Oroitzapen eztia: XVI. mendeari begira, musika instrumentala eta ahotsa uztartuz

Urtarrilaren 30 larunbatean, Ensemble Diatessaron taldeak XVI. mendeko espainiar zein italiar doinuak ekarriko ditu Euskadiko Orkestraren egoitzako eszenatokira. Antzinako musika jatorrizko instrumentuak erabiliz jotzen adituak, lau konpositore aukeratu dituzte espainiar Errenazimenduari eta Barrokoaren hastapenei so egiteko: Antonio de Cabezón, Carlos I eta Felipe II.aren gortean nabarmen; Girolamo Frescobaldi, bere ondorengo beste askoren pizgarri, Bach horien artean; Claudio Monteverdi, operaren aitzindari eta Errenazimendutik Barrokora igarotzean ezinbesteko; eta kontzertuari izenburua ematen dio lanaren egile Diego Ortiz.

Ensemble Diatessaron. Euskadiko Orkestrako biola Elena Martínez de Murguía eta Juan Vegak 2000. urtean sortutako talde honek honela aurkezten du bere burua: "Jatorrizko instrumentuak erabiliz antzinako musika jotzen espezializatutako taldea gara. Ahaztutako edo ia ezezaguna den errepertorioa berreskuratzeak erakartzen gaitu bereziki. Musika mendeak eta mugak gainditzen dituen lengoaia unibertsala da eta giza-arimaren sakonera heltzen da. Idatzitako musikaren, interpretearen eta entzulearen artean barreiatzen den energia helaraztea dugu helburu, atsegin eman eta hunkitzea, alegia". Burutzen dituzten egitasmoak oso anitzak dira eta taldearen organikoa hauen beharretara egokitzen da.

"Oroitzapen eztia" izenburu duen kontzertu eskainiko duten musikariak dira: Maite Arruabarrena mezzosopranoa, Rafael Bonavita (teorba eta vihuela), eta Euskadiko Orkestrako kide Oscar Abella (serpentoia), Javier Azanza (perkusioa) eta Elena Martínez de Murguía (viola da gamba eta zuzendaritza).