Babes esklusiboa

PRENTSA-MATERIALA JAITSI HEMEN

Euskadiko Orkestrak 2026/27 Denboraldi Sinfonikoko bigarren kontzertu-programa aurkezten du, ‘Aita Donostia. La vie profonde de Saint François d’Assise’ izenburupean. Kontzertuak datozen egunotan izango dira ohiko lau hiriburuetan: ostiralean, azaroak 6, Donostiako Kursaal Auditoriumean; larunbatean, azaroak 7, Euskalduna Bilbaon; astelehenean, azaroak 9, berriz ere Kursaal Auditoriumean; asteartean, azaroak 10, Gasteizko Jesus Guridi Kontserbatorioan; eta asteazkenean, azaroak 11, Iruñeko Baluarte Auditoriumean. Kontzertu guztiak 19:30ean izango dira.

EROSI SARRERAK HEMEN

Estreinaldia, ondorengo interpretazioak eta gaur egungo berreskurapena

Aita Donostiak Illustrations Musicales pour La vie profonde de Saint François d’Assise konposatu zuen 1925 eta 1926 bitartean Henri Gheonek idatzitako antzezlanerako. Obra eszenikoki 1926an estreinatu zen, Parisko Theatre des Champs-Elyseesen, azaroaren 1ean eta 6an, San Frantzisko Asiskoaren heriotzaren zazpigarren mendeurrenaren urtean.

1933tik 1936ra bitartean, Bizitza sakona berreskuratzeko hainbat saiakera egin ziren, tartean Euzko Abesbatza–Saski Naskik Donostian egindakoa, baina Gerra Zibilak zapuztu zuen azken hori. 1986an, konpositorearen jaiotzaren mendeurrenean, Errenteriako Musikastek obra berreskuratu zuen, Jose Luis Ansorenaren narrazio-proposamen batekin, Andra Mari Abesbatzarekin eta Euskadiko Orkestrarekin, Luis Izquierdoren zuzendaritzapean lehenik eta, hilabete batzuk geroago, Odon Alonsoren zuzendaritzapean, formatu berrikusian eta Euskadiko Orkestraren Denboraldi Sinfonikoan.

Oraingo honetan, obraren 1926ko estreinaldiaren mendeurrena dela-eta, Josu Okiñenaren edizio kritiko berrian etzungo dugu. Bertsioak Gheonek berak laburtutako testua erabiltzen du. Eresbilek babesten duen garrantzi handiko ondare-berreskuratze honen gidari Ernest Martinez Izquierdo izango da, Annie Dutoit-Argerich aktorearekin, Luken Munguira tenorrarekin eta Easo eta Easo Gazte abesbatzekin batera; horrez gain, Fernando Bernues arduratuko da eszena-zuzendaritzaz, David Ferre dramaturgia-zuzendaritzaz eta David Bernues argiztapenaz. Errepresentazio berri hori eta berreskuratze hori mugarri dira, eta euskal kultura-ondarearentzat errekonozimendu garrantzitsua izango dira.

Obra musikala

1926ko lau ordutik gorako emanaldi haietarako, Aita Donostiak ordubeteko musika sortu zuen, batez ere funtzionala, betiere Gheonen testuaren zerbitzura, baina, aldi berean, asmo handikoa, orkestraz gain hiru abesbatza erabili izanak erakusten duen bezala; eta ausarta, erabat garatutako hizkuntza sinfonikoa baitzuen, Frantziako abangoardietatik hurbilekoa, eta zenbaitetan politonalitatea edo bitonalitatea bezalako tekniketara hurbiltzen zena. Aita Donostiak, batez ere, San Frantzisko Asiskoaren eraldaketa-prozesuaren dimentsio espirituala indartu nahi izan zuen bere heriotzaren zazpigarren mendeurrenean.

Aita Donostiak idatzi zituen Ilustrazioak, jatorrian, antzezlan zabalean zehar 21 unetan txertatzeko pentsatutako zatiak eta musika-piezak dira. Edizio kritiko berriak 25 ilustrazio musikal ditu, 5 koadrotan banatuta.

Testuak frantsesez

Testua, bai antzezlanarena bai Aita Donostiaren jatorrizko partiturarena, frantsesez da, latinezko zati batzuekin. Obra sortu zeneko giro kulturalean hobeto kokatzeko, testu musikalen interpretazioa eta narrazioa jatorrizko frantsesez egingo da.

Iradokizun eszenikoa, Fernando Bernuesen esku

Eszena diseinatzearen arduradun izan den Fernando Bernuesentzat “Aita Donostiak La vie profonde de Saint François d’Assise ikuskizunerako konposatu zuen musika aparta berrikusteak, erabateko eszenaratze bat izan gabe, partitura adierazkor honen jatorria erreferentziatzen zuen iradokizun eszeniko bat eskatzen zuen. David Ferreren dramaturgiapean Annie Dutoit-Argerichek interpretatuko dituen Henri Gheonen testuek eta ikus-entzunezko baliabideek emango dute ‘antzerki lurrina’, kontzertuan zehar iradokitzen dena eta duela ehun urte obra berezi eta bikain honen konposizioa inspiratu zuena”.

“Narratzaileak, beraz, funtsezko lekua du pieza honen sorkuntzan. Ez du musika-zatien arteko elementu osagarri gisa jokatzen, baizik eta ezagutza-esperientzia bat eraikitzeko tresna gisa, San Frantzisko Asiskoaren ibilbide espiritual eta humanoan zehar lagundu, azaldu, gogora ekarri eta gidatzen duen figura gisa. Bere presentzia ez da pertsonaia bat ordezkatzen duen aktore batena, herentzia kultural eta espiritual bat transmititzen duenarena baizik”.

Aita Donostia (1886-1956)

Jose Gonzalo Zulaica, Aita Donostia izenez ezaguna, hamar urte zituela sartu zen Baztango haranean (Nafarroa) dagoen Lekarozko kaputxinoen ikastetxean. Bertan egin zituen ikasketak, eta irakasle aritu zen 1918ra arte. Urte hartan, irakaskuntza-lanetatik libre geratu zen, bere musika-jarduera zabaltzeko.

