Parte-hartze eta asebetetzeari dagokionez aurreikusten zen guztia aise gainditu ondoren, Abestu Euskadiko Orkestrarekin itzuli da, zenbakitan hazi den bigarren edizio batekin. Alde batetik, 132 ahots nahi dira, iaz baino %10 gehiago, eta, bestetik, egutegian hitzordu berri bat gehitu da eta eszenatoki berri bat: Baluarte Auditoriuma.

Proiektua Denboraldi Sinfonikoaren barruan ikusaraziko da, Schumann / Respighi izeneko zortzigarren programa sinfonikoaren baitan eta Riccardo Frizzaren zuzendaritzapean. Kontzertuak honako egunetan izango dira: martxoaren 13an Iruñeko Baluarte Auditoriumean, martxoaren 14an Bilboko Euskalduna Jauregian, eta martxoaren 16 eta 18an Donostiako Kursaal Auditoriumean.

Proiektu hori gauzatzeko, 132 ahots anonimo eta boluntario bildu behar dira guztira (bai aurretik parte hartutakoak, bai oraindik egin ez dutenak), eta Euskadiko Orkestraren webgunean eman beharko dute izena parte hartu nahi duten herritarrek abenduaren 4rako beranduenez. Ezinbestekoa da gutxieneko musika-prestakuntza izatea eta partiturak irakurtzen jakitea. Ondoren, Miramonen urtarrilaren 14tik martxoaren 12ra bitarteko asteazkenetan antolatutako 10 entseguetako ahalik eta gehienetara joatea eskatuko da. Beste berrikuntzetako bat da lehen hiru entseguak Bilboko Juan Crisostomo de Arriaga Kontserbatorioan errepikatuko direla, Bizkaiko eta Arabako pertsonei sarrera errazteko.

Errepertorio berria hiru lanek osatuko dute: Sorozabalen Euskalerria; Bizeten Carmen operako ‘Martxa eta abesbatza’; eta abeslariek aukeratuko duten hirugarren lan bat. Horren guztiaren interpretazioak (abesbatza misto eta orkestrarako) kontzertuen 10 eta 15 minutu artean hartuko ditu, eta Easo Abesbatzako 40 kide izango dira entsegu batzuetan zein eszenatokian aukeratutako herritarren abesbatzari laguntzeko.

Euskadiko Orkestrak aparteko aukera hau baliatzera animatzen ditu herritarrak; horietako batzuentzat agian amets bat da orkestra handi baten ondoan eta eszenatoki garrantzitsuetan zuzenean abestea. Informazio guztia eta izen-emateak euskadikoorkestra.eus-en.

Ekimen hau ARTIS+, artea gizarteratzeko proiektuaren baitan sartzen da. Euskadiko Orkestrak 2027ra arte parte hartuko du mugaz gaindiko lankidetza sustatzen duen Europako proiektu honetan, beste hainbat bazkiderekin batera, tartean, Orchestre National du Capitole de Toulouse, L’Auditori eta Bartzelonako OBC Orkestra, eta Pauko Orkestra.

Parte hartzeko baldintzak

• Parte hartu ahal izateko, beharrezkoa izango da gutxieneko musika-prestakuntza izatea eta partiturak irakurtzen jakitea.
• Parte hartzeko gutxieneko baldintzak betetzen dituztenen artean zozketa egingo da. Hautatua izan ez dena itxaron-zerrendan geratuko da, bajak gertatuz gero. Izena emateak ez du parte hartzea bermatzen.
• Aurreikusitako 10 entseguetara ahalik eta gehienetara joatea eskatzen da.
• Lehen entsegua baino lehen, ahots- eta piano-partitura eta ahotsen grabazioak parte-hartzaileen eskura jarriko dira.

Datak

• Izen-ematea: azaroaren 10etik abenduaren 4ra.
• Zozketa eta hautatutako ahotsen jakinarazpena: abenduak 15.

Entsegu-plana

• 10 entseguen datak: 2026ko urtarrilaren 14tik martxoaren 12ra. Egutegi osoa hemen ikusi.
• Entsegu gehienak asteazkenetan izango dira, 19:15etik 21:45era*.
• Tokia: Euskadiko Orkestraren egoitza (Miramon Pasealekua, 124, Donostia).

*Bizkaiko eta Arabako pertsonei erraztasuna emateko, lehen entseguak ostiraletan errepikatuko dira (urtarrilak 23 eta 30, eta otsailak 6) Bilboko Juan Crisostomo de Arriaga Kontserbatorioan, ondorengo ordutegian: 17:15-19:45.

Kontzertuak

Schumann / Respighi programa sinfonikoa

Zuzendaria: Riccardo Frizza
Abesbatzaren zuzendaria: Gorka Miranda
Abesbatza laguntzailea: Easo Abesbatza

Datak:

• Iruña (Baluarte Auditoriuma): 2026ko martxoak 13
• Bilbao (Euskalduna Jauregia): 2026ko martxoak 14
• Donostia (Kursaal Auditoriuma): 2026ko martxoak 16 eta 18

Obrak:

• P. Sorozabal: Euskalerria
• G. Bizet: Carmen, ‘Martxa eta abesbatza’
• Abeslariek hautatuko duten hirugarren obra

Lehenengo edizioaren bideo eta irudiak

Jarduera hau ARTIS+ proiektuaren parte da, eta proiektu hau Europako Batasunak finantzatzen du %65ean Interreg VI-A Espainia-Frantzia-Andorra (POCTEFA 2021-2027) programaren bidez

Informazio gehiago

Euskadiko Orkestrak eta EITBk orkestraren jarduera grabatu eta zabaltzeko duten konpromisoaren baitan, katearen larunbat goizetako tartera itzuliko da orkestra, Denboraldiko kontzertuak erakusten jarraitzeko.

Emisio-bloke berriak etenik gabe jarraituko du datozen bi hilabeteetan, eta 25/26 Denboraldiko kontzertu berrienak eskainiko ditu, aurreko denboraldiko berremisioekin tartekatuta.

Honako hauek dira datozen kontzertuak (beti larunbatetan eta 11:00etan, Eguberri Egunean izan ezik, osteguna izango baita):

• Azaroak 8: (Berremisioa) Aldave / Mahler (24/25)
• Azaroak 15: (Berremisioa) Abestu Euskadiko Orkestrarekin / Glanert / Brahms (24/25)
• Azaroak 22: (Berremisioa) Schumann / Sibelius (24/25)
• Azaroak 29: (Berremisioa) Mozart / Beethoven (24/25)
• Abenduak 6: Schmidt / Say. Katharina Müllner / Camille Thomas
• Abenduak 13: (Berremisioa) Brahms / Dvorak (24/25)
• Abenduak 20: (Berremisioa) Aldave / Szymanowski (24/25)
• Abenduak 25: Berlioz / Ravel. Stefan Blunier / Miren Urbieta-Vega / Landarbaso Abesbatza
• Abenduak 27: (Berremisioa) Mozart / Schubert (24/25)
• Urtarrilak 3: (Berremisioa) Musika Gela. Boléro (22/23)

Datozen datak aurrerago emango dira ezagutzera. ETBk Euskalduna Jauregian grabatu ditu kontzertuak.

Eduki gehiago YouTube kanalean

Telebistako emisio berriak egin ahala, Euskadiko Orkestrak kontzertuetan interpretatutako obrak bere YouTubeko kanalean publikoaren eskura jartzen jarraituko du. Gaur egun, kanal honek 150 bideo baino gehiago ditu HDn, Euskadiko Orkestraren kontzertu sinfoniko onenekin, eta baita beste eduki batzuekin ere, hala nola kontzertu didaktikoak edo esparru sinfonikokoak ez diren beste euskal artista batzuekin egindako kolaborazioen bideoklipak.

Informazio gehiago

Euskadiko Orkestrak 2025/26 Denboraldi Sinfonikoaren hurrengo programa aurkezten du; kontzertuak datozen egunotan izango dira ohiko lau hiriburuetan: astelehenean, azaroak 10, Donostiako Kursaal Auditoriumean; asteartean, azaroak 11, Gasteizko Jesus Guridi Kontserbatorioan; asteazkenean, azaroak 12, Iruñeko Baluarte Auditoriumean; ostegunean, azaroak 13, berriz Kursaal Auditoriumean; eta ostiralean, azaroak 14, Bilboko Euskalduna Jauregian. Kontzertu guztiak 19:30ean izango dira.

EROSI SARRERAK HEMEN

‘Schmidt / Say’ izenburudun Denboraldiko bigarren programa honek agian horren ezagunak ez diren baina interes handia sortzen duten bi sortzaileren unibertsoan barneratuko gaitu.

