3. Matinéea: Josu Okiñena

Josu Okiñena:

Matinée honen errepertorioaren hautaketak euskal musika klasikoa eta nazioarteko errepertorioa eskaintzearen konpromisoari erantzuten dio. Horregatik, batetik, Euskal Herriko XX. eta XXI. mendeetako konposizio esanguratsuenetako batzuk aukeratu ditut. Eta, bestetik, gaurko kontzertuak Franz Liszt handiaren XIX. mende amaierako konposizio batzuk ere hartuko ditu barne, nire ustez XX. mendeko lengoaia konpositiboaren aurrekari diren obrak.

Alde batetik, errepertorioa Aldave, Aita Donostia, Garbizu eta Erkoreka bezalako konpositoreetan zentratu dut. Aipatu nahiko nuke azaroaren 27an hogeita hamar urte betetzen direla Garbizu hil zenetik eta horregatik beharrezkoa iruditu zait programatzea.

Horrez gain, uste dut musika garaikideak, gaur egun ekoizten denak, ere presente egon behar duela. Hori dela eta, programatutako obretako bat nire iritziz gaur egungo euskal musikagile onenarena izango da: Gabriel Erkoreka. ‘Hodeiak’ obra aukeratu dut. Zergatik? Bada, uste dudalako pianistikoki obra paregabea dela, kalitate estetiko eta musikal handikoa. Eta, gainera, hodeiekin lotutako beste obra batekin lotura egiteko baliatu baitut: Franz Liszt handiaren ‘Hodei tristeak’. Matinéeko gainontzeko obrak Lisztenak izango dira, guztiak bere bizitzako azken fasean konposatutakoak.