Orchestre de Pau Pays de Béarn, Miramongo Matinéek berean hartuko duten lehenbiziko orkestra gonbidatua

Abenduaren 3 larunbatean, Miramongo Matinéek orkestra gonbidatu bat hartuko dute berean: Orchestre de Pau Pays de Béarn. Bere zuzendari titular Faiçal Karouiren gidaritzapean eta Hildegarde Fesneau biolinista bakarlari gonbidatu duela aurkeztuko da Euskadiko Orkestra Sinfonikoaren egoitzan. Donostia 2016ren "Elkarrizketak" ildoaren baitako kontzertu hau aurrerapauso bat da Miramongo Matinéen historian, zikloa gure lurraldetik kanpoko orkestrei irekitzen baitzaie horrela. Entzungai izango dira M. Ravelen Pavane pour une infante défunte, J. Sibeliusen Biolin eta orkestrarako kontzertua re minorrean, opus 47 eta F. Mendelssohnen 4. Sinfonia la maiorrean, opus 90, "Italiarra".

2002an sortu zenetik, Orchestre de Pau Pays de Béarn (OPPB) orkestrak proiektu kultural zein artistiko handinahia garatzea du helburu. Zuzendari titular Fayçal Karouik eskakizun artistiko handiko programak sustatzen ditu, sona handiko bakarlariak nahiz artista gazteak lankide direla. Musika klasikoa gertukoa duten entzuleak erakartzeaz gain, OPPBren jarduerek helburu dute kultur zirkuituetatik at geratzen den publikoa. Nazioarteko jaialdietan aritu ohi da orkestra, esaterako Radio France-n Festival Présences, Nantes zein Tokyoko Folle Journée edo La Roque d'Anthéron. Gainera, birak egin ditu Espainia, Maroko, Japonia, Brasil eta Tunisian barrena. Informazio gehiago www.oppb.fr webgunean.

Hildegarde Fesneau saritua izan zen 2014ko Long-Thibaud-Crespin lehiaketan, 19 urte zituela. Ordutik Parisko Pleyel eta Gaveau areto ospetsuetan eta hainbat jaialditan jo du. Londresko Royal Albert Hall delakoan debuta egin ostean, "Talentu Gaztea" izendatu zuen Diapason aldizkariak. Besteak beste, Lorin Maazel edo Seiji Ozawaren zuzendaritzapean aritu da. Tommaso Balestrierik 1756an egindako biolin bat darabil, Zilber-Vatelot-Rampal Association delakoak utzitakoa. Informazio gehiago www.hildegardeviolon.com webgunean.

Miramonera autobusez. Euskadiko Orkestrak Matinéetako publikoaren esku doan jartzen duen autobus zerbitzua da Miramongo egoitzara heltzeko biderik erraz eta erosoena. 10:25etan abiatzen da Gipuzkoa Plaza 4tik eta geldialdiak egiten ditu Antso Jakituna 18 eta Madrilgo Hiribideko 34ean.