Joseph Haydnen 83. Sinfoniaren klasizismo estilizatuaren ostean, Fazil Say pianojole birtuoso bikainak konpositore gisa duen alderdia ezagutuko dugu. Turkiarra bakearen eta kulturarteko elkarrizketaren defendatzaile sutsua da eta, hain zuzen ere, alderdi horri lotuta dago programa honetan aurkeztuko den obra. 2017an, Sayk Never Give Up lana idatzi zuen 2015 eta 2017 artean Europa eta Turkia astindu zituzten atentatu terroristei erantzun artistikoa emateko. «Aireportuak, kontzertu-aretoak, futbol-zelaiak, kaleak... ia egunero halakoak gertatzen zirela zirudien. Gure bizitzan benetan garai ilunak izan ziren haiek», gogorarazi du Sayk. «Nahasmendu haren erdian kontzertu hau idatzi nuenean, erresilientzia erakutsi nahi izan nuen: inoiz ez dugula amore emango eta beti mundu ederragoa eta baketsuagoa lortzeko itxaropena egongo dela». Gainera, lan honek inpaktu handiko zatiak biltzen ditu. Bigarren mugimenduan, adibidez, konpositoreak metrailadore baten soinuak sartu zituen —partituran «kalashnikov» gisa jasota daude— eta biolontxeloak Turkiako musika-tresna tradizional baten, kavalen, tinbrea imitatzen du.

Obra Camille Thomas instrumentuaren izar franko-belgikarrarentzat idatzi zen, eta kontzertu hauetan izango dugu gurekin interpretatzeko. Thomas, 2017tik Deutsche Grammophon taldeko artista esklusiboa, bere belaunaldiko interprete karismatikoenetako batean bihurtu da. Berlinen eta Weimarren Stephan Forck, Frans Helmerson eta Wolfgang-Emanuel Schmidt bezalako maisuekin hezia, nazioarteko ibilbide oparoa egin du Deutsche Kammerphilharmonie Bremen, Belgikako Orkestra Nazionala, NHK Symphony eta Washington National Symphony Orchestra bezalako orkestrekin batera, Paavo Järvi eta Kent Naganoren zuzendaritzapean, besteak beste. Thomasek “Feuermann” (1730) Stradivarius ospetsua jotzen du, Nippon Music Foundationek utzita. Azken urteotan, bereziki ezagun eta enblematiko egin da Parisko teilatuetan egin dituen bideoengatik, eta mundu osoan zehar mugitu diren irudi eder ahaztezinak utzi ditu.

Jarraian, Euskadiko Orkestra lehen aldiz barneratuko da Franz Schmidten mundu sinfonikoan. Izandako harreman politiko okerrek bere erreputazioa ilundu zuten arren, azken urteotan haren musika aldarrikatzen ari dira. XX. mendeko Brucknerren oinordeko espiritual izendatu dute. Haren 4. Sinfonia –1933an alaba Emmaren izenean sortutakoa requiem gisa eta Vienan amaitu zuena– lirismo handiko sorkuntza-lana da. Zuzendaria Katharina Müllner izango da. Vienakoa da eta Deutsche Oper am Rheineko kaperako gaur egungo maisua.

Sarreren salmenta

Kontzertu guztietarako sarrerak salgai daude, Gasteizkorako izan ezik, euskadikoorkestra.eus webgunean eta auditoriumetako leihatila eta webguneetan, 10 eurotik aurrera.

Kontzertu hauen lankidea

Informazio gehiago

Jaitsi prentsa-materiala hemen

Orkestraren programazioan aspaldidanik erabat sustraituta dagoen hezkuntza-ziklo hau herritarrei, oro har, eta gazteei, bereziki, musika gerturatzeko helburuarekin jaio zen. Azken urteotan, inoiz baino gehiago, zikloak arreta berezia eskaintzen dio gizarteko sektore zaurgarrienari. Kolektibo zaurgarrien inklusioa eta kulturarako irisgarritasuna sustatzeko helburuarekin, ekintza ugari txertatu dira Musika Gelaren ziklo berrian.

Horrela izango da 25/26 Denboraldian ere, aurten aurkeztuko diren ekoizpen propio batzuk alderdi hori modu integral eta transbertsalean txertatzeko ideiarekin sortu baitira.

‘MUSIKA TANTAK’, INKLUSIOAREN ADIERAZLE NAGUSIA

Hain zuzen ere, egunotan Miramonen ikusgai dagoen ekoizpenak (Musika tantak) bereziki bilatzen du kulturarako irisgarritasuna eta kolektibo kalteberen ikusgarritasuna. Proposamen berritzailea, aitzindaria eta ausarta da. Musika tantaken, gure orkestraren musikariek eta gaitasun desberdinak dituzten musikari gazteek eszenatokia partekatzen dute unibertso magiko bat sortuz, non talentu bakoitzak bere lekua aurkitzen duen, aniztasunak pertsona guztiak aberasten gaituela erakusteko.

Ekoizpen hau joan den denboraldian estreinatu zen Kursaalen eta orain inklusiboagoa izateko asmo bikoitzarekin itzuli da. Musika Tantak egun hauetan (urriaren 23tik 30era) Eskola Kontzertu gisa eskaintzen ari da eta Musika Gelaren adar honetan jarduera inklusibo bat txertatzen den lehen aldia da. Gipuzkoa osoko Lehen eta Bigarren Hezkuntzako 2.800 ikaslek hartuko dute parte ekoizpen horretan, inklusio sozialaren baitan beharrezkoa den ariketa batean.

Gainera, Musika Tantak ekoizpenak Musika Familian kontzertu bat du urriaren 25ean Miramonen, saio lasai gisa proposatzen dena. Formatu hori joan den denboraldian estreinatu zen eta zikloan geratzeko etorri da. Saio lasaiek elkarbizitza inklusiborako ateak irekitzen dituzte, non familia guztiek besaulki-patioa partekatzen duten, desgaitasunen bat duten kideak dituzten familiak zein halako kiderik ez dutenak. Elkarteek astegunetan antolatzen dituzten jardueretatik kanpo desgaitasunen bat duten pertsonek gehien nahi dutenarekin banaka parte har dezaten sustatzeko modu bat da, gainerako pertsonek beren portaera epaitzeko beldurrik gabe.

Beren beharretara hobeto egokitzeko asmoz, saio lasaiek ohiko kontzertu bateko errutinak baino toleranteagoak diren baldintzak betetzen dituzte, ohiko protokoloa hain zorrotz jarraitu gabe. Kontzertu-aretoko ateak irekita egongo dira saio osoan zehar, gure publikoa ekitaldi osoan zehar sartu eta irten ahal izateko, nahieran. Aretoa beti argiztatuta egongo da, ilunpean gera ez dadin, eta arreta berezia jarriko da argi distiratsurik, zarata gogorrik eta ezusteko elementu sentsorialik egon ez dadin. Ikus-entzule guztiek jarrera lasaia izango dute ikuskizunean zehar edozein zarata edo mugimenduren aurrean. Aretotik irten behar izanez gero, sarrerako hall-a espazio alternatibo bat izango da, gure publikoak atseden hartu ahal izateko eta, prest dagoenean, berriz ere ekitaldiarekin bat egin ahal izateko. Eta artistak eta langileak sentsibilizatuta egongo dira inklusio-praktika onenekin.

Nire ama antzara ekoizpenak ere saio lasai bat izango du, 2026ko otsailaren 14an Miramonen egingo den Musika Familian kontzertuan.

ZIKLOAREN PROGRAMAZIO OSOA

Lau ekoizpen propio

Urtez urte, Euskadiko Orkestrak bere ekoizpen propioak egitearen aldeko apustua egiten du, bere gizarte- eta hezkuntza-zikloaren esparruan estreinatzeko propio sortutako gidoi originalekin eta ikuskizunekin. Ziklo berriak lau ekoizpen ditu: Musika tantak, Logelan logale, Nire ama antzara eta Arriaga bizi da. Lehenengo biak joan den denboraldian aurkeztu ziren, eta inklusioari, aniztasunari, kulturarako irisgarritasunari, parte-hartzeari eta, azken batean, pertsona guztien eskubide kulturalak gauzatzeari buruzkoak dira. Nire ama antzara eta Arriaga bizi da bi ekoizpen berri dira, irudimenaren, edertasunaren eta parte-hartzearen beharra adimen artifizialarekin uztartuko dituztenak.

Lau produkzio hauek bi formatutan aurkezten dira, Eskola Kontzertuetan eta Musika Familian kontzertuetan.

Haur Hezkuntza, Lehen Hezkuntza eta Bigarren Hezkuntzako 7.500 ikasle inguruk parte hartuko dute aurtengo Eskola Kontzertuetan. 100 ikastetxe ingurutik datozen ikasleak dira, dozenaka herri ezberdinetakoak: besteak beste, Altzo, Errezil, Zegama, Legazpi, Oñati, Ataun, Mendaro eta Berrobi. Sail honetako kontzertuek Gipuzkoako Batzar Nagusien, Gipuzkoako Foru Aldundiaren, Donostiako Udalaren Hezkuntza Sailaren, Kursaal Eszenaren eta Gasteizko Udalaren lankidetza dute gaur egun.

