Dutilleux + Elgar / Catalán

Elkano: Mundubira musika bidelagun proiektua beste portu batera heldu da, munduan barna egiten ari den ibilbide musikaleko azken-aurrekora, eta, hala, Teresa Catalan egilearen La Victoria Vacía estreinatuko da, SGAE Fundazioaren eta AEOSen babesa daukan obra. Duela egun batzuk Humanitateak, Kultura, Arteak eta Gizarte Zientzien Saria eman zion Eusko Ikaskuntzak Catalani. Haren ondotik etorriko da Asier Polo biolontxelista, eta 21 urte zituela orkestran hasi zeneko obra eta ordutik beti bidelagun izan duena interpretatuko du: Elgarren Biolontxelorako kontzertua. Errepertorio britainiarreko kontzerturik ezagunenetako bat dugu, intentsitate emozional handikoa, lirismo gartsua eta intimismo ia mistikoa uztartzen dituela. Ekitaldia amaitzeko, Robert Treviñok XX. mendeko bigarren zatiko sinfonia frantses ezagun bat zuzenduko du: Henri Dutilleuxen 1. Sinfonia. Lan horrek egileari ospea eman zion nazioartean, eta haren bidez hasi zen tinbre-fintasun paregabeko bere soinu-unibertso berezia taxutzen.