Madrilen hilabete batzuk eman ondoren (bertan abesbatza sortu zuen eta Pau Casals edo Wanda Landowska musikariak ezagutu zituen, besteak beste), 1920an Parisera joatea erabaki zuen, bere ezagutzak sendotzeko eta garai hartan Frantziako hiriburuan biltzen zen musika-modernitatera hurbiltzeko. Parisen Maurice Ravelekin harremanetan jarri zen, baita Henri Gheon antzerkigilearekin ere.

Aita Donostiak berak, ordurako Lekarozera itzulia, proposatu zion antzerkigileari bere ordenako zaindari San Frantzisko Asiskoaren figurara gerturatzea, 1926an haren heriotzaren zazpigarren mendeurrena oroitzeko. Hortik jaio zen Illustrations Musicales pour La vie profonde de Saint François d’Assise eta bere estreinaldia.

Proiektu musikal hau berreskuratzea mugarri garrantzitsua da euskal musika-ondarearen aintzatespenean, eta eragile ugari inplikatu ditu; BBVA Fundazioaren babes esklusiboa du.

BBVA Fundazioa: ezagutza zientifikoa eta kulturala bultzatzen

Ezagutza zientifikoa eta sorkuntza kulturala bultzatzeko eta sustatzeko konpromisoaren barruan, BBVA Fundazioak arreta berezia eskaintzen dio musika akademikoari, eta musikaren ekosistema osoari heltzen dio modu integralean: prestakuntzari, sorkuntzari, zabalkundeari eta bikaintasunaren aintzatespenari.

Gazteen talentua eta konposizioa sustatzeko, prestakuntza-ekimenak eta ikerketa sortzailerako laguntzak eskaintzen ditu. Alde batetik, Leonardo bekei esker, proiektu berritzaileak gauzatu daitezke; besteak beste, musika-, eszena- eta opera-lanak konposatu eta estreinatzeko proiektuak, bai eta musika-ondarea berreskuratu eta mundu mailako lehen grabazioetan jasotzekoak ere. Bestetik, interprete berrien garapena sustatzen du, Reina Sofia Goi Mailako Musika Eskolako Biola Katedra bezalako lankidetzen bidez.

Sustapen-lan hori eremu publikora ere zabaltzen da, herrialde osoko antzoki nagusietako batzuekin (hala nola Teatro Real, Gran Teatre del Liceu eta ABAO Bilbao Operarekin) eta erreferentziazko orkestrekin (Euskadiko Orkestrarekin, besteak beste) duen lankidetza-sare sendoaren bidez. Ondare hori gizartearengana hurbiltzeko, Fundazioak erreferentziazko bakarlari eta taldeekin doako kontzertu-zikloak antolatzen ditu, errepertorio klasikotik abangoardia garaikideraino. Fundazioaren Musika Denboraldiak ere leku nabarmena eskaintzen die interpretatzaile gazteei, baita sortzaile berriei eta ibilbide sendotua duten konpositoreei ere. Eskaintza hori osatzeko, dibulgazio-hitzaldiak eta argitalpen espezializatuak eskaintzen ditu, konposizioaren garai nagusietan sakontzeko edo egile handien lengoaia argitzeko.

Bikaintasun musikalari egindako nazioarteko aitortza osatzeko, Musikako eta Operako Jakintzaren Mugak Sariak eskaintzen ditu. BBVA Fundazioak urtero ematen duen sari horren bidez, munduko musika-eszenan eraldaketa handiena eragin duten ibilbideak aitortzen dira.  

Informazio gehiago

Larunbat honetan, urriak 31, 11:00etan, Euskadiko Orkestraren ganbera-musika ziklo Miramongo Matinéeen 26/27 Denboraldiko hirugarren hitzordua izango da. Eta oso berezia izango da gainera musika eta testuen narrazioa uztartuko baititu Ensemble Diatessaronek. XVI. mendetik XVIII. mendera bitarteko musika barrokoan eta errenazentistan espezializatutako taldea da, garaiko jatorrizko instrumentuekin interpretatzen du, errepertorio honetan espezializatutako musikari onenekin elkarlanean.

Matinée honetan arituko den ensemblea honakoek osatzen dute: Inmaculada Aramburo (biolin barrokoa), Rafael Bonavita (gitarra barrokoa), Jose Luis Toledano (narratzailea) eta Elena Martinez de Murguia (viola da gamba eta zuzendaritza).

EROSI SARRERAK HEMEN

‘Humanismo Errenazentista: Margarita Nafarroakoa eta François Rabelais. Gargantuatik Heptameronera. Barrea pizgarri eta kritika sozial gisa’ izeneko kontzertua aurkeztuko du Matinée honetan Ensemble Diatessaronek.

Margarita Nafarroakoa (1492-1549), Hamargarren Musa ezizenez ezaguna, Nafarroako erregina eta idazlea izan zen. Margaritaren testu ezagunena Heptamerona da. Bertan, hirurogeita hamabi kontakizun biltzen dira; ipuin laburrak dira, komikoak gehienak, eta baita profanoak ere, ideia errenazentistei lotuak. Bocaccioren Decameron lanarekin hasitako moda literarioari jarraitzen dio.

Margarita Nafarroakoak asko miresten eta errespetatzen zituen pentsalariak eta humanistak, besteak beste, François Rabelais (1483-1553), monjea, medikua eta idazlea. Garaikideak izan ziren, garai guztiz liluragarrian bizi izan ziren, eta elkar ezagutu zuten. Biak salatu zituzten herejetzat Sorbonnen, ezarritako elizaren kontrako kritikak egiteagatik. Rabelaisek bost eleberri idatzi zituen 1532 eta 1564 artean, Gargantua eta Pantagruel izenpean. Bertan, bi erraldoiren istorioa kontatzen du, Gargantua eta bere seme Pantagruelena, eta haien abenturak, modu satiriko, entretenigarri eta bitxian idatziak. Matinée honetan 1534ko Gargantua liburuaren kapituluak errezitatuko dira.