Bestalde, ekoizpenak Musika Familian kontzertu formatuan eskainiko dira Donostian eta Gasteizen. Euskadiko Orkestrak haur eta gazteei eskaintzen dizkien jardueren artean, ibilbide luze eta finkatuena duen atala Musika Familian kontzertuena da. Haurrek familiekin gozatzeko kultur aisialdiko eskaintza honek 29 urte daramatza orkestraren egitarauan. Donostian egingo diren Musika Familian kontzertuek El Diario Vascoren babesa dute, eta horietatik Kursaalen egingo dena, Arriaga bizi da, Kursaal Eszenarekin lankidetzan prestatu da. Arabako hiriburuko kontzertuek, bestalde, Gasteizko Udal Antzoki Sarearen lankidetza dute. Ikuskizun guztietarako sarrerek 3 eta 8 euro bitarteko prezioa dute eta euskadikoorkestra.eus webgunearen bidez eros ahal izango dira, ikuskizunen datak hurreratu ahala. Dagokion aretoaren leihatiletan ere egongo dira salgai eta Kursaalen webgunean (kursaal.eus).

Jarraian ekoizpenei buruzko informazio xehea aurki daiteke, baita kontzertuen datak ere:

1) MUSIKA TANTAK

Ikuskizun inklusiboa eta interaktiboa, non musika, euskal mitologia eta ikusleen partaidetza uztartzen diren.

Parte-hartzaileak: Marie Gaillard (biolina); Gabriel Mesado (biolontxeloa); Paloma Torrado (kontrabaxua); Sara Zufiaurre (klarinetea); Xabier Peña (perkusioa); Nacho Soto (pianoa); Ibai Murillo, Alberto Perez, Danae Riaño (interpretazioa eta kantua); Iñaki Cepas, Simon Ezquiaga, Mikel Hernández, Jon Ander Lopez, Beñat Mendizabal, Ibai Mendizabal, Alvaro Polo (artista gonbidatuak); Eli Arabaolaza (sentsibilizazio-tailerra); Yamel Romero (gidoia eta konposizioa); Mikel Cañada (ideia eta zuzendaritza).

Programa: Y. Romero, E. Grieg, S. Ezquiaga, C. Saint-Saëns, V. Horton-en obrak

ESKOLA KONTZERTUAK (Lehen eta Bigarren Hezkuntza)
Urriak 23, 24, 27, 28, 29, 30 (9:45 / 11:15), Miramon (Donostia)

MUSIKA FAMILIAN (saio lasaia)
Urriak 25 (12:00*), Miramon (Donostia)
*Kontzertuaren aurretik, 10:45ean, sentsibilizazio-tailer bat eskainiko da, osagarria, aukerakoa eta doakoa. Izen-ematea: musikagela@euskadikoorkestra.eus

2) NIRE AMA ANTZARA

Maurice Ravelek Ma mère l’oye lana lagun batzuen seme-alabentzat idatzi zuen. Haurrentzako bost pieza azpitituluarekin, lan hau Charles Perrault idazlearen ipuinetan oinarritzen da. Elementu horietatik abiatuta, gure proposamenak hitzen ordez irudiak jarriko ditu zuzeneko musika duen itzal-antzerki batean, eta haur bakoitzaren esku utziko du kontakizunak norbere iruditerian berreraikitzeko lana. Haize-boskote batek emango dio bizia lan eder honi.

Parte-hartzaileak: Oihana Kontxeso (flauta); Oscar Diago (oboea); Luis Camara (klarinetea); François Proud (fagota); Marianne Tauzin (tronpa); Mikel Cañada (ideia); Marta Bocos (itzal-antzerkia, gidoia, gida didaktikoa).

Programa: M. Ravel, Nire ama antzara.

ESKOLA KONTZERTUAK (Haur Hezkuntza)
Otsailak 10, 11, 12, 13, 17, 18, 19 (9:45 / 11:15), Miramon (Donostia)

MUSIKA FAMILIAN (3 < 6 urte)
Otsailak 1 (17:00 / 18:30), Garcia Lorca (Gasteiz)
Otsailak 14 (11:00 / 12:30, saio lasaia), Miramon (Donostia)

3) LOGELAN LOGALE

Irisgarritasunak eta parte-hartzeak, Musika Gelaren proposamenaren oinarri diren ardatzek, kantata honen bidez dute adierazpen gorena. Bertan, Euskadiko Orkestrak 1.000 ikaslerekin partekatzen du eszenatokia, Leire Bilbaok idatzi eta Jagoba Astiazaranek musikatutako Logelan Logale lana osatzen duten 10 abestiak interpretatzeko. Kantata honek ahalegin handia eskatzen die musikako irakasle, parte hartzen duten ikastetxe, orkestrako musikari, administrazio eta laguntzaileei eta, horri esker, ikasleek kantu sinfoniko-koralak dakarren esperientzia paregabea bizi dezakete. Euskadiko Orkestrak 2025eko maiatzean estreinatu zuen ekoizpen hau Donostian eta Gasteizen, eta kantutik abiatuta Euskadi egituratzeko balioko du, urtebete geroago, Bilboko Orkestra Sinfonikoa eta Bizkaiko abesbatzak proiektu honetara gehituta, Euskal Herriko Abesbatzen Konfederazioaren bitartez.

Parte-hartzaileak: Jagoba Astiazaran (jatorrizko musika); Leire Bilbao (libretoa); Euskadiko Orkestra; Juanjo Ocon (zuzendaria); Kepa Errasti (abeslari eta aktorea); Maria Goiricelaya (eszena-zuzendaria)

Programa: Preludioa / Kask-kask! / Gauaren beltza / Oheko burkoa / Gaueko / Harri, orri, ar / Mamua ote da? / Nire itzala / Hitz jolasak / Ispiluaren aurrean / Logelan logale

ESKOLA KONTZERTUAK (Lehen Hezkuntza)
Apirilak 21, 22 (12:00), Kursaal (Donostia)
Apirilak 23 (12:00), Jesus Guridi (Gasteiz)

4) ARRIAGA BIZI DA

Emiliano Arriagak, ganbara txukuntzen ari dela, biolin zahar bat aurkitu du eta, bere hari desafinatuak laztantzean, memoriaren teklak sakatu ditu. Osaba musikari Juanitotaz gogoratzen hasi da: Parisen hil zen, aspaldi, 20 urte bete baino egun batzuk lehenago... Ez dakigu ia ezer bere nortasunari buruz, ezta bere bizitzari buruz ere, Bilbo alde zaharraren eta Parisen, une horretako musika-hiriburuaren, artean igaro baitzen. Horregatik, gure kontzertuan Juanito benetan nolakoa zen asmatzera edo irudikatzera jolastuko dugu, beti bere musikaren bidez, bere garaiko beste musikari batzuen bidez eta agian bilbotar maitagarri eta bikain honekin une batez hitz egiteko aukera emango digun Adimen Artifizialaren laguntzaz.

MUSIKA FAMILIAN (6 < 10 urte)
Maiatzak 9 (18:00*), Kursaal, Ganbera Aretoa (Donostia)
Maiatzak 10 (18:00*), Félix Petite (Gasteiz)
*Kontzertuen aurretik, 16:45ean, sentsibilizazio-tailer bana eskainiko da, osagarria, aukerakoa eta doakoa. Izen-ematea: 943003170 (Donostia) / 945161045 (Gasteiz).

Musikazaleak

Euskadiko Orkestrak ibilbide luzea darama Musika Gelan inklusioaren alde, FEVAS Plena Inclusion Euskadiren eskutik. Bi erakundeak duela 15 urte baino gehiago hasi ziren elkarlanean, adimen- edo garapen-desgaitasuna duten pertsonen inklusioa eta kulturarako eskubidea sustatzeko. Harrezkero,1.500 pertsona inguruk hartu dute parte hainbat jardueretan, eta horien artean nabarmenenak, Bilbo, Gasteiz eta Donostian egin diren tailerrak eta Miramongo egoitzan egin diren kontzertuak izan dira. Jarduera horiek “Praktika On” izendatu zituen FEAPSek, Adimen ezintasuna dutenen aldeko Elkarteen Espainiar Konfederakuntzak. Soinu Mosaikoa egitasmoak ere lankidetza horretan du sorburua. Ekimen hori Espainiako 14 orkestretara hedatu zen, musika garapen pertsonalerako eta gizarteratzeko tresna bihurtzen duen praktika aitzindari gisa. Ekimen honek CERMI 2018 sari nazionala jaso zuen musikaren bidez desgaitasunaren inklusioa sustatzeagatik. Oraintsuago, Euskadiko Orkestrak, Donostiako Orfeoiarekin eta Musikenerekin batera, Aspalagun 2025 aitorpena ere jaso du, Musika Gelaren esparruan egiten duen kontzientziazio- eta ikusarazte-lanagatik.

Aurreko denboraldian proiektu partekatu honek urrats berri eta garrantzitsu bat eman zuen Musikazaleak ekimenaren aurkezpenarekin. Ekimena adimen- edo garapen-desgaitasuna duten hamabost bat pertsonako hiru talde egonkor osatzean datza (bana Bilbo, Donostia eta Gasteizen). Talde horiek zortzi musika-tailerretan parte hartuko dute ikasturtean zehar. Tailerrei amaiera emateko, kontzertu bat eskainiko da 2025eko ekainean, ikasturtean egindako lana erakusteko.

