5. Matinéea: Entsegu orokor irekia

Luxuzko salbuespena daukagu Miramongo Matinéeen ohiko formatu txikiko ganbera-kontzertuetan: Euskadiko Orkestra Sinfonikoak abendu hasieran Austria eta Alemaniara egingo duen birako programaren zati bat aurkeztuko du bertako publikoaren aurrean.

Nazioarteko erronka artistiko garrantzitsua da bira hau Orkestrarentzat. Robert Treviño titularraren zuzendaritzapean, hiru kontzertu eskainiko ditu Europako erdiguneko sona handiko hiru aretotan, zeintzuek tradizio musikal handia eta publiko zorrotza duten: abenduaren 4an Linzen (Austria), 6an Munichen (Alemania) eta 8an Bregenzen (Austria).

Mahler, Mozart eta Elgarrekin batera, Orkestrak Aita Donostiaren eta Pablo Sorozabalen euskal obrak aurkeztuko ditu Mojca Erdmann sopranoak eta Vadim Gluzman biolinjoleak lagunduta.

Biraren programaren zati baten entsegu orokor ireki forma hartuko duen abenduaren 1eko Matinéea Gustav Mahlerren 4. Sinfonia handiarekin hasiko da, musikagile alemaniarraren famatuenetako bat.

Azken urteotan, Treviño Mahlerren interpretazioan espezialista handia bilakatu da, eta aintzatespen nabarmena eskuratu du nazioartean arrazoi horregatik. Orain dela gutxi entzun eta gozatu ahal izan da bere Mahlerren aparteko interpretazioa Londreseko Orkestra Sinfonikoarekin, Londreseko Filarmonikoarekin eta Zuricheko Tonhallerekin eman dituen kontzertuetan. Mojca Erdmann soprano alemaniarra, Deutsche Grammophon disko-etxe prestigioduneko artista, Orkestrarekin batera arituko da bakarlari lanetan Mahlerren sinfonia honetan. Hain zuzen ere, paper hori egiteko eskaintza ugari jaso ditu munduko orkestra askorengandik.

Wolfgang Amadeus Mozarten, itzal handiko konpositore alemaniar oparoaren, soprano-aria eta eliza-sonata sorta batekin amaituko da hitzordu berezi hau.