Urriaren 11n, larunbata, hasiko da Euskadiko Orkestraren egoitzan Miramongo Matinéeen 2025/2026 Denboraldia; 34 denboraldi daramatzate formazio handiaren soinu sinfonikoari kalitatezko alternatiba bat eskaintzen, formatu arin eta hurbil batean. Euskadiko Orkestraren ganbera-zikloak larunbat goizetako musika erritual txiki bat eskaintzen du, eta denboraldiro hamasei hitzordu ezberdin eta iradokitzaile ekartzen ditu. Sortu zenetik Kutxa Fundazioaren babesa duen zikloak ekainaren 6ra arte iraungo du.

Askotariko egitaraua

Miguel Ituarte pianista getxotarra eta Bilboko Koral Elkartea nabarmentzen dira gonbidatu berezien atalean. Beste hitzordu berezi bat Bilbao Orkestra Sinfonikoaren eta Euskadiko Orkestraren perkusiojoleek aurkeztuko digutena izango da. Bi orkestretako interpreteek bat egingo dute perkusio-ganberako errepertorio heterogeneoko kontzertu bat eskaintzeko. Perkusio-musikari aplikatutako teknologia berriak erabiltzearen aldeko apustua egingo du hitzordu honek.

Gainera, Euskadiko Orkestrako dozenaka kidek instrumentu-konbinazio ugariko hirukoteak, laukoteak eta boskoteak osatu dituzte, barrokotik gaur egunera arteko askotariko errepertorioa eskaintzeko. Hori guztia formatu arin, lasai eta kalitatezkoan, ordubete inguruko iraupenekoa, musikariei dibertsifikatzeko aukera ematen diena, ohiko habitat sinfonikotik ateratzen baitira. Haizea, Irauli, Soka Bones, Belharra eta Delicia Ensemble dira Miramongo eszenatokira igoko diren taldeetako batzuk. Aparteko aipamena merezi du zikloa inauguratzen duen kontzertuak, Kaabestrik eskainiko duenak, besteak baino zabalagoa delako nabarmentzen den taldeak, 16 interprete izango baititu taula gainean.

Hamasei hitzordu

Proposamen horiek guztiek menu erakargarri bat osatzen dute, eta bertan edonork aurki dezake bere altxor berezi eta propioa. Hona hemen Miramongo Matinéeen Denboraldiko egutegia:

• Urriak 11: Kaabestri
• Urriak 18: Haizea
• Azaroak 15: BosEo Percussion Group
• Azaroak 29: Miguel Ituarte
• Abenduak 13: Bilboko Koral Elkartea
• Abenduak 20: El sonido del silencio
• Urtarrilak 17: Irauli
• Urtarrilak 31: Diálogos armónicos
• Otsailak 21: Sibel
• Otsailak 28: Belharra
• Martxoak 21: Soka Bones
• Apirilak 11: Ensemble Phantasy
• Apirilak 25: Delicia Ensemble
• Maiatzak 9: Ensemble clásico
• Maiatzak 23: Tango berria
• Ekainak 6: Miramon ensemble

Abonamenduak eta sarrerak

16 kontzertuetarako abonamenduak 96 euroko prezioa orokorra du, eta 75,20 euroko tarifa berezia onuradunentzat (65 urtetik gorakoak, 30 urtetik beherakoak, orkestrako beste zikloetako abonatuak, Kursaal Eszenako abonatuak, Eureka! Zientzia Museoko lagunak eta Musikene). Jada eskuragarri dago euskadikoorkestra.eus webgunean eta orkestraren bulegoetako telefonora deituz (943 01 32 32).

Sarrera solteek 11 euroko prezio bakarra dute eta salgai daude euskadikoorkestra.eus webgunean eta Kursaal Auditoriumeko leihatilan. Gainera, eserleku librerik balego, orkestraren egoitzako leihatilan bertan erosi ahal izango dira dagokion kontzertuaren egunean.

Autobus-zerbitzua

Kontzertuak larunbatetan izango dira, goizeko 11:00etan, Euskadiko Orkestraren Miramongo egoitzan. Horietara eroso joateko, Euskadiko Orkestrak doako autobus zerbitzua eskaintzen jarraituko du Matinéetara bertaratu nahi duen ororentzat. 10:25ean abiatzen da Gipuzkoa Plaza 4 zenbakitik eta geldialdiak egiten ditu Antso Jakituna 18an eta Madril Hiribidea 34an.

Informazio gehiago

Zinemako musikaren kontzertua jada klasiko bihurtu da Donostiako Zinemaldian; finkaturik dago Belodromoko proposamenen artean (zalantzarik gabe, gainera, Zinemaldiko eszenatokirik ezagunena da, 3.000 eserlekuko edukierarekin). Juan José Ocón zuzendari donostiarra arduratuko da zinemaren eta soinu-banden arteko topaketa jendetsu honetan Orkestra zuzentzeaz beste behin. Kontzertu berri honetarako, Euskadiko Orkestrak Easo Abesbatza gonbidatu du, eta soinu-banda hauetan hartuko du parte: DragonKeeper, La casa de papel, Parecido a un asesinato eta El capitán Trueno y el Santo Grial.

Aurtengo Kontzertua & Proiekzioa kontzertuak hainbat motatako ikus-entzunezko lanetarako idatzitako eta egokitutako zazpi lan biltzen ditu:

Film hauetako soinu-banda originalen laburpenekin gure zinemaren historiari keinua egiten dion kontzertua izango da: La fierecilla domada, El ruiseñor de las cumbres, El secreto de Mónica, Cabriola eta Las chicas de la Cruz Roja, Augusto Alguerók konposatuak eta Claudio Iannik moldatuak; Los futbolísimos 2, Miguel Ángel Lamataren filma (2018), Alba S. Torremocharen musikarekin; La boda de Rosa, Iciar Bollainek (2020) zuzendua eta Vanessa Garderen bandarekin; Dragonkeeper, Salvador Simó eta Li Jianpingen film luzea (2023) Arturo Cardelúsen musikarekin; Jesus Colmenarren La casa de papel seriea, Ivan M. Lacámararen musikarekin; eta Luis Ivarsen konposizioak film luze hauentzat: Parecido a un asesinato (Caminar en el tiempo abestia), Blanca Paloma eta JP Polorekin batera zuzendua, eta El capitán Trueno y el Santo Grial, biak Antonio Hernández Nuñezek zuzenduak (2025 eta 2011).

Aurreko urteetan bezala, kontzertuan ikusizko elementu bat gehituko da: musika pelikuletako eszena-muntaketa baten proiekzioarekin uztartuko da 400 m2-ko pantailan, eta muntaketa hori Morgancrea taldeak sortu du kontzertu honetarako espresuki. Gainera, hainbat konpositore kontzertuan izango dira Belodromoko oholtzan beren lana aurkezteko.

Sarrera doakoa da eta zure gonbita irailaren 13tik 19ra jaso beharko da Zinemaldiak Kursaal jauregian duen informazio-puntuan, 09:00etatik 20:00etara, edo Boulevardeko Donostia Turismoren bulegoan, astelehenetik larunbatera 09:00etatik 20:00etara, eta igandean, 10:00etatik 14:00etara. Azken sarrerak (eskuragarri badaude) Belodromoko leihatiletan jaso ahal izango dira kontzertuaren egunean goizeko 10:00etatik aurrera.

Urteetan zehar, Euskadiko Orkestra modu askotan egon da presente Donostia Zinemaldian Bere parte-hartze nabarmenetako bat 2012ko edizioan egin zuen, Orkestrak mundu osoan ospetsua den Juan Antonio Bayonaren The Impossible filmaren soinu-bandaren zuzeneko estreinaldian parte hartu zuenean (Fernando Velázquezek sortutako partiturarekin). Hurrengo urtetik aurrera, 2013tik aurrera, Orkestra modu jarraituan hasi zen zinema-musikako kontzertua zuzenean eskaintzen, lehenik Miramongo egoitzan, eta 2015etik aurrera Belodromoan. Toki horretan bertan eskainiko du kontzertua aurten ere. Zinema-musikako kontzertuen hamarkada honetan, Orkestrak hainbat film luzeren soinu-bandak interpretatu ditu, besteak beste: Handia, Errementari, Arrugas, Pájaros de Papel, Los crímenes de Oxford, Tadeo Jones 2, Mientras dure la guerra, Buñuel en el laberinto de las tortugas… Guztira, gure zinemako pelikulen 70 soinu-banda baino gehiago interpretatu eta erakutsi ditu denbora honetan Euskadiko Orkestrak. Gainera, aipatzekoa da Orkestrak Zinemaldiaren sintonia grabatu zuela 1991 eta 1992ko edizioetan.

Zinemaldian daukan parte-hartze sendoaz gain, Euskadiko Orkestrak filmetako musikarekin lotutako lan handia egin du. Aipatzekoak dira Patria eta Maixabel filmen soinu-banden grabazioak, bai eta aurreko film batzuenak ere, hala nola A Monster Calls —Fernando Velazquezek 2016ko jatorrizko musika onenaren Goya saria jaso zuen—, Ocho Apellidos Vascos, Contratiempo, Submergence, eta abar.