Margarita Nafarroakoa eta François Rabelaisen bi libururen kapituluen irakurketarekin batera, Attaignant, Certon, Ortiz, Sanz, Gervaise, Hume, Marais, Murcia eta Corelli bezalako egile barroko eta errenazentisten obra musikalak interpretatuko dira.

Sarrera solteak (11€) salgai daude euskadikoorkestra.eus webgunean eta Kursaal Auditoriumeko leihatilan. Gainera, orkestraren egoitzako leihatilan bertan ere eros ahal izango dira kontzertuaren egunean, leku libreak geratzen badira.

Miramongo Matinéetara eroso joateko, Euskadiko Orkestrak doako autobus-zerbitzua eskainiko du. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Informazio gehiago

Larunbat honetan, urriak 24, 11:00etan, Euskadiko Orkestraren ganbera-musika ziklo Miramongo Matinéeen 26/27 Denboraldiko bigarren hitzordua izango da. Bertan, H.E.C. laukoteak ‘Elkarrizketak intimitatean’ izeneko kontzertua eskainiko du. Lau interpreteetatik hiru Euskadiko Orkestrako kideak dira: Maialen Rezabal (biolina), Monika Mazur (biola) eta Beatriz Linares (biolontxeloa). Amaia Zipitriak osatuko du taldea pianoan.

EROSI SARRERAK HEMEN

Kontzertu honek XX. mendearen lehen erdiko espainiar ganbera-musikaren tradizio aberatsean murgiltzera gonbidatzen gaitu, formazio orekatu eta adierazkorrenetako baten bidez: pianodun laukotea (biolina, biola, biolontxeloa eta pianoa). Gainera, errepertorioak oso lotura historiko eta gizatiar ederra ezkutatzen du, Jesus Garcia Leoz Joaquin Turinaren ikaslerik nabarmenetakoa izan baitzen. Beren lanak elkarren segidan entzuteak belaunaldien arteko elkarrizketa bakarrera joateko aukera ematen digu: lehen urratsa ematen duen ikasle distiratsuarena eta, ondoren, soinu-unibertso horren guztiaren jatorria erakusten digun maisu kontsakratuarena.

Gaur egun bere izena publiko zabalarentzat hain ezaguna ez den arren, Jesus Garcia Leoz bere garaiko funtsezko figura izan zen, baita gerraosteko Espainiako zinemarako musika-konpositore emankor eta garrantzitsuenetako bat ere (Luis Garcia Berlangaren mailako zuzendariekin lan egin zuen). 1946an konposatutako Pianodun kuartetoak alderdirik intimo eta garbiena erakusten du. Obra honetan bere maisu Turinak kolorearen erabileran duen eragina antzematen da, kontzertuaren bigarren zatian kontrastatu ahal izango duguna, baina Leozek intentsitate emozionala eta malenkonia oso pertsonalak ematen ditu.

Joaquin Turinak, Manuel de Fallarekin batera, Espainiako musika mundu osoko kontzertu-aretoetara eraman zuen mugimendua gidatu zuen. Parisen ikasketak egin ondoren, Turinak bikain menperatzen zituen musika frantsesaren dotorezia eta egitura, baina bihotza beti erritmo andaluziarrean taupaka izan zuen. Hari eta pianorako 2. kuartetoa, 1931 urtean idatzia, erabateko heldutasuneko obra da.

Sarrera solteak (11€) salgai daude euskadikoorkestra.eus webgunean eta Kursaal Auditoriumeko leihatilan. Gainera, orkestraren egoitzako leihatilan bertan ere eros ahal izango dira kontzertuaren egunean, leku libreak geratzen badira.

Miramongo Matinéetara eroso joateko, Euskadiko Orkestrak doako autobus-zerbitzua eskainiko du. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Informazio gehiago

Jaitsi prentsa-materiala hemen

Euskadiko Orkestraren Musika Gelaren denboraldi berria aldarrikatzeko asmoz dator. Juan Crisostomo de Arriagaren figura aldarrikatuko du Arriaga bizi da ikuskizunaren bidez, bilbotar konpositorearen irudi liluragarria ezagutzera gonbidatzen baititu familiak. Emakumeen sorkuntza ere aldarrikatuko du bi produkzioren bidez: Aniztasuna harmonian, musikaren kalitateagatik baino emakume izateagatik ahaztutako konpositore askoren obrekin, Maite Aurrekoetxea bilbotarraren zuzendaritzapean, eta Mozart, Nannerl eta Lagunak, Maria Anna Mozarten historia berreskuratuko duena, bere anaia ospetsuarenarekin batera.

Eta gure jardueraren irisgarritasun osoa aldarrikatu nahi dugu. Logelan logale haur kantatak hirugarren edizio berria dakar: haur gorrentzako funtzio irisgarria eskainiko du, eta 16 gaztek zeinu-hizkuntzaren bidez abestuko dute, abesbatza pilotuarekin batera. Arriaga bizi da jendeari saio lasai gisa eskainiko zaio, duela bi denboraldi estreinatu zen eta geratzeko etorri den formatu batean. Saio lasaiek elkarbizitza inklusiborako ateak irekitzen dituzte, non familia guztiek besaulki-patioa partekatzen duten, desgaitasunen bat duten kideak dituzten familiak zein halako kiderik ez dutenak.  Gainera, saioak zentzumenen arabera egokitzen dira, eta protokoloa lasaitzen dute, mundu guztia erosoago senti dadin formatuarekin.

Eta, azkenik, Brassstorm, Euskadiko Orkestraren haize-boskote batek eskainiko duen kontzertua, gazteekin konektatzea helburu duena, haien kezka eta esperientzietan oinarrituta, eta gizarteak eta modek gure nortasunaren eta gustuen eraketan nola eragiten duten aztertuko duena. Kontzertu honen izenburuko hiru ‘S’-ak gure bizitzaren hiru alderdiri buruzkoak dira: Society (Gizartea), Sound (Soinua), Success (Arrakasta).

Denboraldia osatzeko, Musikazaleak programaren hirugarren edizioa egingo da, FEVAS-Plena Inclusion Euskadirekin batera, adimen- edo garapen-desgaitasuna duten pertsonen praktika musikala eta parte-hartze kulturala sustatzeko, bai eta dagoeneko ohikoak diren Entsegu Irekiak ere, orkestraren eguneroko lana ikastetxeetara eta gizarte-kolektiboetara hurbiltzen dutenak.