Yamel Romero musikagile, musikoterapeuta eta musikaren bidez ekipoak eta pertsonak laguntzen eta garatzen espezializatutako sofrologoak zuzentzen ditu tailer hauek. Musikeneko Musika-arloko Bitartekaritza, Kudeaketa eta Zabalkundeko masterreko ikasleen inplikazioa izango du egitasmoak. Tailer hauek babesle dituzte Bilboko Juan Crisostomo de Arriaga Kontserbatorioa eta Gasteizko Udal Antzoki Sarea.

Entsegu Irekiak

Musika Gelak Entsegu Irekiekin jarraituko du. Entsegu hauek kolektiboei, ikastetxeei, kontserbatorioei eta unibertsitateei, besteak beste, daude irekiak, eta aukera eskaintzen dute orkestrak kontzertu baten aurretik egiten duen azken lana gertutik ezagutzeko. Denboraldi honetan hiru Entsegu Ireki eskainiko dira, bi urtarrilean eta bat maiatzean.

IBILBIDE PROPIOA DUTEN PROIEKTUAK

Nabarmentzekoa da Euskadiko Orkestrak ekoizpen berritzaile propioak eta kalitatezkoak sortzeko egin duen apustuak erreferente bihurtzen dituela eta hainbat kultur eragilek eskatzen dituztela. Denboraldi honetan hiru ekoizpenek ikusiko dute beren eszenaratzea hiru gune desberdinetan:

• Ilargiari Kantari Durangoko Musika Hamabostaldian aurkeztuko da azaroaren 2an, 18:00etan, San Agustin Antzokian. Bosgarren urtez jarraian, Durangok Euskadiko Orkestraren ekoizpenak sartu ditu programazioan.
• Pantomima Iruñeko Baluarte Auditoriumaren Baluarte Txikiren programazioaren baitan eskainiko da.
• Eta Logelan logale kantata, Euskadiko Orkestrak joan den Denboraldian enkargatu eta estreinatua eta aurten berriro programatua, Bilbao Orkestra Sinfonikora hedatuko da, honek hartu eta Bizkaia osoan Eskola Kontzertu gisa eskainiko baitu.

Aipatzekoa da, baita ere, aurreko denboraldietan, Living Room Music bezalako beste ekoizpen batzuek ere ibilbidea izan dutela gure lurraldean eta handik kanpo.

MUSIKA GELA YOUTUBEN

Musika Gelak atal propioa du Euskadiko Orkestraren YouTubeko kanalean, eta bertan zikloko ikuskizun osoak ikus daitezke, besteak beste, Logelan Logale; Ilargiari kantari; Polikinela; Living Room Music; eta Mozart, Nannerl eta Lagunak. Gainera, aurtengo Denboraldiko kontzertuen bideoak ere igoko dira bertara, ikuskizunak gauzatu ahala.

LANKIDETZA-SARE ZABALA

Euskadiko Orkestraren Musika Gelak inguruko erakunde ugarirekin elkarlana sustatzen jarraitzen du. Lankide ditu Gipuzkoako Batzar Nagusiak, Gipuzkoako Foru Aldundia, Donostiako Udalaren Hezkuntza Saila, Gasteizko Udal Antzoki Sarea, Kursaal Eszena eta El Diario Vasco.

INKLUSIOA SUSTATZEN DUTEN PROIEKTU ETA SAREAK

Musika Gela ziklo osoa ARTIS+: Artea, gizarteratzeko ekimenaren parte da. Mugaz gaindiko Europako lankidetza-proiektu honek helburu du kultura-ekipamenduen irisgarritasuna hobetzea bazterketa-arriskuan dauden biztanle-taldeentzat, dela desgaitasunagatik, dela arrazoi sozialengatik.

Proiektu hau 2027ra arte luzatuko da eta honako bazkideak izango ditu, besteak beste: Orchestre National du Capitole de Toulouse, Bartzelonako L’Auditori eta OBC Orkestra eta Paueko Orkestra.

Ildo beretik, Musika Gelaren programazioa Gertu Kulturaren parte da, hau da, zaurgarritasun egoeran dauden pertsonek kultura eskura izan dezaten laguntzeko elkartu diren kultura-programatzaileen sarearen parte.

Irabazi asmorik gabeko ekimen honen helburua kulturaren bitartez pertsonen bizi-kalitatea hobetzea da. Horretarako, kultura-espazio eta -esperientzia bereziak biltzen ditu prezio oso murritzetan, lehentasunarekin eta kolektibo ezberdinen beharrak entzutean eta behar horiei erantzutean oinarritutako tratu pertsonalizatuarekin. Gertu Kultura Apropa Cultura Saretik dator; sare hori Bartzelonako Auditori musika-zentroan abiarazi zen eta, Katalunian ia bi hamarkadako ibilbidea egin ondoren, erreferentziazko sare inklusiboa da gaur egun, 190 kultura-programatzaile baino gehiagorekin, 1.800 gizarte-erakunde baino gehiagorekin eta 54 udalerri baino gehiagorekin.

Musika Gelaren proposamenetako batean parte hartzen duten elkarteak:

Apdema, Apnabi, Aspace, Atzegi, Futubide, Gaude, Gautena, Gertuan, Gorabide, Goyeneche, Uliazpi, Usoa, Erroak-Sartu Elkartea, Emaus, Elkargune, Bagara-Gureak, Garagune, Centro Gerontológico Berio, Centro de día de Daño Cerebral, Centro de rehabilitación psicosocial Maldatxo.

ARTIS+

Ziklo hau ARTIS+ proiektuaren parte da, eta proiektu hau Europako Batasunak finantzatzen du %65ean Interreg VI-A Espainia-Frantzia-Andorra (POCTEFA 2021-2027) programaren bidez.

Informazio gehiago

Larunbat honetan, urriak 18, 11:00etan, Euskadiko Orkestraren ganbera-musika ziklo Miramongo Matinéeen Denboraldiko bigarren hitzordua izango da. Bertan, Haizea taldeak ‘Teklak eta haizeak’ izeneko kontzertua eskainiko du. Taldeko bost musikari Euskadiko Orkestraren kide dira: Helene Billard-Alirol (flauta), Pascal Laffont (oboea), Sara Zufiaurre (klarinetea), Anne Charlotte Lacroix (fagota) eta Marianne Tauzin (tronpa). Arkaitz Mendoza pianojoleak osatuko du seikotea.

EROSI SARRERAK HEMEN

Miramongo Matinée honek dotoreziaz, kolorez eta sotiltasunez beteriko bidaia batean garamatza, ganbera-musikako errepertorioan gutxi interpretatzen diren bi lanetan barrena. Programa honek haizezko instrumentuen eta pianoaren arteko elkarrizketa jartzen du lehen planoan, eta lirismoz, umorez eta fineziaz bustitako bi bitxi ezezagun erakusten ditu.

Kontzertua Nikolai Rimski-Korsakovek 1876an konposatu zuen Flauta, klarinete, tronpa, fagot eta pianorako kintetoarekin hasiko da. Bere orkestra-lan handiengatik ezagunagoa den arren, musikagile errusiarrak kolorearen eta orekaren artean maisutasun osoa erakutsi zuen obra honetan, formazio intimoago batean. San Petersburgoko Kontserbatorioko lehiaketa baterako idatzia, obra harrigarria da bere bizitasunagatik, gardentasunagatik eta instrumentuen arteko elkarrizketa-joko burutsuagatik. Errusiar folklorearen kutsua sumatzen da, idazkera argi eta xarmagarria du eta keinu klasikoz betea dago.

Programaren bigarren zatian, 1888an konposatutako Ludwig Thuilleren Piano eta haize-boskoterako sexteto bikaina entzungo dugu. Municheko eskolako ordezkaria eta Richard Straussen lagun hurbila, Thuillek lan eskuzabala eskaintzen digu, erromantizismo neurritsu eta argitsukoa. Idazkera arina da eta rol espresiboa ematen dio instrumentu bakoitzari. Pianoak leunki lotzen du bere ahotsa haizeekin, lirismoa, energia eta introspekzioa tartekatzen dituen elkarrizketa batean.

Sarrera solteak (11€) salgai daude euskadikoorkestra.eus webgunean eta Kursaal Auditoriumeko leihatilan. Gainera, orkestraren egoitzako leihatilan bertan ere eros ahal izango dira kontzertuaren egunean, leku libreak geratzen badira.

Miramongo Matinéetara eroso joateko, Euskadiko Orkestrak doako autobus-zerbitzua eskainiko du. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Informazio gehiago

Euskadiko Orkestraren Musika Gela hezkuntza-zikloaren Denboraldi berria urriaren 25ean, larunbata, hasiko da, lehen Musika Familian kontzertu batekin. Orkestraren Miramongo egoitzak 12:00etan hartuko duen kontzertuaren izena Musika tantak da. Ikuskizun hau inklusiboa eta interaktiboa da, eta bertan musika, euskal mitologia eta ikusleen partaidetza uztartzen dira. Mari, Mairu eta Galtzagorri bezalako kondairetako pertsonaien eta gaitasun ezberdinak dituzten artisten presentziaren bitartez, unibertso magiko bat sortu dugu, non talentu bakoitzak bere lekua aurkitzen duen aniztasunak guztiok aberasten gaituela erakusteko.

