12. Matinéea: Vocalia Taldea

2000 urtean sortu zen Vocalia Taldea  emakume abesbatza, gaur egungo zuzendari  Basilio Astulezen ekimenez. Vocalia Taldeak bidea ematen die Euskal Herriko zenbait emakume musikari profesionalen erronka eta kezkei. Programazio ausartari eta eszenaratze zainduei esker, taldea erreferente bihurtu da gaur egungo musika  koralaren esparruan.

Miramongo Matinée honetan, Vocalia Taldeak emakumeen koru eta organorako hiru obra erlijioso zoragarri bildu ditu. Hiru piezak eliza edo katedral jakin baterako pentsatuak izan ziren edo, bestela, egileei eragin zien inpaktuaren ondorioz sortu ziren.

Mendelssohnek Drei Motetten bilduma Erromako Trinitá dei Monti eliza bisitatu ondoren konposatu zuen, zerbitzu erlijiosoa ospatzen ari ziren klausurako lekaimeen kantua entzun ondoren biziki hunkiturik. Bestalde, Poulenc-ek Litanies à la Vierge Noire, bere lehen lan sakroa, Rocamadourreko Notre Damen kaperan sartzeak sortu zion zirrara bortitzaren ondorioz idatzi zuen. Eta, amaitzeko, Arnesenek Magnificat lana Nidarosko katedralean interpretatzeko pentsatu zuen. Katedral gotiko borealena den eta Norvegiako monumentu historiko garrantzitsuenetakotzat jotzen den eraikin honek kultur ikono estatusa lortu du.

Oscar Rodriguez Pastora organista gaztearen eta Nerea Gonzalez soprano bizkaitarraren laguntzarekin, Vocalia Taldeak musika erlijiosoan eta bere espazioetan barrena bidaia batean eramateko proposamen musikal berri eta iradokitzaile hau sortu du.