3. Matinéea: BOSEO Percussion Group

Denboraldiko hirugarren Miramongo Matinée honetan ganbera-proposamen berezi bat aurkezten dugu, Bilbao Orkestra Sinfonikoaren eta Euskadiko Orkestraren tinbal eta perkusio sailen arteko lankidetzaren emaitza. Indarrak batzeari esker, talde honek errepertorio askoz zabalagoa landu ahal izango du interpreteen kopuruari dagokionez, oso gutxitan izaten baita hain multzo ugariarentzat sortutako obrak interpretatzeko aukera.

Ekimen honek bi orkestretako kideen arteko senidetasuna, laguntasuna eta konfiantza sustatzen ditu, harremanak estutzeko eta atal bakoitzak duen esperientzia eta ezagutza partekatzeko.

Programak soinu-ibilbide zabala eskainiko du: folklore-inspirazioko konposizioetatik hasi eta ganbera-musika “perkusiboari” aplikatutako teknologia berriak dituzten lanetaraino. Pieza bat ikusi ere egin ahal izango da, non ez den inolako instrumenturik erabiliko, baizik eta gorputzaren mugimendua bakarrik, adierazpen-bide gisa.

Era berean, nazioartean ospe handia duten musikagileen lanak interpretatuko dira: Txaikovski, Intxaur-hauskailuaren suitearen moldaketa delikatuarekin; Christopher Rouse estatubatuarra, Karibeko soinuetara garamatzan kinteto batekin; eta Steve Reich, Music for Pieces of Wood lan enblematikoarekin, kultura guztietan dagoen jatorrizko perkusio-instrumentuan oinarritzen dena: zurezko piezak.