2012az geroztik, SGAE Fundazioak Made in Spain sail ez-lehiakorra antolatzen du beste batzuekin batera. Sail horrek azken urtean ekoitzitako Espainiako filmen aukeraketa bat biltzen du, estreinatuak izan ala ez, eta Zinemaldiak plataforma bikaina eskaintzen die nazioartean hedatzeko. Lan horiek irailaren 23tik 27ra bitartean proiektatuko dira Madrilgo Berlanga Aretoan.

Bestalde, Autore eta Argitaratzaileen Elkarte Nagusiak (SGAE) sortutako Fundazioak Dunia Ayaso Saria ematen du Zinemaldiaren baitan, genero-ikuspegidun gidoi onenarentzat. 2012an hil zen kanariar zuzendariaren omenez antolatutako sari horiek bederatzigarren edizioa beteko dute 2025ean.

Bestalde, SGAEren Euskadiko Lurralde Kontseiluak Euskal Gidoigile Onenaren Saria babesten du. Sari hori Zinemaldiaren baitan urtero ematen du Euskal Herriko Gidoigileen Elkarte Profesionalak.

Augusto Alguerók (1934-2011) solfeoa eta harmonia ikasi zituen bere jaioterrian, Bartzelonan. Piano-jotzaile gisa lehen urrats artistikoak egin zituen irratian eta telebistan, eta bere lehen arrakasta, Niña, 1959an ikusi zuen argia, Marco Antonio Muñizek interpretatua. Boleroa eta XX. mendeko 60-70eko hamarkadetan oso konposizio komertzialak egiten lagundu zuen (Chica ye-ye, Noelia, Tonbola), horietako batzuk ereserki bihurtu zirela. Los Bravos, Jeanette edo Julio Iglesiasentzako abestiak sinatu zituen, eta 1969an Eurovision jaialdiko orkestra zuzendu zuen.

Benidormekoa bezalako jaialdietan (hainbat ediziotan musikagile eta musika- zuzendari izan zen han) eta jaialdietatik kanpo kolaborazio nabarmenak egin zituen Massiel, Raphael, Concha Velasco, Joan Manuel Serrat, Rocio Jurado eta Estatuko kantagintzako beste artista handi batzuentzat.

50 film baino gehiagotarako soinu-bandak konposatu zituen (komedia, drama, musikala), adibidez, Los santos inocentes (1984) edo La escopeta nacional (1978) film luzeetakoak, Mario Camus eta Luis García Berlangarekin batera. Telebistarako ere lan egin zuen, dozenaka programa eta telesailetarako gortinak eta pasarteak sortuz. Zalantzarik gabe, bere ondarea konpositore gisa geratzen da, 500 abesti baino gehiago baititu erregistratuta. XX. mendeko espainiar abesti arina delakoaren konposizioan erabateko eminentziatzat jotzen da, eta bere musikak herri-kulturan irauten du hainbat belaunaldiren barrena, hunkigarria, dotorea eta aintzatetsia izateaz gain, ugaria baita.

Besteak beste, BMI saria jaso zuen Peneloperengatik (1998 LatAm) eta Musika Akademiaren Ohorezko Saria 2005ean, baita ere. 2003ko apirilean Homenaje diskoa atera zen, Alguerók berak konposatutako 17 kantuz osatua eta María Jiménez, Fangoria edo Papá Levante bezalako artista ezberdinek abestua. 2011n hil ondoren, Espainiako historiarako eta musika-ondarerako zati txiki bat baino ezagutzen ez den ondarea geratu zela esan genezake.

--

Alba S. Torremocha (Salamanca, 1993) konpositore, zuzendari eta multi- instrumentistaren soinuak orkestra-egitura konplexuak eta melodia gogoangarriak uztartzen ditu, musika-atmosfera paregabe eta liluragarriak sortuz. Gaztea izan arren, bere lanak mundu osoan zehar estreinatu dira, eta pelikuletarako, telebistarako edo bideojokoetarako egindako soinu-bandek nazioarteko jaialdietan aipamenak eta sariak jasotzen jarraitzen dute, nonahi.

Formazio eredugarri bati eutsiz, Albak biolina, konposizio klasikoa eta zuzendaritza ikasi ditu Europan. Bere promozioaren buru gisa graduatua dugu Euskadiko Goi-mailako Musika Eskolan, Musikenen. Handik igaro ondoren, Zinemarako Konposizioko masterra egin zuen New Yorkeko Unibertsitatean (NYU). Rotary International delakoak 'Urteko Gaztea' Sariarekin aitortu du. Bide batez, Billy Joel Scholarship eta Elmer Bernstein Sariak ere jaso ditu New Yorken. 2016an, NYU Symphonyren egoitza lortu zuen.

Willowave proiektuaren baitan garatzen duen alorra izanik, industria zinematografikoan egindako ibilbidea eta ikerketa psikoakustikoa uztartzen ditu.

www.dawnlightstudios.com

--

Bestelako aitorpen akademikoren artean, Vanessa Gardek (Iruñea, 1984) Magna Cum Laude graduazioa jaso zuen Zinemarako Musika Konposizioan, Berkleen (Boston, AEB, 2010), eta ohore handienak lortu zituen Madrilgo Erret Kontserbatorioan, Piano eta Interpretazioan hain zuzen. 100 zinema eta ikus- entzunezko proiektu baino gehiagotan egin du lan, besteak beste, Exodus (Ridley Scottek zuzendua), Todos tienen un plan (Viggo Mortensenekin), La fría luz del día (Bruce Willisekin edo Sigourney Weaverrekin) eta El cuervo (John Cusack protagonista) filmetako banda sonoroetan.

Telebistan NBCren The Titan Games delako musikagintzan (The Roc Dwayne Johnsonek aurkeztua), Amazonen Parot seriean, Antena 3eko Galerias Velvet delakoan (Netflixkoa berau ere) edo Telecincoren Lo que escondían sus ojos telesailaren bandan.

Bere kolaborazio musikalak aipatzerakoan Alberto Iglesias, David Newman, Lucio Godoy, Joey Newman, Roque Baños, Federico Jusid, K.C. Porter, Remote Control (Hans Zimmerren konpainia), Jeff Russo edo MuMo Productions bezalako egileekin estuki lan egin duela esan dezakegu. Zenbait artistarekin ere partekatu ditu proiektuak, estudioko lanetan zein zuzenekoetan: Placido Domingo, David Bisbal, Sabina, Maluma edo Natalia Lafourcade, besteak beste.

103 urtetan La Pamplonesa banda zuzentzerik izan duen lehen emakumea dugu. Erabateko kontzertuak zuzendu ditu Nafarroako Orkestra Sinfonikoarekin eta Iruñeko Orfeoiarekin. Londres, Budapest eta Los Angeles hirietan grabazio saioak zuzendu ditu. Bost urte baino gehiagoz irakasle laguntzailea izan zen Berklee- Valentzian. Musika-ekoizpena eta musikarako teknologia irakasten ditu ikus- entzunezko baliabideetan, eta ESMUC, Música Creativa, Katarina Gurska edo SGAE Fundazioarekin kolaboratzen du. Gaur egun, Madrilen, Nafarroan, Valentzian eta Los Angelesen egiten du lan.

www.vanessagarde.com

--

The Wrap-en aburuz Los Angelesen (Kalifornia) bizi den Arturo Cardelusen Buñuel en el laberinto de las aceitunas filmerako konposatutako soinu-banda bere sasoian onena izena zen, berorrekin Annecyko Jaialdian Musika Onenaren Saria irabazi zuen eta Goya eta IFMCA (Zinema Musika Kritikarien Nazioarteko Elkartea) sarietarako ere izendatu zuten. Cardelusek In a Heartbeat, Llámame Francisco Netflixen minisail originala, Billy Zane protagonista duen Centurion XII drama eta Esteban Crespo Oscar Sarietarako izendatuak zuzendutako Netflix bereko Black Beach thrillerraren musika ere konposatu ditu.

Bere lan berrienen artean dira: Descendants (Disney), Dragonkeeper — Jatorrizko Musika Onenaren Goya Sarirako beste izendapen bat jaso duena —, Frida Kahlo izeneko erakusketa inmersiboa eta Terra Alta saileko soinu banda, Javier Cercasen eleberrietan oinarritua, azken hau. Bere lanik ospetsuenetako bat, Con Aire de Tango, Berlingo Filarmonikako Bakarlarien enkargu bat izan zen, eta NAXOSen disko batean argitaratu zen, konpositorearen ganbera-musikako beste lan batzuekin batera hain zuzen. 2016an, Londresko Royal Academy of Musiceko kide izendatu zutenean, aitortu zioten kontzertu-musikaren arloan egindako ibilbidea.

