aurkeztea du helburu, eta sorkuntza-prozesua aldarrikatzea. Hein handi batean, euskal kultura josi duten musika-obren moldaketan oinarritzen da ikuskizuna. Tradizioaren elementuak abiapuntu hartzen ditu eta dantza garaikidearekin eta perkusioarekin fusionatzen.
‘Bazen behin’ tituluak oso antzinako iragana gogora ekartzeko haurtzaroko ipuinetan erabili izan den esamolde herrikoiari erantzuten dio. Horrela, ARAHren ideia kultur tradiziotik abiatuta fikzio bat sortzea da; orainetik abiatu eta entzuleak bere soinu-paisaien mugetarainoko bidaia moduko bat izango da, norberaren memoria adierazlearen, oroitzapenen, bidez. Kontua da, beraz, herri-kantak gehiago arakatzea, nolabaiteko berrikuntzaz bustitzea, eta sustraiak begirunez tratatzea.
Hasiera batean, Miramongo Matinée hau Euskadiko Orkestra Quartetek eskaini behar zuen, baina kideetako batek positibo eman du Covid-19n eta, ondorioz, azken orduko ordezkapena bilatu behar izan da.
Pandemiaren ondorioz edukiera-murrizketak daudenez, ez da Matinée honetarako sarreren salmentarik izango.
Miramongo Matinéetara eroso joateko, Euskadiko Orkestrak doako autobus-zerbitzua eskainiko dio kontzertua ikustera doazen abonatuei. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.
Miramongo Matinéeek Kutxa Fundazioaren babesa dute sortu zirenetik.
Kontzertuak eta Sarrerak Maiatza
