15. Matinéea: Tango berria

Miramongo Matinéeak Denboraldiko azkenaurreko hitzordu honetan Astor Piazzollaren unibertsoan murgilduko dira. XX. mendeko tangoaren funtsezko figura izan zen Piazzolla, eta betiko irauli zuen Argentinako genero ezin ezagunago hau lengoaia musikal berritzaile baten bidez. Buenos Airesen sustraitutako musika izanik ere, jazzari eta musika klasikoari zabalik egon zen beti, eta gaur egun ere bere horretan mantentzen ditu adierazkortasun indartsua eta iradokitzeko gaitasuna.

Programak Piazzollaren obra ezagunenetako batzuk biltzen ditu, Philippe de Ezkurra interprete eta piazzollazale adituak egindako moldaketetan. Bandoneoijole, akordeoilari eta moldatzaile gisa, De Ezkurrak ñabarduraz eta energiaz beteriko ganbera-irakurketa proposatzen du hemen, Euskadiko Orkestrako interpreteekin elkarrizketan.

Kontzertu osoan zehar Piazzollaren mundu emozionalaren hainbat aurpegi agertzen dira: Oblivion eta Milonga del ángel obren malenkonia eta lirismoa; Escualo eta Libertango piezen indar erritmiko eta birtuosistikoa; Fuga y misterio obraren intentsitate dramatikoa; edo Adiós Nonino lanaren hunkigarritasun intimoa, bere aitari eskainitako omenaldi samurra. Entzungo ditugu, halaber, Buenos Aireseko bizimoduaren musika-erretratu diren Estaciones porteñas ospetsuen pasarteak, baita Michelangelo 70 edo Fugata bezalako obrak ere, non konpositoreak tangoa soinu-lurralde berrietara eramaten duen.

Piazzollaren sormen-arnas handiaren eta haren musikaren indar unibertsalaren ospakizuna da kontzertu hau.