Madrilen jaioa, pianoa ikasi zuen Londresko Royal Academy of Music delakoan, Budapesteko Franz Liszt Akademian, Salamancako Goi Mailako Musika Kontserbatorioan eta Guadalajarako Kontserbatorio Profesionalean. Ondoren, bere karrera zinemarako konposizio eta musikagintzara bideratu zuen, Bostongo Berklee College of Music-en trebatuz, non summa cum laude graduatu baitze, konposizio saileko sari nagusia jasoz.

www.arturocardelus.com

--

Ivan M. Lacámara (Zaragoza, 1977) musikari-familia batean jaiotako diziplina anitzeko musikagile eta ekoizlea dugu. Soinu-banden konposizioan espezializatua, hainbat serieren partitura konposatu eta ekoitzi du, hala nola: Un paso adelante, Los hombres de Paco, El Barco, El embarcadero, Sky Rojo, Vis a vis, Zorro, Laura y sus misterios eta La casa de papel, berau, mundu mailako arrakasta. Bere musika hainbat orkestrak interpretatu eta grabatu dute (Sevillako Erret Orkestra Sinfonikoa, Tenerifeko Orkestra Sinfonikoa, Budapest Symphony Orchestra, City of Prague Philharmonic Orchestra, Savaria Symphony Orchestra, etab.), baita Europako zinemaldi garrantzitsuenetako batzuetan interpretatu ere (Fimucité, Fimucs, Mosma, Sonafilm, Arena Film Music Festival).

Camile Award 2022 (ECSA) Europako saria eman diote telebista-serierako soinu- banda onenari, hain zuzen ere, La casa de papel filmerako egindako musikagatik, eta hiru aldiz irabazi du Espainiako ikus-entzunezkoentzako Musika Saria (Musimagen), baita 2019ko Jerry Goldsmith Award saria delakoa ere.

Azken urteotan Berklee Valencia, SGAE Fundazioa, LabSeries Valencia, Musimagem Brasil, Fimucité, Mosma, Fimucs eta Loyola University bezalako erakundeek antolatutako hainbat hitzalditara gonbidatu dute. Hemen Musika ekoizpenean eta sorkuntzan Gradua ematen du irakasle asoziatu gisa.

www.ivanmlacamara.com

--

Luis Ivars (Alacant, 1960) sortzaile eta interprete gisa definitzen badu zerbaitek, bere eklektizismoa da. Musika klasikoan hasi zenetik, pop, blues, rock, jazz, musika etniko edo elektronikoa bezalako estiloetatik igaro dira bere esperientzia musikalak. Hogei urtez, teklatu jotzaile lanak egin ditu Estatuan eta nazioartean (Mediterraneo, Danza Invisible taldeetan adibidez), eta 90eko hamarkadan zinemarekin partekatzen hasi zen horren propioa zaion egile-jarioa. Harrezkero, ehun bat soinu-banda osatu ditu pelikuletarako, dokumentaletarako, film laburretarako, telesailetarako, museo-erakusketetarako, bideodantzarako eta antzerkirako (Tabarka, Tiempos de Azúcar, La Dama Boba, El Capitán Trueno y el Santo Grial, Parecido a un Asesinato edo 22 Ángeles, besteak beste). Horietako zenbait lanek Goya Sarietan 2015eko, 2016ko eta 2017ko izendapenak ekarri dizkiote.

Antzinateko musiketan murgildua denez ere, soinu-paisaiak sortu ditu nonahi, museo arkeologikoetan entzun izan diren hamaika erakusketetarako: Marq museoa (Europako museorik onena 2004), La Valltorta (Tirig, Castelló), Madrilgo Erkidegoa, Valentzia, Lisboa, Huelva eta Neanderthalen Haranean, besteak beste. Sortzaileen elkarteen eta berorien garrantziaren defendatzaile sutsua da Musimagen, Ikus-entzunezkoetarako Konpositoreen Espainiako Elkartearen Ohorezko Presidentea, eta FFACE delakoaren (Federation of Film & Audiovisual Composers of Europe) presidente izan dela. ECSAko (European Composers & Songwriters Alliance) Ohorezko Presidenteordea da, eta 2019tik Ikus- entzunezkoen Aliantzaren buru da, ikus-entzunezkoen profesionalen Estatuko federazio handiaren burua, alegia. Azkenaldian erdietsitako sari eta aipamenen artean honako hauek nabarmentzen dira: Alacanteko Nazioarteko Zinema Jaialdiko Irudiarentzako Musika Saria (2025), Miguel Hernández Saria ikus- entzunezko kulturaren esparruan finkatutako ibilbide profesionalagatik (2021, baita Alacanteko Zinemaldian ere) edo Alacanteko Ateneoko Ohorezko Domina (2017).

Informazio gehiago

Euskadiko Orkestra laugarren aldiz itzuliko da Soriara eta Estatuan musika klasikoko jaialdien artean lekua egitea lortu duen jaialdi batera: Otoño Musical Soriano. Edizio berri hau Odon Alonso musikari eta konpositore handiari eskaini nahi izan dio jaialdi soriarrak.

Ostegun honetan, irailak 4, 20:00etan, Audientziaren Jauregian, orkestrak Felix Mendelssohnen Uda-gau bateko ametsa interpretatuko du. Mendelssohnek bizia eman zion partitura honen bidez William Shakespeareren izen bereko obrari. Obertura ospetsua bere gaztaroko lumatik jaio zen, eta hamasei urte geroago, konpositore alemaniarrak amodioa goraipatuz ametsak eta errealitatea elkartzen diren komedia honetarako partitura osatu zuen, Eztei Martxa bezalako doinu unibertsalak gordetzen dituena. François Lopez-Ferrer, Gustavo Dudamelen ikaslea eta 2024ko Solti Sariaren irabazlea, euskal ahots-talde baten buru izango da: Elena Sancho Pereg eta Marife Nogales abeslariak eta Vocalia Taldea 40 emakume-ahotseko abesbatza.

Programa hau Gasteizen, Bilbon, Donostian eta Iruñean ere gozatu ahal izango da, 2026ko maiatzean, orkestraren Denboraldi Sinfonikoaren baitan.

Otoño Musical Soriano

Jaialdi hau gehien espero den hitzorduetako bat bihurtu da bere musika eskaintzari esker. Kalitate eta estilo ugaritasunagatik nabarmentzen da eta urteetan zehar aintzatespen ugari jaso izan ditu. Otoño Musical Sorianoren edizio berria irailaren 4tik 26ra bitartean egingo da eta XX. mendeko espainiar kulturako bi egile nabarmeni omenaldia egingo zaie bertan: Antonio Machado poetari, bere jaiotzaren 150. urteurrenean, eta Odon Alonso maisuari, konpositore, zuzendari eta jaialdiaren bultzatzaile izandakoari.

Musika sinfonikoa, ganbera musika, flamenkoa, jazz latinoa, antzinako musika eta errepertorio garaikidea uztartuz, Jaialdiak Espainiako Orkestra Nazionala, Midori, Paquito D’Rivera, Ramón Ortega Quero, Iñaki Alberdi, Cuarteto Casals, Die Singphoniker, Yerai Cortes eta Zagrebeko bakarlariak ere hartuko ditu.

Informazio gehiago

Euskadiko Orkestrak Kantuz-en parte-hartze nabarmena iragartzen du, Ura Bere Bidean proiektuaren ikuskizun berrian, abenduaren 13an, larunbata, 19:00etan, Donostiako Illunbeko pabilioian. Ekimenaren lehen aldia izango da Gipuzkoan. Fair Saturday fundazioak Gipuzkoako Foru Aldundiarekin eta Donostiako Udalarekin lankidetzan bultzatutako ekitaldi hau Ipuskoa milurtekoaren ospakizunen barruan kokatzen da.

Gure orkestrak funtsezko papera izango du proposamen berritzaile honetan, eta protagonista izango da Illunbeko 360º-ko Ura Bere Bidean ikuskizunaren irudikapenean. Orkestra Fernando Velazquez musikari ospetsuaren zuzendaritzapean arituko da. Lehen aldia izango da Ura Bere Bidean ikuskizun bat konfigurazio murgiltzaile honekin aurkezten dena.

Azpimarratzekoa da Euskadiko Orkestra euskal artistekin elkarlanean aritu den orkestra aitzindaria izan dela, Fernando Velazquezen zuzendaritzapean eta haren konposizioekin. Izan ere, 2016an, Fair Saturday fundazioak sustatuta, Ura Bere Bidean izango zenaren aurrekaria egin zen Bilboko Campos Eliseos antzokian, Euskadiko Orkestraren, Doctor Deseo, Zea Mays eta Eñaut Elorrietaren parte-hartzearekin.

Ura Bere Bidean proiektua, Fair Saturday fundazioak 2021ean sortua, euskal artista garaikide eta garai ezberdinetakoen elkargune izateko sortu zen. Urtero grabatzen eta interpretatzen dituzte beren kantuak, Fernando Velazquez musikari ospetsuak sinfonikoki moldatuta. Orain arte, kontzertu hauek Bizkaian (BEC!) eta Araban (Buesa Arena) aurkeztu dira zuzenean.