Aldarrikapena, inklusioa, berdintasuna, parte-hartzea, aurkikuntza eta emozioa dira, berriz ere, musika esperientzia partekatua eta pertsona guztientzat eskuragarria izan dadin sortutako programazioaren gakoak.

ZIKLOAREN PROGRAMAZIO OSOA

Bost ekoizpen propio

Urtez urte, Euskadiko Orkestrak bere ekoizpen propioak egitearen aldeko apustua egiten du, bere gizarte- eta hezkuntza-zikloaren esparruan estreinatzeko propio sortutako gidoi originalekin eta ikuskizunekin. Ziklo berriak bost ekoizpen ditu: Arriaga bizi da; Logelan logale; Aniztasuna harmonian; Mozart, Nannerl eta lagunak; eta Brassstorm.

Bost produkzio hauek bi formatutan aurkezten dira, Eskola Kontzertuetan eta Musika Familian kontzertuetan.

Alde batetik, Haur Hezkuntza, Lehen Hezkuntza eta Bigarren Hezkuntzako 7.000 ikasle inguruk parte hartuko dute aurtengo Eskola Kontzertuetan. Dozenaka ikastetxe ingurutik datozen ikasleak dira, herri askotakoak: besteak beste, Astigarraga, Elgoibar, Ezkio-Itsaso, Lazkao, Orio, Zarautz eta Zestoa. Sail honetako kontzertuek Gipuzkoako Batzar Nagusien, Gipuzkoako Foru Aldundiaren, Donostiako Udalaren Hezkuntza Sailaren, Kursaal Eszenaren eta Gasteizko Udalaren lankidetza dute gaur egun.

Bestalde, ekoizpenak Musika Familian kontzertu formatuan eskainiko dira Donostian eta Gasteizen. Euskadiko Orkestrak haur eta gazteei eskaintzen dizkien jardueren artean, ibilbide luze eta finkatuena duen atala Musika Familian kontzertuena da. Haurrek familiekin gozatzeko kultur aisialdiko eskaintza honek 30 urte daramatza orkestraren egitarauan. Donostian egingo diren Musika Familian kontzertuek El Diario Vascoren babesa dute, eta horietatik Kursaalen egingo dena, Brassstorm, Kursaal Eszenarekin lankidetzan prestatu da. Arabako hiriburuko kontzertuek, bestalde, Gasteizko Udal Antzoki Sarearen lankidetza dute. Ikuskizun guztietarako sarrerek 3 eta 8 euro bitarteko prezioa dute eta euskadikoorkestra.eus webgunearen bidez eros ahal izango dira, ikuskizunen datak hurreratu ahala. Dagokion aretoaren leihatiletan ere egongo dira salgai eta Kursaalen webgunean (kursaal.eus).

Jarraian ekoizpenei buruzko informazio xehea aurki daiteke, baita kontzertuen datak ere:

1) ARRIAGA BIZI DA

Emiliano Arriagak, ganbara txukuntzen ari dela, biolin zahar bat aurkitu du eta, bere hari desafinatuak laztantzean, memoriaren teklak sakatu ditu. Osaba musikari Juanitotaz gogoratzen hasi da: Parisen hil zen, aspaldi, 20 urte bete baino egun batzuk lehenago... Ez dakigu ia ezer bere nortasunari buruz, ezta bere bizitzari buruz ere, Bilbo alde zaharraren eta Parisen, une horretako musika-hiriburuaren, artean igaro baitzen. Horregatik, gure kontzertuan Juanito benetan nolakoa zen asmatzera edo irudikatzera jolastuko dugu, beti bere musikaren bidez, bere garaiko beste musikari batzuen bidez eta agian bilbotar maitagarri eta bikain honekin une batez hitz egiteko aukera emango digun Adimen Artifizialaren laguntzaz.

Parte-hartzaileak: Larraitz Oiartzabal (biolina); Ana Belen García (pianoa); Luken Munguira (tenorra)

Gidoia: Ana Belen Garcia, Amagoia Elosegi, Alaia Belaunzaran (Mikel Cañadaren zuzendaritzapean)

AAren aplikazioa: ACC Comunicacion

Programa:

• J. Arambarri: Atea tan tan
• J. C. de Arriaga: Erromantza pianorako
• M. Albéniz: Sonata ren
• J. C. de Arriaga: Bariazioak hungariar erara biolin eta pianorako / Edipo en Colono (Aria)
• P. Albéniz: Alboradetako soinua
• W. A. Mozart: Davide penitente (Aria)
• J. C. de Arriaga: Los esclavos felices (obertura) / Nada y mucho

ESKOLA KONTZERTUAK (Lehen eta Bigarren Hezkuntza)
Urriak 15, 16, 19, 20, 21, 22 (9:45 / 11:15), Miramon (Donostia)

MUSIKA FAMILIAN (saio lasaia)
Urriak 17 (12:00*), Miramon (Donostia)

*Kontzertuaren aurretik, 10:45ean, sentsibilizazio-tailer bat eskainiko da, osagarria, aukerakoa eta doakoa. Izen-ematea: musikagela@euskadikoorkestra.eus

2) LOGELAN LOGALE

Kantata erraldoi eta garrantzitsu hau hirugarren denboraldiz jarraian egingo da eta, lehendabizikoz, haur gorrei eskainiko zaie. Horietako hamaseik zeinu-hizkuntzaren bidez abestuko dute, Easo Gaztek, Andoaingo Udal Musika Eskolak eta Hernaniko Udal Musika Eskolak osatutako abesbatza pilotuarekin batera.