Saio lasaia

Ekoizpen hau joan den udaberrian estreinatu zen Kursaalen, eta orain Miramonera ekarriko da, familiei irekitako saio lasai formatuan. Saio lasaiek elkarbizitza inklusiborako ateak irekitzen dituzte, non familia guztiek besaulki-patioa partekatzen duten, desgaitasunen bat duten kideak dituzten familiak zein halako kiderik ez dutenak. Elkarteek astegunetan antolatzen dituzten jardueretatik kanpo desgaitasunen bat duten pertsonek gehien nahi dutenarekin banaka parte har dezaten sustatzeko modu bat da, gainerako pertsonek beren portaera epaitzeko beldurrik gabe.

Beren beharretara hobeto egokitzeko asmoz, saio lasaiek ohiko kontzertu bateko errutinak baino toleranteagoak diren baldintzak betetzen dituzte, ohiko protokoloa hain zorrotz jarraitu gabe. Kontzertu-aretoko ateak irekita egongo dira saio osoan zehar, gure publikoa ekitaldi osoan zehar sartu eta irten ahal izateko, nahieran. Aretoa beti argiztatuta egongo da, ilunpean gera ez dadin, eta arreta berezia jarriko da argi distiratsurik, zarata gogorrik eta ezusteko elementu sentsorialik egon ez dadin. Ikus-entzule guztiek jarrera lasaia izango dute ikuskizunean zehar edozein zarata edo mugimenduren aurrean.

Aretotik irten behar izanez gero, sarrerako hall-a espazio alternatibo bat izango da, gure publikoak atseden hartu ahal izateko eta, prest dagoenean, berriz ere ekitaldiarekin bat egin ahal izateko. Eta artistak eta langileak sentsibilizatuta egongo dira inklusio-praktika onenekin.

Sarrerak salgai

Kontzertu hauetarako sarrerak salgai daude 5 euroko prezioan 12 urtetik beherakoentzat, eta 8 eurotan publiko orokorrarentzat, euskadikoorkestra.eus webgunean edo Kursaaleko leihatilan. Kontzertuaren egunean bertan ere eskuratu ahal izango dira Miramongo Egoitzako leihatilan, beti ere leku libreak geratzen badira.

El Diario Vascok babesten du kontzertu hau.

Eskola Kontzertuak

Musika Familian kontzertuaz gain, produkzio hau Eskola Kontzertu formatuan ere eskainiko da, Lehen eta Bigarren Hezkuntzako ikasleei zuzenduta, urriaren 23, 24, 27, 28, 29 eta 30an Miramonen, saio bikoitzean (9:45 eta 11:15). 2.800 ikasle pasako dira egun horietan Euskadiko Orkestraren egoitzatik. Eskola Kontzertuen babesle dira Gipuzkoako Batzar Nagusiak, Gipuzkoako Foru Aldundia eta Donostiako Udala (Hezkuntza).

Sentsibilizazio-tailerra

Kontzertuaren aurretik, 10:45ean, Sentsibilizazio-tailerra egingo da, osagarria, aukerakoa eta doakoa (sarrera eskuratu duenarentzat), prestatzeko, elkarreragiteko eta esperimentatzeko. Izen-ematea: musikagela@euskadikoorkestra.eus

Informazio gehiago

Larunbat honetan, urriak 11, 11:00etan, Euskadiko Orkestraren ganbera-musika ziklo Miramongo Matinéeen 25/26 Denboraldiko lehenengo hitzordua izango da. Bertan, Kaabestrik ‘Fantasia’ izeneko kontzertua eskainiko du. Euskadiko Orkestrako hamasei kidek osatzen dute taldea:

• Biolinak: José Ignacio Aizpiri, Maddi Arana, Amaia Asurmendi, Xabier de Felipe, Óscar López, Ortzi Oihartzabal, Itziar Prieto, Igor Torre
• Biolak: Maite Abasolo, Natacha Dupuy-Scordamaglia, Arkaitz Martínez
• Biolontxeloak: Karmele Castillo, Jon Larraz
• Kontrabaxuak: Marc Sirera, Paloma Torrado
• Tinbalak: Igor Arostegi

EROSI SARRERAK HEMEN

Kontzertu honek Denboraldiari hasiera emango dio estilo eta sentsibilitate askotarikoen bidez, espiritualtasun minimalistatik hasi eta musika eszenikoaren bitalismoraino. Arvo Parten Fratres obra izango da lehen obra, konpositore estoniarraren kontenplazio-lengoaiaren lan enblematikoa, non errepikapenak eta aldakuntzak barne-meditaziorako espazio bat sortzen duten. Ondoren, 1936an Ingalaterrako Jurgi V.aren omenez idatzitako Paul Hindemithen Trauermusik lanak goizeko unerik hunkigarrienetako bat eskainiko du, Maite Abasolo biola-bakarlaria berotasunez eta malenkoniaz betetako intziri baten ahots-protagonista dela.

Kontzertuak Gustav Holsten St. Paul’s Suite ospetsuarekin jarraituko du, musika-zuzendari gisa aritu zen erakundeari (Erresuma Batuko St. Paul’s Girls’ School) egindako omenaldiarekin. Kontrastea Dmitri Xostakovitxen Adagio eta Allegretto obrarekin iritsiko da, bizitzaren eta heriotzaren dualtasuna islatzen duena, baita errusiar konpositorearen musikan sarritan aurkitzen diren ironia eta umorea ere.

Hitzordu musikal hau Leonard Bernsteinen Candide obertura bikainarekin amaituko da jai-giroan. Bernsteinen estilo eklektikoaren adibide bikaina da, musika klasikoaren elementuak jazzarekin eta musika herrikoiarekin nahasten baititu, eta entzumen esperientzia dinamiko eta entretenigarria sortzen baitu.

Sarrera solteak (11€) salgai daude euskadikoorkestra.eus webgunean eta Kursaal Auditoriumeko leihatilan. Gainera, orkestraren egoitzako leihatilan bertan ere eros ahal izango dira kontzertuaren egunean, leku libreak geratzen badira.

Miramongo Matinéetara eroso joateko, Euskadiko Orkestrak doako autobus-zerbitzua eskainiko du. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

16 hitzordu berri Miramongo Matinéeen 25/26 Denboraldian

Urriaren 11tik aurrera 16 hitzordu berri ekarriko ditu Euskadiko Orkestraren ganbera-musika ziklo berriak, eta sarrerak eta abonamenduak dagoeneko salgai daude.

Miguel Ituarte pianista getxotarra eta Bilboko Koral Elkartea nabarmentzen dira gonbidatu berezien atalean. Beste hitzordu berezi bat Bilbao Orkestra Sinfonikoaren eta Euskadiko Orkestraren perkusiojoleek aurkeztuko digutena izango da. Bi orkestretako interpreteek bat egingo dute perkusio-ganberako errepertorio heterogeneoko kontzertu bat eskaintzeko. Perkusio-musikari aplikatutako teknologia berriak erabiltzearen aldeko apustua egingo du hitzordu honek. Gainera, Euskadiko Orkestrako dozenaka kidek instrumentu-konbinazio ugariko hirukoteak, laukoteak eta boskoteak osatu dituzte, barrokotik gaur egunera arteko askotariko errepertorioa eskaintzeko.

Informazio guztia hemen

Informazio gehiago

Euskadiko Orkestrak 2025/26 Denboraldi Sinfonikoari hasiera emango dio ‘Berlioz / Ravel’ izeneko kontzertu-programarekin. Stefan Blunierrek zuzendutako kontzertuak datozen egunotan izango dira ohiko lau hiriburuetan: astelehenean, irailak 29, Gasteizko Jesus Guridi Kontserbatorioan; astearte eta asteazkenean, irailak 30 eta urriak 1, Donostiako Kursaal Auditoriumean; ostiralean, urriak 3, Iruñeko Baluarte Auditoriumean; eta larunbatean, urriak 4, Bilboko Euskalduna Jauregian. Kontzertu guztiak 19:30ean izango dira.

EROSI SARRERAK HEMEN

Euskadiko Orkestraren Denboraldi berrian, programak protagonismoa ahotsari emango dio. Lehenengo, ahots solistari, Miren Urbieta-Vegaren ahotsari. Hector Berliozen Herminie lanean solista papera hartuko du euskal sopranoak. Frantziarrak gaztaroan idatzi zuen obra hau eta Sinfonia fantastikoaren melodia ospetsuetako batzuk aurreratzen dituen eszena lirikoa da. 2014an Viñas lehiaketan garaipena eskuratu zuenetik, Urbieta-Vegaren ahotsa ohikoa izan da Espainiako antzokietan: Bartzelonako Liceu, Madrilgo Teatro Real edo Oviedoko Operan, adibidez. Baina, opera arloko errepertorioko titulu nagusietan parte hartu izanaz gain, abeslari donostiarrak beti gorde izan du bere lanaren zati bat euskal konpositoreen musika defendatzera eta, horren ondorioz, behin baino gehiagotan, bere jarduera Euskadiko Orkestrarenarekin lotuta egon izan da.