Gipuzkoako Kantuz ikuskizuna esperientzia bakarra eta aurreko ekitaldi guztietatik desberdina izango da. Helburua euskal abesti garaikide eta estilo ezberdinen “kantua” sustatzea da. Illunben giro komunitario berezia sortuko da, pantaila erraldoien bidez, kantutegiak erabiliz eta Gipuzkoako hainbat abesbatza parte-hartzaile izango direlako. Hori dela eta, Fair Saturday fundazioak, Gipuzkoako Abesbatzen Federazioarekin elkarlanean, gonbidapena luzatuko die lurraldeko abesbatzei ekitaldian parte hartzeko eta Gipuzkoako tradizio korala bizirik mantentzen duten abeslariei eskerrak emateko.

25 euskal artista eta talde baino gehiago

Ikuskizunak 25 artista eta euskal talderen parte-hartzea izango du, bi ordu baino gehiagoko zuzeneko musika eskainiz, garai eta estilo ezberdinetako kantu herrikoiak sinfonikoki berrinterpretatuz; 70eko hamarkadako artistekin hasi eta azken urteotan lehen diskoa argitaratu dutenetaraino.

Euskadiko Orkestrarekin batera eszenatokira igoko diren artistak hauek dira: Süne, Eider, Neomak, Amak, Idoia, Maren, Olatz Salvador, Nøgen, Sua (Ane Barrenetxea), Eñaut Elorrieta, Skakeitan (Pello Armendariz), Xabi Solano, En Tol Sarmiento (Iñigo Etxezarreta), Zea Mays (Aiora eta Piti), Gozategi, Betagarri (Iñaki Ortiz), Mikel Urdangarin, Leihotikan, Urtz (Xabi Camarero), Sorotan Bele, Su Ta Gar (Aitor Gorosabel eta Xabi Bastida), Doctor Deseo (Francis), Anje Duhalde, Erramun Martikorena eta Urko.

Kantuz-en ekoizpen eszenikoa Iñaki Irastorza argiztatzaile beasaindarrak sortuko du, nazioarteko mailako argi eta efektuekin, oso konplexua eta berritzailea izango den ikuskizun batean.

Ura Bere Bidean proiektuak belaunaldi ezberdinetako artistak balioan jarri nahi ditu, euren ekarpena aitortu, publiko berriak sortu eta zabaltzea bilatu, esperientzia bakarrak eta hunkigarriak sortu, eta azken 50 urteetako euskarazko musikaren inguruan ondare sinfonikoa eraiki.

Sarreren salmenta

Abenduaren 13ko sarrerak lehenik Ura Bere Bidean komunitatearentzat egongo dira eskuragarri, irailaren 3an, asteazkena, 10:00etan. Publiko orokorrarentzat, sarrerak hurrengo egunean jarriko dira salgai, osteguna, 4an, 10:00etan. Interesa dutenek komunitatean izena eman dezakete uraberebidean.eus webgunean. Sarreren eskari handia egonez gero, abenduaren 12an, ostirala, bigarren saioa irekiko litzateke, BEC!eko urri amaierako saioetan gertatzen den bezala.

Informazio gehiago

Gaurtik aurrera, irailak 1, salgai daude Euskadiko Orkestraren 25/26 Denboraldiko kontzertuetarako sarrerak. Irailaren 29an hasiko da Denboraldi Sinfonikoa.

Sarrerak salgai 10 eurotik aurrera

Bilbo, Iruña eta Donostiako kontzertu guztietarako sarrerak euskadikoorkestra.eus-en eros ahal izango dira, baita aretoen webguneetan (euskalduna.eus, baluarte.com eta kursaal.eus) eta euren leihatila eta ohiko salguneetan ere. Irekita jarraitzen du Denboraldiko abonua eskuratzeko aukera ere, hemen (80 eurotik aurrera).

Euskadiko Orkestrako abonatu, ikasle, 30 urtetik beherako, 65 urtetik gorako, eta langabetuei tarifa bereziekin gozatu ahal izango dute kontzertuez. Gainera, Azken Ordu Gazteari esker, 30 urtetik beherako lagunek aukera izango dute gune guztietako sarrerak 10 eurotan erosteko, kontzertua hasi baino 30 minutu lehenago dagokion aretoko leihatilan.

Gasteizek ez du ez sarreren ez abonamenduen salmentarik, Jesus Guridi Kontserbatorioaren edukiera beteta baitago oraingoz.

Begirada femeninodun Denboraldia, korala, gaztea, ahaltsua eta sustraitze handikoa

Euskadiko Orkestrak gogoeta egiteko, izaera kritikoa sortzeko eta norbanakoaren eta taldeko pentsaeraren askatasuna handitzen duen kontzientzia eratzeko tresnak gizartearen zerbitzura jartzeko helburuari eusten dio. Horregatik, Denboraldi berri honetan musika-literatura zabaletik argumentu berriak atera ditugu, misio honetan gidalerro eta sostengu diskurtsibo gisa balio izango digutenak. Ikusiko ditugu, besteak beste, borroka-, salaketa- eta erresistentzia-adibideak, iragatearen eta amaiera baten kontakizunak, ametsetik esnatzearenak, dena Kontzertu Denboraldian zehar. Denboraldi honek, gainera, Ravel ekarriko du gogora, haren jaiotzaren 150. urteurrenean, eta Arriaga, haren heriotzaren 200. urteurrenean.

Argumentu horiek inplizituki jasotzen dute beti deskubritzeko tartea. Hori gertatuko da, esaterako, Fazil Say eta Franz Schmidt konpositoreekin, baina baita beste zenbait lanekin ere, besteak beste, Berliozen Herminie, Francken Bariazio sinfonikoak eta Bachen Ich habe genug. Bestalde, aurretik ezagutzen ditugun lanei beste bisita bat egiteko (Respighi eta Strauss, adibidez, haien erreferentziazko lanekin) eta beste egile batzuengana itzultzeko tartea ere jasotzen du; Txaikovski eta Bartok edo Rakhmaninovengana, adibidez, haien lanik ezagunenekin (eta, batzuetan, baita zailenak ere). Ravel Pirinioen bi aldeetara, Arriaga, Sorozabal, Bernaola eta Ibarrondok euskal orkestra baten Denboraldia zeharkatuko dute. Lurraldeko orkestra da, eta bere sustraietan sostengatzen da mundura azaltzeko.

Programazioa kontzeptualizazio baten inguruan arituko da biraka, eta artista garrantzitsu mordoa izango du kontzeptu hori lurrera ekartzeko. Euskadiko Orkestrarekin batera, Denboraldiaz gozatuko dugu begirada oso femeninoarekin; oso korala, oso gaztea, oso ahaltsua eta sustraitze handiarekin. Ezaugarri horiek guztiek musika-esperientzia bakoitza energiaz eta gaitasun eraldatzailez betetako musika-injekzio bihurtuko dute. Miren Urbieta-Vega, Sofia Esparza, Elena Sancho Pereg eta Marife Nogalesen ahotsak eta Marta Zabaletak pianoarekin eskaintzen duena programazio berriaren ezaugarrien zati handi baten erakusgarri dira. Baita Landarbasoren, Donostiako Orfeoiaren eta Vocalia Taldearen ahots koralak ere. Horrez gain, bakarlari boteretsuak ere izango ditugu: Rachel Willis-Sørensen, Bomsori, Camille Thomas, Nikolai Lugansky eta Johannes Moser. Artisten zerrenda luze hori gonbidatutako batutekin beteko da, hala nola Ana Maria Patiño, Katharina Müllner, Joana Carneiro, Jaime Martin, Michal Nesterowicz eta Riccardo Frizza.

Bartzelonako L’Auditorik, bere OBC orkestrarekin hartu-emanean, berriro ere ateak irekiko dizkio Euskadiko Orkestrari.

25/26 Denboraldiari buruzko informazio osoa hemen

Denboraldiko kontzertu guztiak:

• 1:  Berlioz / Ravel
• 2:  Schmidt / Say
• 3:  Sorozabal / Mahler (Gasteiz eta Iruñean soilik)
• 4:  Mompou / Ravel (Bilbo eta Donostian soilik)
• 5:  Arriaga / Strauss
• 6: Txaikovski / Musorgski (Iruñean izan ezik)
• 7: Franck / Bruckner (Gasteiz eta Iruñean soilik)
• 8:  Schumann / Respighi
• 9:  Rakhmaninov / Bartok
• 10: Strauss / Mendelssohn
• 11: Bernaola / Mendelssohn
• 12:  Prokofiev / Txaikovski (Gasteizen izan ezik)

Informazio gehiago

Euskadiko Orkestrak abuztuaren 9an (20:00) estreinatuko du Kursaalen Donostiako Musika Hamabostaldian izan ohi duen partaidetza, Jesús Guridiren Amaya obrarekin; Gasteizko konpositore emankorraren obra garrantzitsuenetako bat da, Hamabostaldian inoiz interpretatu ez dena. Kutsu historikoa eta Wagnerren musika ukitua duen euskarazko opera hau Guridik konposatu zuen bere musika sormenaren gorenean. Opera honen kontzertu-bertsioa Diego Martin-Etxebarriak zuzenduko du eta, Euskadiko Orkestraz eta Easo Abesbatzaz gain (Gorka Miranda buru dela), ahots ugari bilduko ditu: Arantza Ezenarro (Amaya), Gillen Munguía (Teodosio), Marifé Nogales (Amagoya), Lucía Gómez (Plácida/Olalla), Juan Laborería (Asier / Ermitaua / Zalduna) eta José Manuel Díaz (Miguel / Mezularia).