Parte-hartzaileak: Jagoba Astiazaran (jatorrizko musika); Leire Bilbao (libretoa); Euskadiko Orkestra; Juanjo Ocon (zuzendaria); Kepa Errasti (abeslaria eta aktorea); Eva Ugalde (abesbatza zuzendaria)

Programa: Preludioa / Kask-kask! / Gauaren beltza / Oheko burkoa / Gaueko / Harri, orri, ar / Mamua ote da? / Nire itzala / Hitz jolasak / Ispiluaren aurrean / Logelan logale

ESKOLA KONTZERTUAK (Lehen eta Bigarren Hezkuntza)
Azaroak 13 (11:00), Miramon (Donostia)

3) ANIZTASUNA HARMONIAN

Kontzertu honek oso ohikoa ez den errepertorio musikala proposatzen du eta barne hartzen ditu emakumeek idatzitako obra sinfonikoak —urte askotan orkestren programazioetatik kanpo egon direnak— eta beste kultura eta arraza batzuetako musikariek konposatutako lanak.

Parte-hartzaileak: Euskadiko Orkestra; Maite Aurrekoetxea (zuzendaria); Ana Egiazabal (aurkezlea)

Programa:

• R. García Ascot: Orkestrarako suitea (I. mugimendua)
• F. Price: 3. Sinfonia (III. Juba. Allegro)
• R. Sierra: 3. Sinfonia (III. Dantzak)
• L. Farrenc: 3. Sinfonia (zatiak)
• A. Beach: Sinfonia gaelikoa (zatiak)
• G. Tailleferre: Suite txikia orkestrarako
• G. D. Weiss: What a Wonderful World (moldaketa: T. Goodman)
• W. Dawson: Negro Folk Symphony (I. The Bond of Africa)

ESKOLA KONTZERTUAK (Lehen eta Bigarren Hezkuntza)
Urtarrilak 21, 22 (9:45 / 11:30), Kursaal (Donostia)

4) MOZART, NANNERL ETA LAGUNAK

Bi protagonista nagusi izango ditu kontzertu honek: musika klasikoaren pertsonaia entzutetsuenetako bat, Wolfgang Amadeus Mozart, eta bere arreba Maria Anna Mozart, hura ere konpositorea, baina zeinaren obra gehienak galdu egin diren historian barrena. Nannerl —Maria Annaren goitizena— berpiztu egingo da gure aurrean ezagutzera emateko eta gu bere anaiaren musikara hurbiltzeko.

Parte-hartzaileak: Larraitz Oiartzabal (biolina); Nathalie Dabadie (biolina); Justyna Janiak-Krymer (biola); Jon Larraz (biolontxeloa); Sara Zufiaurre (klarinetea); Pedro Jose Rodriguez (pianoa); Monica Torres (aktorea)

Programa:

• W. A. Mozart: Klarinete eta harirako kintetoa (I. Allegro); 13. Serenata (I. Allegro); Klarineterako Kontzertua (II. Adagio); Piarnorako 12. Sonata (I. Allegro); Pianorako 11. Sonata (III. Rondo: Alla Turca); Pianorako 12. Sonata (III. Adagio); 12 bariazio ‘Ah, vous dirai-je Maman’ lied gainean (1, 3, 7, 10 bariazioak); Klarineterako Kontzertua (III. Rondo: Allegro)
• L. Mozart: Nannerlen koadernoa

ESKOLA KONTZERTUAK (Haur Hezkuntza)
Otsailak 18, 19, 22, 23, 24, 25 (9:45 / 11:30), Miramon (Donostia)

MUSIKA FAMILIAN (3 < 6 urte)
Otsailak 14 (17:00 / 18:30), Garcia Lorca (Gasteiz)
Otsailak 20 (11:00 / 12:30), Miramon (Donostia)

5) BRASSTORM

Metal boskote baten kontzertua, gazte sektorearekin eta bere kezka eta esperientziekin konektatzea helburu duena. Joerek eta modek gure nortasunaren eta gustuen eraketan nola eragiten duten aztertuko dugu.

Parte-hartzaileak: Euskadiko Orkestraren metal boskotea; Ana Egiazabal (aurkezlea)

Programa:

• A. Copland: Fanfare for the Common Man
• E. Crespo: Suite americana nº1 (Vals Peruano)
• T. Susato: Susato suite: La mourisque / Basse danse bergeret
• W. A. Mozart: Pianorako 11. Sonata (III. Rondo: Alla Turca)
• W. Kilar: The Pianist (Moving to the Ghetto Oct. 31, 1940)
• L. Maurer: Hiru pieza metal boskoterako
• L. Serrano: Una de aventuras
• A. Piazzolla: Libertango
• D. Xostakovitx: Torlojua (Dantza satirikoak)
• B. Berns, J. Wexler & S. Burke: Everybody Needs Somebody to Love

MUSIKA FAMILIAN (>12 urte)
Apirilak 18 (18:00*), Felix Petite (Gasteiz)
Apirilak 24 (18:00*), Kursaal, Ganbera Aretoa (Donostia)
*Kontzertuen aurretik, 16:45ean, sentsibilizazio-tailer bana eskainiko da, osagarria, aukerakoa eta doakoa. Izen-ematea: 943003170 (Donostia) / 945161045 (Gasteiz).

Musikazaleak

Euskadiko Orkestrak ibilbide luzea darama Musika Gelan inklusioaren alde, FEVAS-Plena Inclusion Euskadiren eskutik. Bi erakundeak duela 15 urte baino gehiago hasi ziren elkarlanean, adimen- edo garapen-desgaitasuna duten pertsonen inklusioa eta kulturarako eskubidea sustatzeko. Harrezkero, 1.500 pertsona baino gehiagok hartu dute parte hainbat jardueretan, eta horien artean nabarmenenak, Bilbo, Gasteiz eta Donostian egin diren tailerrak eta Miramongo egoitzan egin diren kontzertuak izan dira. Jarduera horiek “Praktika On” izendatu zituen FEAPSek, Adimen ezintasuna dutenen aldeko Elkarteen Espainiar Konfederakuntzak. Soinu Mosaikoa egitasmoak ere lankidetza horretan du sorburua. Ekimen hori Espainiako 14 orkestretara hedatu zen, musika garapen pertsonalerako eta gizarteratzeko tresna bihurtzen duen praktika aitzindari gisa. Ekimen honek CERMI 2018 sari nazionala jaso zuen musikaren bidez desgaitasunaren inklusioa sustatzeagatik. Euskadiko Orkestrak Aspalagun 2025 aitorpena ere jaso zuen Musika Gelaren esparruan egiten duen kontzientziazio- eta ikusarazte-lanagatik.