Bigarren zatian, orkestrak Landarbaso Abesbatzarekin bat egingo du. Errenterian egoitza duen Gipuzkoako abesbatza nagusi honek nazioarteko ia 20 sari eskuratu ditu eta azkena abuztuan lortu zuen Tokion. Orkestrak eta abesbatzak elkarrekin Maurice Ravelen sorkuntza-lan handinahienetako bat interpretatuko dute: Daphnis et Chloe ballet sinfoniko-korala. 1912an estreinatu zuten Errusiako Ballet ospetsuek, eta partitura honekin “nire ametsetako Grezia leialki birsortzea” lortu nahi izan zuen Ravelek. Obra eszeniko gisa arrakasta handirik lortu ez bazuen ere, laster jaso zuen orkestra baten erabilera birtuosoarekin lotutako aitortza. 2025ean, Ravel jaio zeneko 150. urteurrena ospatuko dugu eta, ziburutarra Euskadiko Orkestraren ibilbidean funtsezko egilea izan denez gero, haren musikak leku garrantzitsua beteko du Denboraldi berri honetan. Gasteizen Ravelen obra honen abesbatzarik gabeko bertsioa interpretatuko da, Kontserbatorioaren eszenatokiaren espazio-arrazoiengatik.

Stefan Blunier zuzendari suitzarra, Portoko Casa da Musicako maisu titularra eta erromantizismo osteko errepertorioan aditua, izango da emanaldiko zeremonia-maisua.

Sarrerak eta abonamenduak

Donostia, Bilbo eta Iruñeko kontzertuetarako sarrerak salgai daude euskadikoorkestra.eus webgunean eta auditoriumetako leihatila eta webguneetan, 10 eurotik aurrera. Bestalde, hiru hiri horietako abonuen salmenta ere zabalik dago, 85 eurotik aurrera, euskadikoorkestra.eus webgunean edo 943013232 telefonoan.

25/26 Denboraldia

Euskadiko Orkestrak gogoeta egiteko, izaera kritikoa sortzeko eta norbanakoaren eta taldeko pentsaeraren askatasuna handitzen duen kontzientzia eratzeko tresnak gizartearen zerbitzura jartzeko helburuari eusten dio. Horregatik, Denboraldi berri honetan musika-literatura zabaletik argumentu berriak atera ditugu, misio honetan gidalerro eta sostengu diskurtsibo gisa balio izango digutenak. Ikusiko ditugu, besteak beste, borroka-, salaketa- eta erresistentzia-adibideak, iragatearen eta amaiera baten kontakizunak, ametsetik esnatzearenak, dena Kontzertu Denboraldian zehar. Denboraldi honek, gainera, Ravel ekarriko du gogora, haren jaiotzaren 150. urteurrenean, eta Arriaga, haren heriotzaren 200. urteurrenean.

Argumentu horiek inplizituki jasotzen dute beti deskubritzeko tartea. Hori gertatuko da, esaterako, Fazil Say eta Franz Schmidt konpositoreekin, baina baita beste zenbait lanekin ere, besteak beste, Berliozen Herminie, Francken Bariazio sinfonikoak eta Bachen Ich habe genug. Bestalde, aurretik ezagutzen ditugun lanei beste bisita bat egiteko (Respighi eta Strauss, adibidez, haien erreferentziazko lanekin) eta beste egile batzuengana itzultzeko tartea ere jasotzen du; Txaikovski eta Bartok edo Rakhmaninovengana, adibidez, haien lanik ezagunenekin (eta, batzuetan, baita zailenak ere). Ravel Pirinioen bi aldeetara, Arriaga, Sorozabal, Bernaola eta Ibarrondok euskal orkestra baten Denboraldia zeharkatuko dute. Lurraldeko orkestra da, eta bere sustraietan sostengatzen da mundura azaltzeko.

Programazioa kontzeptualizazio baten inguruan arituko da biraka, eta artista garrantzitsu mordoa izango du kontzeptu hori lurrera ekartzeko. Euskadiko Orkestrarekin batera, Denboraldiaz gozatuko dugu begirada oso femeninoarekin; oso korala, oso gaztea, oso ahaltsua eta sustraitze handiarekin. Ezaugarri horiek guztiek musika-esperientzia bakoitza energiaz eta gaitasun eraldatzailez betetako musika-injekzio bihurtuko dute. Miren Urbieta-Vega, Sofia Esparza, Elena Sancho Pereg eta Marife Nogalesen ahotsak eta Marta Zabaletak pianoarekin eskaintzen duena programazio berriaren ezaugarrien zati handi baten erakusgarri dira. Baita Landarbasoren, Donostiako Orfeoiaren eta Vocalia Taldearen ahots koralak ere. Horrez gain, bakarlari boteretsuak ere izango ditugu: Rachel Willis-Sørensen, Bomsori, Camille Thomas, Nikolai Lugansky eta Johannes Moser. Artisten zerrenda luze hori gonbidatutako batutekin beteko da, hala nola Ana Maria Patiño, Katharina Müllner, Joana Carneiro, Jaime Martin, Michal Nesterowicz eta Riccardo Frizza.  

Denboraldiari buruzko informazioa hemen

Informazio gehiago

Urriaren 11n, larunbata, hasiko da Euskadiko Orkestraren egoitzan Miramongo Matinéeen 2025/2026 Denboraldia; 34 denboraldi daramatzate formazio handiaren soinu sinfonikoari kalitatezko alternatiba bat eskaintzen, formatu arin eta hurbil batean. Euskadiko Orkestraren ganbera-zikloak larunbat goizetako musika erritual txiki bat eskaintzen du, eta denboraldiro hamasei hitzordu ezberdin eta iradokitzaile ekartzen ditu. Sortu zenetik Kutxa Fundazioaren babesa duen zikloak ekainaren 6ra arte iraungo du.

Askotariko egitaraua

Miguel Ituarte pianista getxotarra eta Bilboko Koral Elkartea nabarmentzen dira gonbidatu berezien atalean. Beste hitzordu berezi bat Bilbao Orkestra Sinfonikoaren eta Euskadiko Orkestraren perkusiojoleek aurkeztuko digutena izango da. Bi orkestretako interpreteek bat egingo dute perkusio-ganberako errepertorio heterogeneoko kontzertu bat eskaintzeko. Perkusio-musikari aplikatutako teknologia berriak erabiltzearen aldeko apustua egingo du hitzordu honek.

Gainera, Euskadiko Orkestrako dozenaka kidek instrumentu-konbinazio ugariko hirukoteak, laukoteak eta boskoteak osatu dituzte, barrokotik gaur egunera arteko askotariko errepertorioa eskaintzeko. Hori guztia formatu arin, lasai eta kalitatezkoan, ordubete inguruko iraupenekoa, musikariei dibertsifikatzeko aukera ematen diena, ohiko habitat sinfonikotik ateratzen baitira. Haizea, Irauli, Soka Bones, Belharra eta Delicia Ensemble dira Miramongo eszenatokira igoko diren taldeetako batzuk. Aparteko aipamena merezi du zikloa inauguratzen duen kontzertuak, Kaabestrik eskainiko duenak, besteak baino zabalagoa delako nabarmentzen den taldeak, 16 interprete izango baititu taula gainean.

Hamasei hitzordu

Proposamen horiek guztiek menu erakargarri bat osatzen dute, eta bertan edonork aurki dezake bere altxor berezi eta propioa. Hona hemen Miramongo Matinéeen Denboraldiko egutegia:

• Urriak 11: Kaabestri
• Urriak 18: Haizea
• Azaroak 15: BosEo Percussion Group
• Azaroak 29: Miguel Ituarte
• Abenduak 13: Bilboko Koral Elkartea
• Abenduak 20: El sonido del silencio
• Urtarrilak 17: Irauli
• Urtarrilak 31: Diálogos armónicos
• Otsailak 21: Sibel
• Otsailak 28: Belharra
• Martxoak 21: Soka Bones
• Apirilak 11: Ensemble Phantasy
• Apirilak 25: Delicia Ensemble
• Maiatzak 9: Ensemble clásico
• Maiatzak 23: Tango berria
• Ekainak 6: Miramon ensemble

Abonamenduak eta sarrerak

16 kontzertuetarako abonamenduak 96 euroko prezioa orokorra du, eta 75,20 euroko tarifa berezia onuradunentzat (65 urtetik gorakoak, 30 urtetik beherakoak, orkestrako beste zikloetako abonatuak, Kursaal Eszenako abonatuak, Eureka! Zientzia Museoko lagunak eta Musikene). Jada eskuragarri dago euskadikoorkestra.eus webgunean eta orkestraren bulegoetako telefonora deituz (943 01 32 32).

Sarrera solteek 11 euroko prezio bakarra dute eta salgai daude euskadikoorkestra.eus webgunean eta Kursaal Auditoriumeko leihatilan. Gainera, eserleku librerik balego, orkestraren egoitzako leihatilan bertan erosi ahal izango dira dagokion kontzertuaren egunean.

Autobus-zerbitzua

Kontzertuak larunbatetan izango dira, goizeko 11:00etan, Euskadiko Orkestraren Miramongo egoitzan. Horietara eroso joateko, Euskadiko Orkestrak doako autobus zerbitzua eskaintzen jarraituko du Matinéetara bertaratu nahi duen ororentzat. 10:25ean abiatzen da Gipuzkoa Plaza 4 zenbakitik eta geldialdiak egiten ditu Antso Jakituna 18an eta Madril Hiribidea 34an.

