Euskadiko Orkestraren Miramongo egoitzan aurkeztu da Euskal Konpositoreen Bildumaren barnean Pedro Sanjuáni eskainitako diska. Komunikabideen aurrean mintzatu dira Orkestraren zuzendari nagusia, Iñigo Alberdi, zuzendari titularra, Andrés Orozco-Estrada eta Bildumaren babesle MONDRAGON Korporazioko Marketing zuzendari Javier Marcos. Gainera, aurkezpenerako Pedro Sanjuánen iloba Pilar Sanjuánek espreski New Yorketik igorritako oharra bat igorri du.

Euskadiko Orkestra Sinfonikoaren Euskal Konpositoreen Bildumaren balio handia bestela ezagutzeke edo fonografikoki erregistratu gabe geratuko zatekeen hondare sinfoniko aberatsa bildu izana da. Beren bizitzaren gorabeherak direla eta ia ezezagunak diren euskal konpositoreen ekoizpena ostrazismotik atera eta hauek gure herriko musikako izen klasikoekin berdinkidetasunean izatea Orkestrak 1997tik Bilduma honen garapenerako egindako esfortzuaren emaitza da. Horren eredu da orain aurkezten dugun hamalaugarren zenbakia.

"Urruneko oihartzunak" da Jorge de Persia kritiko eta ikertzaileak diskarekin batera doan liburuxkan Pedro Sanjuáni buruz egiten duen azalpen biografikoari eman dion izenburua. Izan ere, diska honek guregana Atlantikoaren beste aldetik heldu diren donostiar interprete, orkestra zuzendari eta konpositore donostiar honen lanaren oihartzunen erregistroa izan nahi du. Donostian 1886an jaioa eta Pariseko Schola Cantorum delakoan ikasle izana, Pedro Sanjuán Kuba eta Estatu Batuetan bizi izan zen bere bizitzaren zati handi bat. Estatu Batuetan hil zen 1976an.

Orkestraren titular Andrés Orozco-Estrada izan da album honen musika zuzendaria. Aurretik, 2005ean Cristian Mandeal Bildumaren baitan Aita Madinari eskainitako zenbakian zuzendari aritu zen eta 2001ean Gilbert Vargak Maurice Raveli eskainitako monografikoa zuzendu zuen, hau ere CLAVES disko etxeak argitaratua. Gauzak honela, grabaketak epe honetan zuzendari titularrek Orkestrarekin batera egindako lanaren testigantza iraunkor bilakatu dira.

Pedro Sanjuánen izena jada egun Euskal Konpositoreen Bildumaren katalogoa osatzen duten izenen artean dugu, Valentín de Zubiaurre, Beltrán Pagola, Luis de Pablo, Juan Crisóstomo de Arriaga, Aita Madina, Tomás Garbizu, Aita Donostia, Pablo Sorozábal, Francisco Escudero, Andrés Isasi, Jesús Arámbarri, José Mª Usandizaga eta Jesús Guridirekin batera.

1997an abian jarri zen Bilduma, bere osotasunean CLAVES disko etxeak argitaratutakoa, 2012an amaituko da Carmelo Bernaola bizkaitar konpositoreari eskainiko zaion diskarekin. Hamabosgarren zenbaki hau Juanjo Menak zuzenduko du. Zuzendari gasteiztarra Bernaolaren beraren dizipulu izan zen eta egun BBCren Orkestra Filarmonikoaren zuzendari titularra da.

Informazio gehiago