Euskadiko Orkestrak interpretatuko duen beste obra, hau ere Easo Abesbatzarekin batera, Leonard Bernsteinen West Side Story da. Abuztuaren 20an izango da, 20:00etan, Kursaalen. Bernsteinek obra honi buruz hitz egitean “operaren eta Broadwayren arteko lerro estutik ibili behar zuela” idazten zuen. Eta hala izan da; musika- zein opera-antzokiek programatzen dute, XX. mendeko obra lirikorik ezagunenetako eta ondoen idatzienetako bat delako. Clark Rundellek zuzenduko du obra hau, baita kontzertu-bertsioan ere, eta ahotsen atalean Miren Urbieta-Vega (Maria), Caspar Singh (Tony), Henry Neill (Riff), Nerea Berraondo (Anita) eta Jorge Ruvalcaba (Bernardo) izango dira.

Grabazioak

Gainera, abuztuan zehar, Euskadiko Orkestrak hainbat grabazio egingo ditu. Miramonen Gabon kantak euskaraz grabatu ziren hilaren hasieran, EITBrekin partekatutako proiektuan, eta orkestrak Pascual Aldaveren Akelarre obra gorenaren erregistroarekin amaituko du hilabetea.

Euskadiko Orkestraren Denboraldi Sinfonikoa irailaren 29tik aurrera

Euskadiko Orkestraren Denboraldi Sinfonikoa irailaren 29an hasiko da, Ravelen jaiotzaren 150. urteurrena ospatuz, Daphnis et Chloé obra sinfoniko-koral gorenarekin. Stefan Blunier eta Landarbaso Abesbatzaren zuzendaritzapean arituko da. Gainera, Miren Urbieta-Vega sopranoak Berliozeko Herminie orkestrarekin batera abestuko du. 10 kontzertutara joatea barne hartzen duten abonamenduak salgai daude uztailaren 1etik, eta Denboraldiko kontzertu guztietarako sarrerak irailaren 1etik aurrera erosi ahal izango dira.

Informazio gehiago

Euskadiko Orkestraren 2025/2026 Denboraldi Sinfonikoa 2025eko irailaren 29an hasiko da Gasteizen, eta 2026ko ekainaren 9an amaituko da Donostian.

Egungo abonatuek abonamendua berritzeko epea amaitu ondoren, abonu berrien salmenta irekiko da orain. Uztailaren 1etik aurrera eros daiteke, eta abonu bakoitzak programa hauetara joatea barne hartuko du:

• 1. Abonua:  Berlioz / Ravel
• 2. Abonua:  Schmidt / Say
• 3. Abonua:  Sorozabal / Mahler (Gasteiz eta Iruñean soilik)
• 4. Abonua:  Mompou / Ravel (Bilbo eta Donostian soilik)
• 5. Abonua:  Arriaga / Strauss
• 6. Abonua: Txaikovski / Musorgski (Iruñean izan ezik)
• 7. Abonua: Franck / Bruckner (Gasteiz eta Iruñean soilik)
• 8. Abonua:  Schumann / Respighi
• 9. Abonua:  Rakhmaninov / Bartok
• 10. Abonua: Strauss / Mendelssohn
• 11. Abonua: Bernaola / Mendelssohn
• 12. Abonua:  Prokofiev / Txaikovski (Gasteizen izan ezik)

10 kontzertutarako abonuen prezioa 85€tik 245€rakoa izango da. Pasa den denboralditik Euskadiko Orkestrak Jesus Guridi Musika Kontserbatoriora eraman ditu bere kontzertuak, Gasteizko Principal Antzokia eraberritze-lanengatik itxi ondoren. Oraingoz, eta areto berri horretan eserleku libre gutxiago daudenez gero, ez da abonu berririk egingo Gasteizen.

Nola abonatu

• euskadikoorkestra.eus
• abonatuak@euskadikoorkestra.eus
• 943013232

Abonatu zaitez hemen!

Begirada femeninodun Denboraldia, korala, gaztea, ahaltsua eta sustraitze handikoa

Euskadiko Orkestrak gogoeta egiteko, izaera kritikoa sortzeko eta norbanakoaren eta taldeko pentsaeraren askatasuna handitzen duen kontzientzia eratzeko tresnak gizartearen zerbitzura jartzeko helburuari eusten dio. Horregatik, Denboraldi berri honetan musika-literatura zabaletik argumentu berriak atera ditugu, misio honetan gidalerro eta sostengu diskurtsibo gisa balio izango digutenak. Ikusiko ditugu, besteak beste, borroka-, salaketa- eta erresistentzia-adibideak, iragatearen eta amaiera baten kontakizunak, ametsetik esnatzearenak, dena Kontzertu Denboraldian zehar. Denboraldi honek, gainera, Ravel ekarriko du gogora, haren jaiotzaren 150. urteurrenean, eta Arriaga, haren heriotzaren 200. urteurrenean.

Argumentu horiek inplizituki jasotzen dute beti deskubritzeko tartea. Hori gertatuko da, esaterako, Fazil Say eta Franz Schmidt konpositoreekin, baina baita beste zenbait lanekin ere, besteak beste, Berliozen Herminie, Francken Bariazio sinfonikoak eta Bachen Ich habe genug. Bestalde, aurretik ezagutzen ditugun lanei beste bisita bat egiteko (Respighi eta Strauss, adibidez, haien erreferentziazko lanekin) eta beste egile batzuengana itzultzeko tartea ere jasotzen du; Txaikovski eta Bartok edo Rakhmaninovengana, adibidez, haien lanik ezagunenekin (eta, batzuetan, baita zailenak ere). Ravel Pirinioen bi aldeetara, Arriaga, Sorozabal, Bernaola eta Ibarrondok euskal orkestra baten Denboraldia zeharkatuko dute. Lurraldeko orkestra da, eta bere sustraietan sostengatzen da mundura azaltzeko.

Programazioa kontzeptualizazio baten inguruan arituko da biraka, eta artista garrantzitsu mordoa izango du kontzeptu hori lurrera ekartzeko. Euskadiko Orkestrarekin batera, Denboraldiaz gozatuko dugu begirada oso femeninoarekin; oso korala, oso gaztea, oso ahaltsua eta sustraitze handiarekin. Ezaugarri horiek guztiek musika-esperientzia bakoitza energiaz eta gaitasun eraldatzailez betetako musika-injekzio bihurtuko dute. Miren Urbieta-Vega, Sofia Esparza, Elena Sancho Pereg eta Marife Nogalesen ahotsak eta Marta Zabaletak pianoarekin eskaintzen duena programazio berriaren ezaugarrien zati handi baten erakusgarri dira. Baita Landarbasoren, Donostiako Orfeoiaren eta Vocalia Taldearen ahots koralak ere. Horrez gain, bakarlari boteretsuak ere izango ditugu: Rachel Willis-Sørensen, Bomsori, Camille Thomas, Nikolai Lugansky eta Johannes Moser. Artisten zerrenda luze hori gonbidatutako batutekin beteko da, hala nola Ana Maria Patiño, Katharina Müllner, Joana Carneiro, Jaime Martin, Michal Nesterowicz eta Riccardo Frizza.

Bartzelonako L’Auditorik, bere OBC orkestrarekin hartu-emanean, berriro ere ateak irekiko dizkio Euskadiko Orkestrari.

Sarrera solteen salmenta irailaren 1etik aurrera

Sarrera guztiak salgai egongo dira irailaren 1etik aurrera euskadikoorkestra.eus webgunean eta auditorio eta leihatilen webguneetan (Gasteizen kasuan izan ezik). Sarrera solteen prezioa 10€ eta 40€ artekoa izango da. Hainbat kolektibori aplikatutako deskontuak mantendu egingo dira, baita ongien funtzionatzen duen kategorietako bat ere: Azken Ordu Gaztea, hau da, sarrerak 10€-an eremu guztietan, 30 urtetik beherakoentzat eta kontzertua hasi aurreko 30 minutuetan.

Informazio gehiago

Euskadiko Orkestra Sara Liton eta Pablo Moralesen zerbitzura jarri da egunotan, karrera amaierako azterketa egin dezaten. Larunbatean, hilak 21, jendeaurrean jarriko dira Talentu gaztea izeneko kontzertua eskaintzeko. Talentu gazteari laguntza ematearen eta erakundeen artean (Musikene, Fundación Banco Sabadell eta Euskadiko Orkestra) sinergiak sortzearen garrantzia erakutsiko du, gazteei beren prestakuntza-etapetan tresna berriak emateko.