Informazio gehiago

Zinemako musikaren kontzertua jada klasiko bihurtu da Donostiako Zinemaldian; finkaturik dago Belodromoko proposamenen artean (zalantzarik gabe, gainera, Zinemaldiko eszenatokirik ezagunena da, 3.000 eserlekuko edukierarekin). Juan José Ocón zuzendari donostiarra arduratuko da zinemaren eta soinu-banden arteko topaketa jendetsu honetan Orkestra zuzentzeaz beste behin. Kontzertu berri honetarako, Euskadiko Orkestrak Easo Abesbatza gonbidatu du, eta soinu-banda hauetan hartuko du parte: DragonKeeper, La casa de papel, Parecido a un asesinato eta El capitán Trueno y el Santo Grial.

Aurtengo Kontzertua & Proiekzioa kontzertuak hainbat motatako ikus-entzunezko lanetarako idatzitako eta egokitutako zazpi lan biltzen ditu:

Film hauetako soinu-banda originalen laburpenekin gure zinemaren historiari keinua egiten dion kontzertua izango da: La fierecilla domada, El ruiseñor de las cumbres, El secreto de Mónica, Cabriola eta Las chicas de la Cruz Roja, Augusto Alguerók konposatuak eta Claudio Iannik moldatuak; Los futbolísimos 2, Miguel Ángel Lamataren filma (2018), Alba S. Torremocharen musikarekin; La boda de Rosa, Iciar Bollainek (2020) zuzendua eta Vanessa Garderen bandarekin; Dragonkeeper, Salvador Simó eta Li Jianpingen film luzea (2023) Arturo Cardelúsen musikarekin; Jesus Colmenarren La casa de papel seriea, Ivan M. Lacámararen musikarekin; eta Luis Ivarsen konposizioak film luze hauentzat: Parecido a un asesinato (Caminar en el tiempo abestia), Blanca Paloma eta JP Polorekin batera zuzendua, eta El capitán Trueno y el Santo Grial, biak Antonio Hernández Nuñezek zuzenduak (2025 eta 2011).

Aurreko urteetan bezala, kontzertuan ikusizko elementu bat gehituko da: musika pelikuletako eszena-muntaketa baten proiekzioarekin uztartuko da 400 m2-ko pantailan, eta muntaketa hori Morgancrea taldeak sortu du kontzertu honetarako espresuki. Gainera, hainbat konpositore kontzertuan izango dira Belodromoko oholtzan beren lana aurkezteko.

Sarrera doakoa da eta zure gonbita irailaren 13tik 19ra jaso beharko da Zinemaldiak Kursaal jauregian duen informazio-puntuan, 09:00etatik 20:00etara, edo Boulevardeko Donostia Turismoren bulegoan, astelehenetik larunbatera 09:00etatik 20:00etara, eta igandean, 10:00etatik 14:00etara. Azken sarrerak (eskuragarri badaude) Belodromoko leihatiletan jaso ahal izango dira kontzertuaren egunean goizeko 10:00etatik aurrera.

Urteetan zehar, Euskadiko Orkestra modu askotan egon da presente Donostia Zinemaldian Bere parte-hartze nabarmenetako bat 2012ko edizioan egin zuen, Orkestrak mundu osoan ospetsua den Juan Antonio Bayonaren The Impossible filmaren soinu-bandaren zuzeneko estreinaldian parte hartu zuenean (Fernando Velázquezek sortutako partiturarekin). Hurrengo urtetik aurrera, 2013tik aurrera, Orkestra modu jarraituan hasi zen zinema-musikako kontzertua zuzenean eskaintzen, lehenik Miramongo egoitzan, eta 2015etik aurrera Belodromoan. Toki horretan bertan eskainiko du kontzertua aurten ere. Zinema-musikako kontzertuen hamarkada honetan, Orkestrak hainbat film luzeren soinu-bandak interpretatu ditu, besteak beste: Handia, Errementari, Arrugas, Pájaros de Papel, Los crímenes de Oxford, Tadeo Jones 2, Mientras dure la guerra, Buñuel en el laberinto de las tortugas… Guztira, gure zinemako pelikulen 70 soinu-banda baino gehiago interpretatu eta erakutsi ditu denbora honetan Euskadiko Orkestrak. Gainera, aipatzekoa da Orkestrak Zinemaldiaren sintonia grabatu zuela 1991 eta 1992ko edizioetan.

Zinemaldian daukan parte-hartze sendoaz gain, Euskadiko Orkestrak filmetako musikarekin lotutako lan handia egin du. Aipatzekoak dira Patria eta Maixabel filmen soinu-banden grabazioak, bai eta aurreko film batzuenak ere, hala nola A Monster Calls —Fernando Velazquezek 2016ko jatorrizko musika onenaren Goya saria jaso zuen—, Ocho Apellidos Vascos, Contratiempo, Submergence, eta abar.

2012az geroztik, SGAE Fundazioak Made in Spain sail ez-lehiakorra antolatzen du beste batzuekin batera. Sail horrek azken urtean ekoitzitako Espainiako filmen aukeraketa bat biltzen du, estreinatuak izan ala ez, eta Zinemaldiak plataforma bikaina eskaintzen die nazioartean hedatzeko. Lan horiek irailaren 23tik 27ra bitartean proiektatuko dira Madrilgo Berlanga Aretoan.

Bestalde, Autore eta Argitaratzaileen Elkarte Nagusiak (SGAE) sortutako Fundazioak Dunia Ayaso Saria ematen du Zinemaldiaren baitan, genero-ikuspegidun gidoi onenarentzat. 2012an hil zen kanariar zuzendariaren omenez antolatutako sari horiek bederatzigarren edizioa beteko dute 2025ean.

Bestalde, SGAEren Euskadiko Lurralde Kontseiluak Euskal Gidoigile Onenaren Saria babesten du. Sari hori Zinemaldiaren baitan urtero ematen du Euskal Herriko Gidoigileen Elkarte Profesionalak.

Augusto Alguerók (1934-2011) solfeoa eta harmonia ikasi zituen bere jaioterrian, Bartzelonan. Piano-jotzaile gisa lehen urrats artistikoak egin zituen irratian eta telebistan, eta bere lehen arrakasta, Niña, 1959an ikusi zuen argia, Marco Antonio Muñizek interpretatua. Boleroa eta XX. mendeko 60-70eko hamarkadetan oso konposizio komertzialak egiten lagundu zuen (Chica ye-ye, Noelia, Tonbola), horietako batzuk ereserki bihurtu zirela. Los Bravos, Jeanette edo Julio Iglesiasentzako abestiak sinatu zituen, eta 1969an Eurovision jaialdiko orkestra zuzendu zuen.

Benidormekoa bezalako jaialdietan (hainbat ediziotan musikagile eta musika- zuzendari izan zen han) eta jaialdietatik kanpo kolaborazio nabarmenak egin zituen Massiel, Raphael, Concha Velasco, Joan Manuel Serrat, Rocio Jurado eta Estatuko kantagintzako beste artista handi batzuentzat.

50 film baino gehiagotarako soinu-bandak konposatu zituen (komedia, drama, musikala), adibidez, Los santos inocentes (1984) edo La escopeta nacional (1978) film luzeetakoak, Mario Camus eta Luis García Berlangarekin batera. Telebistarako ere lan egin zuen, dozenaka programa eta telesailetarako gortinak eta pasarteak sortuz. Zalantzarik gabe, bere ondarea konpositore gisa geratzen da, 500 abesti baino gehiago baititu erregistratuta. XX. mendeko espainiar abesti arina delakoaren konposizioan erabateko eminentziatzat jotzen da, eta bere musikak herri-kulturan irauten du hainbat belaunaldiren barrena, hunkigarria, dotorea eta aintzatetsia izateaz gain, ugaria baita.

Besteak beste, BMI saria jaso zuen Peneloperengatik (1998 LatAm) eta Musika Akademiaren Ohorezko Saria 2005ean, baita ere. 2003ko apirilean Homenaje diskoa atera zen, Alguerók berak konposatutako 17 kantuz osatua eta María Jiménez, Fangoria edo Papá Levante bezalako artista ezberdinek abestua. 2011n hil ondoren, Espainiako historiarako eta musika-ondarerako zati txiki bat baino ezagutzen ez den ondarea geratu zela esan genezake.

--

Alba S. Torremocha (Salamanca, 1993) konpositore, zuzendari eta multi- instrumentistaren soinuak orkestra-egitura konplexuak eta melodia gogoangarriak uztartzen ditu, musika-atmosfera paregabe eta liluragarriak sortuz. Gaztea izan arren, bere lanak mundu osoan zehar estreinatu dira, eta pelikuletarako, telebistarako edo bideojokoetarako egindako soinu-bandek nazioarteko jaialdietan aipamenak eta sariak jasotzen jarraitzen dute, nonahi.