Duela bi denboraldi proiektu partekatu honek urrats berri eta garrantzitsu bat eman zuen Musikazaleak ekimenaren aurkezpenarekin. Ekimena adimen- edo garapen-desgaitasuna duten hamabost bat pertsonako hiru talde egonkor osatzean datza (bana Bilbo, Donostia eta Gasteizen). Talde horiek zortzi musika-tailerretan parte hartuko dute ikasturtean zehar. Tailerrei amaiera emateko, kontzertu bat eskainiko da 2025eko ekainean, ikasturtean egindako lana erakusteko.

Yamel Romero musikagile, musikoterapeuta eta musikaren bidez ekipoak eta pertsonak laguntzen eta garatzen espezializatutako sofrologoak zuzentzen ditu tailer hauek. Musikeneko Musika-arloko Bitartekaritza, Kudeaketa eta Zabalkundeko masterreko ikasleen inplikazioa izango du egitasmoak. Tailer hauek babesle dituzte Bilboko Juan Crisostomo de Arriaga Kontserbatorioa eta Gasteizko Udal Antzoki Sarea.

Entsegu Irekiak

Musika Gelak Entsegu Irekiekin jarraituko du. Entsegu hauek kolektiboei, ikastetxeei, kontserbatorioei eta unibertsitateei, besteak beste, daude irekiak, eta aukera eskaintzen dute orkestrak kontzertu baten aurretik egiten duen azken lana gertutik ezagutzeko. Denboraldi honetan hiru Entsegu Ireki eskainiko dira Kursaalen:

• Abenduak 3: E. Elgar, Enigma Variations (Zuzendaria: Marzena Diakun)
• Otsailak 1: R. Schumann, Genoveva. Obertura & 4. Sinfonia (Zuzendaria: Philipp von Steinaecker)
• Apirilak 22: G. Mahler, 6. Sinfonia (Zuzendaria: Pablo Gonzalez)

MUSIKA GELA YOUTUBEN

Musika Gelak atal propioa du Euskadiko Orkestraren YouTubeko kanalean, eta bertan zikloko ikuskizun osoak ikus daitezke, besteak beste, Nire ama antzara; Musika tantak; Ilargiari kantari; Boléro; Polikinela; eta Living Room Music. Gainera, aurtengo Denboraldiko kontzertuen bideoak ere igoko dira bertara, ikuskizunak gauzatu ahala.

LANKIDETZA-SARE ZABALA

Euskadiko Orkestraren Musika Gelak inguruko erakunde ugarirekin elkarlana sustatzen jarraitzen du. Lankide ditu Gipuzkoako Batzar Nagusiak, Gipuzkoako Foru Aldundia, Donostiako Udalaren Hezkuntza Saila, Gasteizko Udal Antzoki Sarea, Kursaal Eszena eta El Diario Vasco.

INKLUSIOA SUSTATZEN DUTEN PROIEKTU ETA SAREAK

Musika Gela zikloa ARTIS+: Artea, gizarteratzeko ekimenaren parte da. Mugaz gaindiko Europako lankidetza-proiektu honek helburu du kultura-ekipamenduen irisgarritasuna hobetzea bazterketa-arriskuan dauden biztanle-taldeentzat, dela desgaitasunagatik, dela arrazoi sozialengatik.

Proiektu hau 2027ra arte luzatuko da eta honako bazkideak izango ditu, besteak beste: Orchestre National du Capitole de Toulouse, Bartzelonako L’Auditori eta OBC Orkestra eta Paueko Orkestra.

Ildo beretik, Musika Gelaren programazioa Gertu Kulturaren parte da, hau da, zaurgarritasun egoeran dauden pertsonek kultura eskura izan dezaten laguntzeko elkartu diren kultura-programatzaileen sarearen parte.

Irabazi asmorik gabeko ekimen honen helburua kulturaren bitartez pertsonen bizi-kalitatea hobetzea da. Horretarako, kultura-espazio eta -esperientzia bereziak biltzen ditu prezio oso murritzetan, lehentasunarekin eta kolektibo ezberdinen beharrak entzutean eta behar horiei erantzutean oinarritutako tratu pertsonalizatuarekin. Gertu Kultura Apropa Cultura Saretik dator; sare hori Bartzelonako Auditori musika-zentroan abiarazi zen eta, Katalunian ia bi hamarkadako ibilbidea egin ondoren, erreferentziazko sare inklusiboa da gaur egun, 190 kultura-programatzaile baino gehiagorekin, 1.800 gizarte-erakunde baino gehiagorekin eta 54 udalerri baino gehiagorekin.

Musika Gelaren proposamenetako batean parte hartzen duten elkarteak:

Apdema, Apnabi, Aspace, Atzegi, Futubide, Gaude, Gautena, Gertuan, Gorabide, Goyeneche, Uliazpi, Usoa, Erroak-Sartu Elkartea, Emaus, Elkargune, Bagara-Gureak, Garagune, Centro Gerontológico Berio, Centro de día de Daño Cerebral, Centro de rehabilitación psicosocial Maldatxo.

ARTIS+

Ziklo hau ARTIS+ proiektuaren parte da, eta proiektu hau Europako Batasunak finantzatzen du %65ean Interreg VI-A Espainia-Frantzia-Andorra (POCTEFA 2021-2027) programaren bidez.

Informazio gehiago

Euskadiko Orkestraren Musika Gela hezkuntza-zikloaren Denboraldi berria urriaren 17an, larunbata, hasiko da, lehen Musika Familian kontzertu batekin. Arriaga bizi da izeneko programa batean orkestraren Miramongo egoitzak kontzertu bat hartuko du 6 urtetik aurrerako haurrentzat, 12:00etan.

Adimen Artifizialarekin egindako sei bideo-eszenatan Juan Crisostomo de Arriaga konpositore bilbotarra bizira ekarriko du Euskadiko Orkestrak, alderantziz kontatuko den istorio batean: hilerritik hasi (19 urte besterik ez zituela) eta haurtzarora arte.