Euskadiko Orkestrak eta Musikenek hamarkada bat baino gehiago daramate lankidetza-hitzarmen bati esker elkarrekin lanean. Hitzarmenak bi erakundeentzat komunak diren interes eta helburu ugari biltzen ditu eta Jorda Gela du izena, orkestraren lehen zuzendari titularraren omenez. Akordio horrekin lotuta, Musikenek eskaintzen duen Orkestra Ikasketa Master Ofizialaren orkestrako praktiken zatia ikasleei kontzertuen denboraldian orkestra sinfonikoan parte hartzeko aukera emanda bideratzen du. Hitzarmen horrek jasotzen duen beste ekimen bat da Euskadiko Orkestrako solista gonbidatuek eskainitako eskola magistralena. Izan ere, arrakastaz betetako ibilbide luzea eta nazioartean prestigio handia duten artistek ikasleei eskola horiek eskaintzen dizkiete Ikastegian.

Duela bi urtetik hona, aliantza instituzional estrategiko horrek orkestra-zuzendaritzaren praktika txertatu du bere Denboraldi Sinfonikoko kontzertuetan, edo, kasu honetan bezala, Miramongo egoitzan ezohiko kontzertu bat aurkeztean, publikoari irekia. Dagoeneko bost dira programa honetan parte hartzeko aukera izan duten Musikeneko orkestra-zuzendaritzako ikasleak. Aurreko urteetan Eros Quesada, Joshua Franken, Aritz Labrador eta Sara Litonek parte hartu ondoren, larunbat honetan Sara Liton berriro igoko da Euskadiko Orkestraren podiumera eta Pablo Morales lehen aldiz, Fundación Banco Sabadellen laguntza duen kontzertu batean.

Kontzertu-programako ordubetean zehar, Litonek eta Moralesek Musikeneko prestakuntza-planean lortutako ezagutzak erakutsiko dituzte, Usandizaga, Txaikovski eta Wagnerren obrak zuzentzearen bidez.

Kontzertu honetara joateko gonbidapena beharko da, eta euskadikoorkestra.eus webgunearen bidez eskuratu ahal izango da.

Programa

J.M. Usandizaga
Dans la mer [6']

P.I. Txaikovski
La tempestad. Obertura-fantasía [18']

R. Wagner
El ocaso de los dioses. El viaje de Sigfrido por el Rin [10']
La valquiria. Despedida de Wotan y la música del fuego mágico [18']

Biografiak

Sara Liton

Sara Liton Castillo 2003an jaio zen Leganesen (Madril) eta bere musika ikasketak Getafeko Musika Kontserbatorio Profesionalean hasi zituen. 2021eko ekainean, Piano espezialitatean Musika Profesionaleko Titulua lortu zuen.

Gaur egun, Orkestra Zuzendaritza espezialitateko azken urtea ari da ikasten Musikenen, Jon Malaxetxebarria irakaslearen gidaritzapean, eta aurretik Arturo Tamayo maisuarekin. Halaber, Basilio Astulez irakaslearekin koru-zuzendaritzaren arloan ere jaso du prestakuntza. Beste maisu batzuek ere lagundu dute bere orkestra-zuzendaritzako prestakuntzan, nazioarteko Masterclass eta prestakuntza-programetan parte hartuz, hala nola: Johannes Schlaefli, Nicolás Pasquet, Robert Treviño, Ekhart Wycik eta Pablo Gonzalez.

Gaur egun, eta 2023tik, Arimaz Ganbera Orkestrako zuzendari titularra da (Tolosa, Gipuzkoa), eta orkestra honekin hainbat proiektu gauzatu ditu. 2025eko apirilean Gazte Musikarien Zuzendaritza Lehiaketako finalista izan zen. 2024ko azaroan Musikene Orkestra Sinfonikoaren zuzendaritza hartu zuen Jordi Benacer maisua osasun arazoengatik ordezkatuz, eta Igor Stravinsky-ren “La consagración de la primavera” obra barne hartzen zuen programa bat zuzendu zuen. 2024ko ekainean, Roberto Treviño maisuaren formazio bat jaso ondoren, Euskadiko Orkestraren hiru kontzerturen hasierako atala zuzentzeko hautatua izan zen, Beethovenen “Fidelio” obraren Obertura interpretatuz.

2024ko apirilean, Musikagileak zikloko kontzertu batean Pierluigi Billoneren pieza bat eskainiz, Ascolta musika garaikideko Ensemblea zuzendu zuen. 2024ko apirilean, Pierluigi Billoneren obra batekin, Ensemble Ascolta zuzendu zuen Musikagileak zikloan.

Pablo Morales

Bere musika prestakuntza Montserrateko Eskolania ospetsuan hasi zuen, Bernat Vivancosen zuzendaritzapean, eta bertan oboea, pianoa eta kantua ikasten hasi zen. Geroago, IEA Oriol Martorell-en ikasi zuen, eta Philippe Vallet irakaslearekin egin zuen oboe espezialitateko ikasketa profesionala. Aurten, Musikenen orkestra-zuzendaritzako goi mailako ikasketak amaitu ditu, Euskadiko Orkestra zuzenduz eta kalifikazio altua lortuz.

Orkestra-zuzendaritzan izan dituen maisuak Xavier Puig, Jon Malaxetxebarria eta Arturo Tamayo izan dira. Halaber, nazioarteko izen handiko zuzendarien masterclassak jaso ditu, hala nola Juanjo Mena, Wolfgang Wengenroth eta Jan Zarzycki.

Musika eszenikoaren arloan, Maciej Pikulski piano-jotzaile eta ahots-coach ospetsuarekin formatu da, Pikulski-k abeslariekin lan egiteko teknikak, opera errepertorioa eta korepetidorearen lana irakatsi dizkio. Bestalde, Konrad Jarnot baritono ingeles ezagunaren ahots formazioa jaso du.

Koru-zuzendaritzari dagokionez, Basilio Astulez eta Mireia Barrera maisuen eskutik formatu da. 2019tik Kataluniako Gazte Abesbatza Nazionaleko kide da, eta 2024tik World Youth Choir-eko kide ere bada. Gaur egun, zuzendaritza eta kantua uztartzen ditu profesionalki.Valleseko Gazte Orkestra Sinfonikoko zuzendari laguntzailea izan da.

Gaur egun, Bartzelonako Opera Popular-eko eta Exaudio emakumezkoen abesbatzako zuzendari laguntzailea da.

Lankidea

Informazio gehiago

DENBORALDI SINFONIKOAREN PROGRAMAZIOA

Euskadiko Orkestraren 2025/2026 Denboraldi Sinfonikoa 2025eko irailaren 29an hasiko da Gasteizen, eta 2026ko ekainaren 9an amaituko da Donostian. Guztira, 12 kontzertu-programa izango dira. Gasteizen (10), Bilboren (10), Donostiaren (10x2) eta Iruñearen (10) artean banatuta, guztira 50 kontzertu izango ditu Denboraldi Sinfonikoak.

Denboraldiko irudi berriak eta harekin batera ikusi ahal izango diren guztiek lengoaia narratibo berria izango dute, arlo digitaletik pentsatuta eta ikus-entzunezko formatuari protagonismoa emanda. Gaur egungo erronka nagusietako bat da panorama oso konplexu, zatikatu eta polarizatu batean adierazgarritasuna lortzea. Testuinguru horretan, hain zuzen ere, musika klasikoak eta Euskadiko Orkestrak beren espazioa behar dute. Ohikotasunean apartekotasuna bilatu nahi izan dugu, egunerokotasunean magia topatu nahian. Eta unibertso grafiko bat eraiki da; bertan, eguneroko elementu ezagunak landuko ditugu irudi eta mikrokontakizun harrigarri, hunkigarri, magiko eta batzuetan ustekabeko bihurtzeko. ACC Comunicacionek zuzenduko du ibilbide grafiko hori. 

Lerro programatiko nagusiak

Denboraldi bakoitza erronka musikal bat eta abentura programatiko berri bat da. Obra berriak edo oso ezagunak ez direnen eta gutxitan interpretatu izan direnen aurkezpena errepertorioko eta erreferentziazko obra handien, obra sinfonikoen eta sinfoniko-koralen sarrerarekin bateratzen asmatu behar du, betiere egungo errealitatearekin harremanetan.

Errepertorioko lan horietako batzuk Euskadiko Orkestrak lehen aldiz interpretatuko ditu: Berliozen Herminie (Miren Urbieta-Vega izango da protagonista); Fazil Sayren Never Give Up (Pariseko eta Istanbuleko eraso terroristei erantzuna emanez, Camille Thomas biolontxelojolearentzat idatzi zuen); Franz Schmidten 4. Sinfonia. Beste batzuk, aldiz, gutxitan interpretatutakoak izan dira; adibidez: Cesar Francken Bariazio sinfonikoak, Marta Zabaleta pianojolearen eskutik eta Johann Sebastian Bachen Ich habe genug partitura. Horietako beste bat izango da, bestalde, Felix Ibarrondo konpositoreak orain arte idatzi duen azken sinfonia: Guernica, 2026ko urtarrilean Euskadiko Orkestrak estreinatuko duena.