Formazio eredugarri bati eutsiz, Albak biolina, konposizio klasikoa eta zuzendaritza ikasi ditu Europan. Bere promozioaren buru gisa graduatua dugu Euskadiko Goi-mailako Musika Eskolan, Musikenen. Handik igaro ondoren, Zinemarako Konposizioko masterra egin zuen New Yorkeko Unibertsitatean (NYU). Rotary International delakoak 'Urteko Gaztea' Sariarekin aitortu du. Bide batez, Billy Joel Scholarship eta Elmer Bernstein Sariak ere jaso ditu New Yorken. 2016an, NYU Symphonyren egoitza lortu zuen.

Willowave proiektuaren baitan garatzen duen alorra izanik, industria zinematografikoan egindako ibilbidea eta ikerketa psikoakustikoa uztartzen ditu.

www.dawnlightstudios.com

--

Bestelako aitorpen akademikoren artean, Vanessa Gardek (Iruñea, 1984) Magna Cum Laude graduazioa jaso zuen Zinemarako Musika Konposizioan, Berkleen (Boston, AEB, 2010), eta ohore handienak lortu zituen Madrilgo Erret Kontserbatorioan, Piano eta Interpretazioan hain zuzen. 100 zinema eta ikus- entzunezko proiektu baino gehiagotan egin du lan, besteak beste, Exodus (Ridley Scottek zuzendua), Todos tienen un plan (Viggo Mortensenekin), La fría luz del día (Bruce Willisekin edo Sigourney Weaverrekin) eta El cuervo (John Cusack protagonista) filmetako banda sonoroetan.

Telebistan NBCren The Titan Games delako musikagintzan (The Roc Dwayne Johnsonek aurkeztua), Amazonen Parot seriean, Antena 3eko Galerias Velvet delakoan (Netflixkoa berau ere) edo Telecincoren Lo que escondían sus ojos telesailaren bandan.

Bere kolaborazio musikalak aipatzerakoan Alberto Iglesias, David Newman, Lucio Godoy, Joey Newman, Roque Baños, Federico Jusid, K.C. Porter, Remote Control (Hans Zimmerren konpainia), Jeff Russo edo MuMo Productions bezalako egileekin estuki lan egin duela esan dezakegu. Zenbait artistarekin ere partekatu ditu proiektuak, estudioko lanetan zein zuzenekoetan: Placido Domingo, David Bisbal, Sabina, Maluma edo Natalia Lafourcade, besteak beste.

103 urtetan La Pamplonesa banda zuzentzerik izan duen lehen emakumea dugu. Erabateko kontzertuak zuzendu ditu Nafarroako Orkestra Sinfonikoarekin eta Iruñeko Orfeoiarekin. Londres, Budapest eta Los Angeles hirietan grabazio saioak zuzendu ditu. Bost urte baino gehiagoz irakasle laguntzailea izan zen Berklee- Valentzian. Musika-ekoizpena eta musikarako teknologia irakasten ditu ikus- entzunezko baliabideetan, eta ESMUC, Música Creativa, Katarina Gurska edo SGAE Fundazioarekin kolaboratzen du. Gaur egun, Madrilen, Nafarroan, Valentzian eta Los Angelesen egiten du lan.

www.vanessagarde.com

--

The Wrap-en aburuz Los Angelesen (Kalifornia) bizi den Arturo Cardelusen Buñuel en el laberinto de las aceitunas filmerako konposatutako soinu-banda bere sasoian onena izena zen, berorrekin Annecyko Jaialdian Musika Onenaren Saria irabazi zuen eta Goya eta IFMCA (Zinema Musika Kritikarien Nazioarteko Elkartea) sarietarako ere izendatu zuten. Cardelusek In a Heartbeat, Llámame Francisco Netflixen minisail originala, Billy Zane protagonista duen Centurion XII drama eta Esteban Crespo Oscar Sarietarako izendatuak zuzendutako Netflix bereko Black Beach thrillerraren musika ere konposatu ditu.

Bere lan berrienen artean dira: Descendants (Disney), Dragonkeeper — Jatorrizko Musika Onenaren Goya Sarirako beste izendapen bat jaso duena —, Frida Kahlo izeneko erakusketa inmersiboa eta Terra Alta saileko soinu banda, Javier Cercasen eleberrietan oinarritua, azken hau. Bere lanik ospetsuenetako bat, Con Aire de Tango, Berlingo Filarmonikako Bakarlarien enkargu bat izan zen, eta NAXOSen disko batean argitaratu zen, konpositorearen ganbera-musikako beste lan batzuekin batera hain zuzen. 2016an, Londresko Royal Academy of Musiceko kide izendatu zutenean, aitortu zioten kontzertu-musikaren arloan egindako ibilbidea.

Madrilen jaioa, pianoa ikasi zuen Londresko Royal Academy of Music delakoan, Budapesteko Franz Liszt Akademian, Salamancako Goi Mailako Musika Kontserbatorioan eta Guadalajarako Kontserbatorio Profesionalean. Ondoren, bere karrera zinemarako konposizio eta musikagintzara bideratu zuen, Bostongo Berklee College of Music-en trebatuz, non summa cum laude graduatu baitze, konposizio saileko sari nagusia jasoz.

www.arturocardelus.com

--

Ivan M. Lacámara (Zaragoza, 1977) musikari-familia batean jaiotako diziplina anitzeko musikagile eta ekoizlea dugu. Soinu-banden konposizioan espezializatua, hainbat serieren partitura konposatu eta ekoitzi du, hala nola: Un paso adelante, Los hombres de Paco, El Barco, El embarcadero, Sky Rojo, Vis a vis, Zorro, Laura y sus misterios eta La casa de papel, berau, mundu mailako arrakasta. Bere musika hainbat orkestrak interpretatu eta grabatu dute (Sevillako Erret Orkestra Sinfonikoa, Tenerifeko Orkestra Sinfonikoa, Budapest Symphony Orchestra, City of Prague Philharmonic Orchestra, Savaria Symphony Orchestra, etab.), baita Europako zinemaldi garrantzitsuenetako batzuetan interpretatu ere (Fimucité, Fimucs, Mosma, Sonafilm, Arena Film Music Festival).

Camile Award 2022 (ECSA) Europako saria eman diote telebista-serierako soinu- banda onenari, hain zuzen ere, La casa de papel filmerako egindako musikagatik, eta hiru aldiz irabazi du Espainiako ikus-entzunezkoentzako Musika Saria (Musimagen), baita 2019ko Jerry Goldsmith Award saria delakoa ere.

Azken urteotan Berklee Valencia, SGAE Fundazioa, LabSeries Valencia, Musimagem Brasil, Fimucité, Mosma, Fimucs eta Loyola University bezalako erakundeek antolatutako hainbat hitzalditara gonbidatu dute. Hemen Musika ekoizpenean eta sorkuntzan Gradua ematen du irakasle asoziatu gisa.

www.ivanmlacamara.com

--

Luis Ivars (Alacant, 1960) sortzaile eta interprete gisa definitzen badu zerbaitek, bere eklektizismoa da. Musika klasikoan hasi zenetik, pop, blues, rock, jazz, musika etniko edo elektronikoa bezalako estiloetatik igaro dira bere esperientzia musikalak. Hogei urtez, teklatu jotzaile lanak egin ditu Estatuan eta nazioartean (Mediterraneo, Danza Invisible taldeetan adibidez), eta 90eko hamarkadan zinemarekin partekatzen hasi zen horren propioa zaion egile-jarioa. Harrezkero, ehun bat soinu-banda osatu ditu pelikuletarako, dokumentaletarako, film laburretarako, telesailetarako, museo-erakusketetarako, bideodantzarako eta antzerkirako (Tabarka, Tiempos de Azúcar, La Dama Boba, El Capitán Trueno y el Santo Grial, Parecido a un Asesinato edo 22 Ángeles, besteak beste). Horietako zenbait lanek Goya Sarietan 2015eko, 2016ko eta 2017ko izendapenak ekarri dizkiote.

Antzinateko musiketan murgildua denez ere, soinu-paisaiak sortu ditu nonahi, museo arkeologikoetan entzun izan diren hamaika erakusketetarako: Marq museoa (Europako museorik onena 2004), La Valltorta (Tirig, Castelló), Madrilgo Erkidegoa, Valentzia, Lisboa, Huelva eta Neanderthalen Haranean, besteak beste. Sortzaileen elkarteen eta berorien garrantziaren defendatzaile sutsua da Musimagen, Ikus-entzunezkoetarako Konpositoreen Espainiako Elkartearen Ohorezko Presidentea, eta FFACE delakoaren (Federation of Film & Audiovisual Composers of Europe) presidente izan dela. ECSAko (European Composers & Songwriters Alliance) Ohorezko Presidenteordea da, eta 2019tik Ikus- entzunezkoen Aliantzaren buru da, ikus-entzunezkoen profesionalen Estatuko federazio handiaren burua, alegia. Azkenaldian erdietsitako sari eta aipamenen artean honako hauek nabarmentzen dira: Alacanteko Nazioarteko Zinema Jaialdiko Irudiarentzako Musika Saria (2025), Miguel Hernández Saria ikus- entzunezko kulturaren esparruan finkatutako ibilbide profesionalagatik (2021, baita Alacanteko Zinemaldian ere) edo Alacanteko Ateneoko Ohorezko Domina (2017).

Informazio gehiago