Euskadiko Orkestraren ekoizpen honen protagonista musikalak Luken Munguira tenorra, Emilianoren ahotsean (Juan Crisostomo de Arriagaren osaba), Ana Belen Garcia pianista eta Larraitz Oiartzabal Euskadiko Orkestrako biolinjolea dira. Mikel Cañada, Euskadiko Orkestraren Musika Gelaren koordinatzailea da ekoizpen honen zuzendaria. Bere zuzendaritzapean, Ana Belen Garcia, Amagoia Elosegi eta Alaia Belaunzaranek idatzi dute gidoia. ACC Comunicacion agentziak egin du Adimen Artifizialaren aplikazioa.

Eszenaratzea bi planotan gertatzen da, eta plano horiek, eszenatoki berean gertatzen badira ere, desberdinak dira. Alde batetik, Adimen Artifizialaren bidez Juan Crisostomo de Arriaga irudimenezko mundu batean ikus ahal izango dugu. Bi izaera uztartuko ditu pertsonaiak: euskal Mozart —ezizenez—, eta Juanito—hala sentitzen zen bera gehienbat—.

Arriagak, pantailatik, bere istorio propioa gidatuko du, Bilboko alde zaharretik abiatu eta Parisera iritsi arte. Bigarren planoan, hezur-haragizkoan, lur hartuko du istorioak, eta bertan osaba Emilianok (Luken Munguira) ilobaren partitura goiztiarretako batzuk ezagutzera emateko beste istorio batzuk kontatu eta kantatuko ditu.

Saio lasaia

Ekoizpen hau joan den udaberrian estreinatu zen Kursaalen, eta orain Miramonera ekarriko da, familiei irekitako saio lasai formatuan. Saio lasaiek elkarbizitza inklusiborako ateak irekitzen dituzte, non familia guztiek besaulki-patioa partekatzen duten, desgaitasunen bat duten kideak dituzten familiak zein halako kiderik ez dutenak. Elkarteek astegunetan antolatzen dituzten jardueretatik kanpo desgaitasunen bat duten pertsonek gehien nahi dutenarekin banaka parte har dezaten sustatzeko modu bat da, gainerako pertsonek beren portaera epaitzeko beldurrik gabe.

Beren beharretara hobeto egokitzeko asmoz, saio lasaiek ohiko kontzertu bateko errutinak baino toleranteagoak diren baldintzak betetzen dituzte, ohiko protokoloa hain zorrotz jarraitu gabe. Kontzertu-aretoko ateak irekita egongo dira saio osoan zehar, gure publikoa ekitaldi osoan zehar sartu eta irten ahal izateko, nahieran. Aretoa beti argiztatuta egongo da, ilunpean gera ez dadin, eta arreta berezia jarriko da argi distiratsurik, zarata gogorrik eta ezusteko elementu sentsorialik egon ez dadin. Ikus-entzule guztiek jarrera lasaia izango dute ikuskizunean zehar edozein zarata edo mugimenduren aurrean.

Aretotik irten behar izanez gero, sarrerako hall-a espazio alternatibo bat izango da, gure publikoak atseden hartu ahal izateko eta, prest dagoenean, berriz ere ekitaldiarekin bat egin ahal izateko. Eta artistak eta langileak sentsibilizatuta egongo dira inklusio-praktika onenekin.

Sarrerak salgai

Kontzertu hauetarako sarrerak salgai daude 5 euroko prezioan 12 urtetik beherakoentzat, eta 8 eurotan publiko orokorrarentzat, euskadikoorkestra.eus webgunean edo Kursaaleko leihatilan. Kontzertuaren egunean bertan ere eskuratu ahal izango dira Miramongo Egoitzako leihatilan, beti ere leku libreak geratzen badira.

Askotariko proposamenez jositako denboraldia

Musika Gela zikloaren Denboraldi berria adin ugaritako publikoari zuzendutako askotariko proposamenez beteta dator. Zikloaren programazio osoari buruzko xehetasunak urri erdialdera emango dira ezagutzera.

Informazio gehiago

Larunbat honetan, urriak 3, 11:00etan, Euskadiko Orkestraren ganbera-musika ziklo Miramongo Matinéeen 26/27 Denboraldiko lehenengo hitzordua izango da. Bertan, Zeruko Laukoteak ‘Brahmsen ondarea’ izeneko kontzertua eskainiko du. Lau interpreteetatik hiru Euskadiko Orkestrako kideak dira: Ricardo Ruiz (biolina), Gabriel Mesado (biolontxeloa) eta Sara Zufiaurre (klarinetea). Amaia Zipitriak osatuko du taldea pianoan.

EROSI SARRERAK HEMEN

Johannes Brahmsen Biolontxelorako 1. Sonata Erromantizismoko ganbera-errepertorioko obra garrantzitsuenetako bat da. 1862 eta 1865 artean konposatutako obra honetan Brahmsek adierazpen sakoneko eta egitura sendoko hizkuntza garatu zuen, eta tradizio klasikoaren zorroztasuna sentsibilitate erromantiko biziarekin uztartu zuen. Sonata honek Brahmsek kontrapuntuarekiko eta iraganeko forma musikalekiko zuen interesa islatzen du bereziki, eta elementu horiek aberastasun melodiko eta adierazkor handiko idazkerarekin erakusten ditu. Pianoaren eta biolontxeloaren arteko elkarrizketa sakonak bi instrumentuak protagonista bihurtzen ditu oreka handiko diskurtso musikal batean.

Hiru hamarkada geroago, Walter Rablek Piano, klarinete, biolin eta biolontxelorako kuartetoan ganbera errepertorioaren ideal horri luzapena eman zion. Obra honetan hizkuntza brahmsiarraren eragina hautematen da idazkera finaren, lan tematiko garatuaren eta ahots instrumentalen kontzepzio sakon integratuaren bidez. Rablek 1896an Vienako Musikaren Lagunen Elkarteko konposizio lehiaketara aurkeztu zuen obra da. Brahms epaimahaiko kidea zen eta erabat txundituta geratu zen obrarekin. Haren babesa erabakigarria izan zen partitura argitaratzeko eta zabaltzeko.