Euskadiko Orkestraren atriletan erreferentziazko obra handiak ere jarriko dira, adibidez: Ravelen Daphnis et Chloe, jaio zeneko 150. urteurrenean; Straussen Azken 4 Lieder (uneotako ahots bikainenetako batek interpretatuko du: Rachel Willis-Sørensenek). Brucknerren eta Brahmsen laugarren sinfoniak; Respighi arrakasta handia eskuratu zuten bere bi lanekin: Fontane di Roma eta Pini di Roma; Rakhmaninov eta bere Pianorako 3. Kontzertua, (oso ezaguna da interpretatzailearentzako, kasu honetan, Nikolai Lugansky, eskakizun musikal eta tekniko handia duelako). Biolinerako zailtasun handiko beste kontzertu bat, maisulantzat hartu zena, Txaikovskik idatzitako lana izango da eta Bomsori gazteak interpretatuko du. Bestalde, Euskadiko Orkestrak Txaikovskiren Bosgarren Sinfonia eskainiko du. Lan ezagun horrek patuaren irudia erakusten du eta 2026ko ekainean Denboraldiari amaiera emango dio. Denboraldi berriari gorputza, energia eta sekulako bizitasuna emango dizkiete honako hauek: Bartoken Orkestrarako Kontzertuarekin, Erakusketa bateko margolanak, Straussen Heriotza eta transfigurazioa, Walpurgisen gaua (Donostiako Orfeoiari enkargatutako erresistentziako lana) eta Uda gau bateko ametsa, Vocalia Taldea, Elena Sancho Pereg eta Marife Nogalesekin.

Euskal oinarriak

Euskadiko Orkestrak euskal sorkuntza sustatzen eta hedatzen jarraituko du haren programazioaren bidez. Herrialdeko orkestra da, munduaren aurrean aurkezteko bere sustraietan oinarritzen dena. Eta Denboraldi honetan oinarri hori oso agerian geratuko da Ravel, Arriaga, Sorozabal, Bernaola eta Ibarrondoren lanekin, besteak beste.

Hain zuzen ere, Denboraldi berriko programazioan Euskal Herriko bi konpositore oroituko ditugu batez ere: Ravel eta Arriaga. Bere jaiotzaren 150. urteurrenean, Ravel bere obra nagusiarekin oroituko dugu; konposizio-ibilbideko lanik garrantzitsu eta onenarekin: Daphnis et Chloe. Orkestrak eskainiko du Landarbaso Abesbatzarekin batera. Gainera, Euskal Herriko eta Kataluniako orkestren arteko trukeari esker, Ravel Pirinioen bi aldeei lotuta geratuko da. Hala, Euskadiko Orkestrak La alborada del gracioso lana eskainiko du Bartzelonan, eta Orquestra Simfonica de Barcelona i Nacional de Catalunyak Euskadin Bolero lana interpretatuko du.

Juan Crisostomo de Arriaga hil zeneko 200. urteurrenean, Euskadiko Orkestrak haren lanik ezagunenaren obertura interpretatuko du: Esklabo zoriontsuak.

Ravel eta Arriagarekin batera, Pablo Sorozabal, Carmelo Bernaola eta Felix Ibarrondo ere entzungo dira Denboraldi honetan, hainbat momentutan. Pablo Sorozabalen Siete Lieder Sofia Esparza soprano nafarrak interpretatuko du, Euskadiko Orkestrak Bartzelonara egingo duen bidaian. Bernaolaren Abestiak lanak Otxandioko konpositorea omenduko du (aldi berean, lan horrekin, Juan de Antxieta omendu nahi izan zuen berak). Eta, amaitzeko, ekoizpen oparoa duen Felix Ibarrondo konpositore oñatiarra aipatu behar dugu. Orkestrak orain arte konpositoreak sortu duen azken obra, Guernica, estreinatuko du.

Euskal konpositoreen zerrenda honetan, Pascual Aldave gehitu dezakegu; izan ere, Denboraldi Sinfonikoaz gain, Euskadiko Orkestrak dimentsio handiena izan duen bere lanaren lehen grabaketa-lana egingo du: Akelarre.

Euskal emakume interpretatzaileen atalak ere arreta berezia merezi du Denboraldi honetan. Ahotsaren presentzia garrantzitsua izango da; hain zuzen ere, hamabi programa sinfonikoetatik zazpik ahotsa ere izango dute eta gehienak Euskal Herrikoak eta emakumezkoenak izango dira. Bereziki azpimarratu beharrekoak dira hauek: Miren Urbieta-Vega (Herminie), Sofia Esparza (Siete Lieder), Elena Sancho Pereg eta Marife Nogales (La nuit eta Uda gau bateko ametsa). Marta Zabaleta (Bariazio sinfonikoak) pianojolea izango da solista instrumentistetako bat. Gainera, lurraldeko abesbatzen oinarri sendoa erakutsi nahian, Denboraldi honetan hiru abesbatza izango dira entzungai: Landarbaso Abesbatza (Daphnis et Chloe), Donostiako Orfeoia (Walpurgisen gaua) eta Vocalia Taldea (La nuit eta Uda gau bateko ametsa).

Artistak

Orkestrak artista ugari jasoko ditu berriro bere programazioan: hamabi zuzendari, sei bakarlari instrumentista, hamar bakarlari bokal, hiru abesbatza eta orkestra gonbidatu bat. Denboraldi honetako giza kapitalak 45 urte ditu batez beste, eta interpretazioen freskotasuna haien ibilbideen esperientzia eta birtuosismo musikalarekin bateratzen ditu. 

ZUZENDARIAK

Hiru orkestra-zuzendari izango dira nagusi: Katharina Müllner, Joana Carneiro eta Ana M. Patiño. Denboraldiko gainerako bederatzi programetan, lehendik ere ezagun ditugun zuzendariek (Riccardo Frizza, Juraj Valcuha eta Michal Nesterowicz) eta Euskadiko Orkestran lehen aldiz beren lana eskainiko duten zuzendariek (Stefan Blunier, Jaime Martin, Antonio Mendez, François Lopez-Ferrer, Alexander Liebreich eta Ludovic Morlot -azken hori OBCrekin etorriko da, hango zuzendaria baita-) izango dute batuta eskuetan.

SOLISTAK

Programazioaren atal nagusia izango da, eta 16 bakarlari bokal eta instrumental izango ditu. 16 artista horietatik, 10 emakumezkoak izango dira, eta 5 Euskal Herrikoak. Horregatik, atal honen begirada oso femeninoa, oso korala, oso gaztea, oso boteretsua eta errotze handikoa izango dela esan dezakegu. Miren Urbieta-Vega, Sofia Esparza, Elena Sancho Pereg eta Marife Nogalesen ahotsak eta Marta Zabaletak pianoarekin eskaintzen duena dira aipatutako ezaugarri horietako askoren erakusgarri. Baina, horrez gain, bakarlarien ibilbideek indar handia dute, hala nola Rachel Willis-Sørensen, Bomsori, Camille Thomas (lehen aldiz etorriko da), Nikolai Luganski eta Johannes Moser (ez da haien lehen aldia izango). Horiek guztiek sendotasunez eta distiraz beteko dituzte indartsu eta kementsu iritsiko den Denboraldi berriaren ezaugarri nagusiak. 

ABESBATZAK

Abesbatzen zatiak ere protagonismo berezia izango du denboraldi berrian. Landarbaso Abesbatzak emango dio hasiera Denboraldiari Ravelen Daphnis et Chloe lanarekin; Donostiako Orfeoiak Mendelssohnen Walpurgisen gaua eskainiko du, eta Vocalia Taldeak lekukoa hartuko du batez ere bokala eta femeninoa izango den beste programa batekin. Bertan, Mendelssohnen Uda gau bateko ametsa eta Saint-Saënsen La nuit eskainiko dituzte.

ORKESTRA GONBIDATUA

Euskadiko Orkestrak duela bi hamarkada baino gehiago hain zuzen ere OBC (Orquestra Simfonica de Barcelona i Nacional de Catalunya) orkestrarekin ireki zuen truke-politika berreskuratu du. Azaroan, bi orkestrek beren emanaldiak aldi berean egingo dituzte, talde gonbidatu gisa, eta biek bat egingo dute Pirinioen bi aldeetan, Ravelen bitartez. Ravelen Bolero Ludovic Morlot eta bere orkestraren bertsioan entzungo da. Gainera, programa oso katalana eskainiko du eta Miquel Oliuren Pluja estreinatuko du. Euskadiko Orkestra, bestalde, L'Auditorira itzuliko da Ravelen La alborada del gracioso lanarekin, Sorozabalen 7 Lieder lanarekin (Sofia Esparza izango da protagonista) eta Mahlerren Bosgarrenarekin (Polonian egin zuen biran eraman zuen eta maisutasunez defendatzen du). OBCk Bilbon eta Donostian eskainiko ditu kontzertuak azaroaren 26, 27 eta 28an.

ORKESTRAREN BESTE JARDUERA BATZUK

Irteerak: Bartzelonako L’Auditori eta Otoño Musical Soriano

Euskadiko Orkestra L’Auditori aretora itzuliko da bi hamarkada baino gehiago igaro ondoren. Areto hori bisitatzeko zortea izan zuen inauguratu eta hilabete gutxira, orkestren arteko trukearen adibide berri batean. Azaroan itzuliko da Bartzelonara OBCren denboraldira, hiru kontzerturekin eta Ravelen figura Pirinioen bi aldeetara (azaroak 28, 29 eta 30) eramango duen programarekin.

