Euskadiko Orkestrak ‘Americascapes’ aurkezten du, Robert Treviñoren zuzendaritzapean eta Ondine diskoetxearekin egindako bigarren grabazioa
Ondine diskoetxearen (Naxos Taldea) 'Americascapes' diskoaren nazioarteko argitalpenari ekin zaio aste honetan. Robert Treviñoren zuzendaritzapean, erregistro diskografiko berri honek oso ezagunak ez diren lau egile amerikar ditu ardatz —Loeffler, Ruggles, Hanson eta Cowell— eta urriaren 1etik aurrera egongo da salgai.
Serie honetako lehen grabazioak Maurice Ravelen obra sinfonikoak hartu zituen barne eta nazioarteko hedabide espezializatuetan harrera bikaina izaten ari da.
Americascapes grabazioko lau konpositore amerikarrek ospe handiko musika idatzi zuten, baina horietako batek ere ez zuen ‘arrakasta’ handi bat izan, Bernstein, Gershwin edo Coplandek bezala. Gutxi ezagutzen diren lanak dira, zirkuitu handietatik urruntzen den errepertorioa, eta Euskadiko Orkestrak Robert Treviño titular estatubatuarraren agindupean grabatu ditu.
Adituek diotenez, Charles Martin Loeffler, Henry Cowell, Carl Ruggles eta Howard Hanson egileen musika album berean aurkitzea oso ezohikoa bada ere, Treviñok egokitzat jo du errepertorio berri hau biltzea. Bere esplorazioa oso urrutira eraman du eta Hansonen pieza bat aurkitu du, Before the Dawn, mende bat itxaron behar izan duena bere errekonozimendu eta lehen mundu mailako grabaziorako. Aipatzekoa da, baita ere, Charles Martin Loefflerren La Mort de Tintagiles obran viola d’amore instrumentuak duen bakarlari-papera, Delphine Dupuy orkestrako solistak bere gain hartu duena.
Robert Treviño: “Proiektu zoragarria da hau”
Treviñoren hitzetan: "Proiektu zoragarria da hau. Denbora asko behar izan genuen lau lan egokiak aukeratzeko. Musika estatubatuarraren kalitate bikaineko erreferentzia-puntuak aurkitu nahi nituen, Loefflerren tapiz epikotik eta Rugglesen distiratik hasi eta Hansonen aurkikuntza zoragarri edo Cowellen asmakuntza txundigarrietaraino. Eta beti konpositore estatubatuarrek Europatik jaso duten eraginari buruz hitz egiteko joera dugun bitartean, kontrako norabidean Atlantikotik haratago eragina izan duten lau figura estatubatuar ditugu hemen. Eta lan horietako bakoitzean sorkuntza- eta berrikuntza-zentzu hori entzun dezakezu. Zalantzarik gabe, lau pieza hauek benetan ederrak dira, eta belarri gehiagotara iritsi beharko lukete".
Grabatutako obrak:
- La Mort de Tintagiles (Charles Martin Loeffler). Solista: Delphine Dupuy.
- Evocations (Carl Ruggles).
- Before the Dawn (Howard Hanson). Lehen grabazioa mundu mailan.
- Orkestrarako bariazioak (Henry Cowell).
Non eskuratu diskoa urriaren 1etik aurrera
Diskoa Spotify, Apple Music, iTunes eta antzerako beste plataforma digital nagusietan egongo da eskuragai urriaren 1etik aurrera.
Bestalde, ale fisikoak ere jarri dira salgai merkataritza-establezimendu ugaritan.
Ondine
Ondine Finlandiako diskoetxea da, eta datozen urteetarako grabazio-akordioa du Treviñok. Naxos taldearen parte den zigilu hau munduko diskoetxe independente prestigiotsuenetakoa da eta sarri egin ditu grabazioak Christoph Eschenbach, Vladimir Ashkenazy, Esa-Pekka Salonen eta Hannu Lintu bezalako zuzendari garrantzitsuekin. “Ondinek soinez soin lan egiteko aukera eskaintzen duten artistak baino ez ditu hautatzen”, dio diskoetxearen zuzendari fundatzaile Reijo Kiilunen-ek, “Artista gutxi batzuk bakarrik aukeratzen ditugu, ohiko errepertorioaren interpretazio ameslari eta irudimentsuak egiteko gaitasuna dutenak, baita obra musikal ezezagunagoak publiko aurrean ezagutzera emateko gogamen abenturazalea dutenak ere”.
Americascapesekin batera doan liburuxkak Pulitzer saria irabazi zuen Tim Page kazetariaren saiakera bat eta Treviñoren ohar pertsonal bat biltzen ditu.
‘Ravel’ diskoaren harrera bikaina
Euskadiko Orkestrak eta Robert Treviñok Ondinerako egindako aurreko diskoari harrera ona egin dio nazioarteko kritikak. Radio France, ABC Classic FM, Record Geijutsu eta Limelight bezalako argitalpen eta hedabideetan 'Asteko disko nabarmena' bezalako erreferentziak daude, baita kritika bikainak ere Gramophone, BBC Music Magazine eta beste argitalpen entzutetsu askotan. Duela gutxi, Classica Frantziako aldizkari nagusiaren hilabete honetako edizioak bost izarrekin saritu du albuma eta honako hau dio: "Treviño, 37 urterekin, goranzko bidean dagoen izar bat bezala aurkezten da. Ravelen hautaketa hau konpositore ziburutarraren espezialista handien ondoan koka daiteke. Euskadiko Orkestra kalitate handikoa da, tonu sendo baina finarekin, eta ezin hobeto sintonizatuta dauden musikariekin".