Otoño Musical Soriano Euskadiko Orkestraren ohiko beste hitzordu bat da. Oraingoan Marife Nogales eta Elena Sancho Peregen ahotsekin aurkeztuko da, Vocalia Taldearekin batera (irailak 4).

Grabazioak: Pascual Aldaveren ‘Akelarre’

Orkestraren jardueraren zati garrantzitsu bat osatzen dute grabaketa diskografikoek, eta dagoeneko 80 bolumen baino gehiago ditu haren fonotekak. Horiek, batez ere, euskal sorkuntzetan daude zentratuta.

2024an XX. mendeko euskal musikako sinfonista garrantzitsuenetako baten jaiotzaren mendeurrena izan zen: Pascual Aldave. Hori dela eta, Euskadiko Orkestrak ahalegina egin zuen joan den denboraldian bere katedrala den Akelarre obra interpretatzeko. Orain beste pauso bat eman du eta abuztuaren amaieran lan handi hau grabatzeari ekingo dio. Lehen grabazio hau mugarri historikoa izango da, eta ondare garrantzitsua utziko du euskal konposizio-katalogoaren barruan.

ARTIS+: artea, gizarteratzeko

ARTIS+: artea, gizarteratzeko Pirinioak ardatz hartzen dituen lankidetza-proiektua da, eta Frantzia hegoaldea, Euskadi eta Kataluniaren artean garatzen da. Desgaitasun-arrazoiengatik edo gizarte-bazterkeriarekin lotutako arrazoiengatik bazterkeria-arriskuan dauden biztanle taldeen artean kulturaren funtzioa indartu nahi du.  Hiru urteko ibilbidea du, 2024-2026, eta Euskadiko Orkestrak haren zikloen bidez hezurmamituko ditu proiektuaren helburuak: Miramongo Matinéeak, Musika Gela eta Denboraldi Sinfonikoa.

Lehenengo urtean Abestu Euskadiko Orkestrarekin, Musika tantak, Logelan logale eta Musikazaleak proiektuak martxan jarri dira lankidetza-egitasmo honen baitan. Eta horien bitartez esan daiteke parte-hartzaileen eta ikusleen artean ekimen hau ia 9.000 pertsonak partekatu dutela. Lau proiektuek aurrera jarraituko dute bigarren edizioan, eta dagoeneko lanean ari dira gizarte inklusibo batean hazten jarraitzeko, kasu honetan Euskadiko Orkestrak eskaintzen dituen esperientzien bidez.

Beste proiektu eta ziklo batzuk

Orkestrak haren konpromisoa mantenduko du honakoekin: ABAO Bilboko Operaren Denboraldia, Bilboko Musika-Música, BBVA Fundazioa Jakintzaren Mugak Sarien gala, Donostiako Musika Hamabostaldia, Zinemaldia eta Musikaste.

Orkestraren Miramongo Matinéeak eta Musika Gela zikloak aurrerago aurkeztuko ditugu.

ABONUAK ETA SARRERAK

Abonuen salmenta, uztailaren 1etik aurrera

Egungo abonuak berritzeko epearen ondoren, abonu berrien salmentari ekingo zaio. Uztailaren 1etik aurrera erosketa egin daiteke, euskadikoorkestra.eus webgunearen bidez, 943 01 32 32 telefono-zenbakira deituta edo abonatuak@euskadikoorkestra.eus helbidera mezu elektroniko bat bidalita.  Eskaerak jasotzen diren ordenaren arabera formalizatuko dira abonuak, eskuragarri dauden artean. Denboraldi berri honetan 10 kontzerturako abonuen prezioa 85 € eta 245 € artekoa izango da.

Sarrera solteen salmenta irailaren 1etik aurrera

Sarrera guztiak salgai egongo dira irailaren 1etik aurrera euskadikoorkestra.eus webgunean eta auditorio eta leihatilen webguneetan (Gasteizen kasuan izan ezik). Sarrera solteen prezioa 10 € eta 40 € artekoa izango da. Hainbat kolektibori aplikatutako deskontuak mantendu egingo dira, baita ongien funtzionatzen duen kategorietako bat ere: Azken Ordu Gaztea, hau da, sarrerak 10 €-an eremu guztietan, 30 urtetik beherakoentzat eta kontzertua hasi aurreko 30 minutuetan.

MEZENASGOA

Mezenasgoari esker, herrialdeko proiektu kultural honen garapenari lagundu nahi dioten pertsonek horretarako aukera dute, ekarpenen bidez. Etorkizuneko tresna bat da, administrazio publikoen dirulaguntza-politikak osatzeko beharrezkoa, eta kultura eta gizartea garatzen laguntzeko bitarteko gisa ezarriko da. Orkestrari ekarpenen bat eginez gero, edozein modalitatetan, kenkari fiskala eskuratu ahal izango da. Informazio gehiago hemen: euskadikoorkestra.eus

ESKERRAK

Azkenik, orkestraren jardueren garapenean parte hartzen duten erakunde guztien laguntza eta babes garrantzitsua eskertu nahi ditu orkestrak: abonatuak eta publiko orokorra, erakunde babesleak eta kolaboratzaileak, eragile kulturalak, komunikabideak... Horiek guztiek egiten dute posible Euskadiko Orkestraren jarduera.

Informazio gehiago

Zortzi hilabeteko musika-tailerren ondoren, Musikazaleak proiektua amaierara iritsi da, proposamen berritzaile gisa finkatuz, adimen- edo garapen-desgaitasuna duten pertsonentzako kultura irisgarri, inklusibo eta parte hartzailearen bidez eraldaketa sozialaren alde eginez. Euskadiko Orkestrak FEVAS Plena Inclusión Euskadirekin (Adimen-desgaitasuna duten pertsonen aldeko erakundeen euskal elkartea) lankidetzan bultzatutako ekimenak 24 musika-tailer eskaini ditu Bilbon, Donostian eta Gasteizen, eta horietan 43 pertsona helduk hartu dute parte, FEVASeko kide diren 11 erakundetatik etorrita: Apnabi-Autismoa Bizkaia, Aspace Bizkaia, Aspace Gipuzkoa, Atzegi, Goyeneche Fundazioa, Usoa Fundazioa, Futubide, Gaude, Gautena, Gorabide eta Uliazpi.

Musikazaleakek desgaitasuna duten pertsonen kulturarako eskubidea berresten du, musika adierazpenerako, garapen pertsonalerako eta gozamen kolektiborako tresna bihurtzen den espazioak sortuz. Ekimena Mikel Cañada Euskadiko Orkestraren Musika Gelako arduradunak koordinatu du, eta Yamel Romero Musikanaiz Zentroko zuzendariak gidatu du.

Proiektua 2024ko urritik 2025eko maiatzera lan egin duten hiru talde egonkorretan egituratu da, lurralde bakoitzean bat. Esperientzia amaitzeko parte-hartzaileek egindako lana erakutsiko duten hiru entzunaldi egingo dira:

• Bilbo: osteguna, ekainak 5 (12:00), Juan Crisostomo de Arriaga Kontserbatorioa
• Donostia: asteazkena, ekainak 11 (12:00), Euskadiko Orkestraren Egoitza
• Gasteiz: ostirala, ekainak 13 (12:00), Federico García Lorca Antzokia

Proiektuak ONCE Fundazioaren, Musikeneko Musika Bitartekotza, Kudeaketa eta Hedapen Masterraren, Bilboko Juan Crisostomo de Arriaga Kontserbatorioaren eta Gasteizko Antzoki Sarearen laguntza izan du. Laguntzaileek euren instalazioak eta langileak utzi dituzte tailerrak egiteko eta, horrela, irisgarritasun kulturalarekin eta inklusioarekin duten konpromisoa indartu dute.

Musikazaleak ARTIS+: Artea, gizarteratzeko proiektu europarraren parte ere bada. Mugaz gaindiko lankidetza-ekimena da, eta desgaitasunagatik edo arrazoi sozialengatik baztertuta geratzeko arriskuan dauden taldeentzat kultura-ekipamenduen irisgarritasuna hobetzea du helburu.

Proposamen horrekin, FEVASek eta Euskadiko Orkestrak 15 urte baino gehiagoko aliantza estrategikoarekin jarraitzen dute, eta horri esker, dagoeneko 1.500 pertsonari baino gehiagori lagundu dieten kultur jarduera inklusiboak gauzatu ahal izan dira. Lankidetza hori kultura irisgarri, parte-hartzaile eta eraldatzailearen alde egin duten kontzertuetan, entsegu irekietan eta sormen tailerretan gauzatu da.

Informazio gehiagorako edo etorriko zaren baieztatzeko:
 

• Lucía Soria (FEVAS): comunicacion@fevas.org 
• Miren Elósegui (Euskadiko Orkestra): melosegui@euskadikoorkestra.eus 

Informazio gehiago