Bi obra hauek zubi-lana egiten dute XIX. mendearen bigarren erdialdeko Erromantizismo alemaniarraren une gorenaren eta amaieraren artean. Brahmsek aparteko moduan gorpuztu zuen garai hori eta Rabl bezalako konpositoreek mendearen azken urteetan garatzen jarraitu zuten ganbera-tradizio hori.

Sarrera solteak (11€) salgai daude euskadikoorkestra.eus webgunean eta Kursaal Auditoriumeko leihatilan. Gainera, orkestraren egoitzako leihatilan bertan ere eros ahal izango dira kontzertuaren egunean, leku libreak geratzen badira.

Miramongo Matinéetara eroso joateko, Euskadiko Orkestrak doako autobus-zerbitzua eskainiko du. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

16 hitzordu berri Miramongo Matinéeen 26/27 Denboraldian

Urriaren 3tik aurrera 16 hitzordu berri ekarriko ditu Euskadiko Orkestraren ganbera-musika ziklo berriak, eta sarrerak salgai daude.

Denboraldi honetako hitzordu berezienen artean urtarrileko San Sebastian Egunaren ospakizuna nabarmentzen da, Danborradaren eta Donostiako inauteriaren iruditeria musikalean inspiratutako programa batekin. Jazzak presentzia nabarmena izango du, lehenik Claude Bollingen unibertsoaren bitartez zortzigarren Matinéeean eta ondoren Tcha Limberger multiinstrumentista, abeslari eta konpositore belgikarraren bisitarekin, jazz manouchearen nazioarteko erreferentzia handienetako bat. Gonbidatuen atalean, gainera, musika garaikidearen interpretazioan erreferentziazkoa den Kea Ahots Taldeak ere parte hartuko du, bere 30. urteurrena ospatzeko Josu Okiñenarekin batera. Horrez gain, gaur egungo piano-panoramako interprete paregabe eta originalenetako bat ere izango dugu, Steven Lin, Arthur Rubinstein Nazioarteko Lehiaketaren irabazlea. Gonbidatuen kapituluari amaiera emateko, Miramongo Matinéeetara itzuliko da Ensemble Diatessaron. Musika barrokoan eta errenazentistan espezializatutako taldeak Humanismo Errenazentista: Margarita Nafarroakoa eta François Rabelais izeneko programa ekarriko du, eta musika eta Jose Luis Toledano narratzaileak errezitatutako testuak uztartuko ditu. Gainera, Euskadiko Orkestrako dozenaka kidek instrumentu-konbinazio ugariko hirukoteak, laukoteak eta boskoteak osatu dituzte, barrokotik gaur egunera arteko askotariko errepertorioa eskaintzeko.

Informazio guztia hemen

Informazio gehiago

Euskadiko Orkestrak 2026/27 Denboraldi Sinfonikoari hasiera emango dio ‘Mahler 2. Berpizkundea’ izeneko kontzertu-programarekin. Kontzertuak datozen egunotan izango dira ohiko lau hiriburuetan: ostiralean, irailak 25, Bilboko Euskalduna Jauregian; astelehenean, irailak 28, Gasteizko Jesus Guridi Kontserbatorioan; astearte eta asteazkenean, irailak 29 eta 30, Donostiako Kursaal Auditoriumean; eta larunbatean, urriak 3, Iruñeko Baluarte Auditoriumean. Kontzertu guztiak 19:30ean izango dira.

EROSI SARRERAK HEMEN

Gustav Mahlerren musikak funtsezko garrantzia izan du Euskadiko Orkestraren historia hurbilean. 2013az geroztik, orkestrak haren ziklo sinfoniko osoa interpretatu du (“Milakoen” Sinfonia eta Lurraren kantua barne), eta konpositore bohemiarrak presentzia handia izango du berriro gaur hasten den Denboraldi honetan, “Berpizkundea” 2. Sinfonia monumentalarekin. Mahlerrek larritasun existentzialetik berpizkundearen itxaropenera doan soinu-bidaia proposatzen du. Bost mugimendutan zehar garatzen da, hileta-erritu batekin hasi eta ia liturgikoa den eragin handiko amaiera koral batean amaitzen dena.

Iraupen luzea du, ordu eta erdi ingurukoa, eta 2. Sinfonia bizitzari, heriotzari eta berpizkunde espiritual baten aukerari buruzko gogoeta sakon eta zabala da. 1888 eta 1894 artean idatzia, Mahlerren sinfonia koral handietako lehena izan zen, baita haraindiko gaia berariaz jorratu zuen lehena ere; gainera, bizirik zela arrakasta handiena ekarri zioten obretako bat bihurtu zen. Berlingo Filarmonikoak estreinatu zuen, Mahler bera zuzendari zela.

Abesbatzaren esku-hartzeak —pianissimo sartzen da eta gero soinu-espazio osoaz jabetzen da— finale osoaren izaera nolabait teatrala azpimarratzen du; horrek, neurri handi batean, obrak lehen interpretazioetatik sortu zuen inpaktua azaltzen du.

Programako artistak

Lucas Macias, bere belaunaldiko oboejole handienetako bat da eta Real Orquesta Sinfonica de Sevilla, Oviedo Filarmonia eta Orquesta Ciudad de Granada orkestren zuzendari titularra ere bai. Berak gidatuko du Euskadiko Orkestra bidaia metafisiko honetan eta ondoan izango ditu Jone Martinez soprano bizkaitarra, Europa osoan gehien eskatzen den euskal ahotsetako bat, bereziki antzinako musikaren esparruan; eta Nadezhda Karyazina mezzosoprano errusiar-suitzarra, Bolxoiko artista gazteen harrobitik sortua eta 2025ean Herbert von Karajan saria jaso zuena.

Eta, jakina, eszenatokian izango da Donostiako Orfeoia, sinfonia hau mundu osoko agertokietan bere aurkezpen-gutun bihurtu duena, Claudio Abbado bezalako maisu mitikoekin interpretatuz; hain zuzen ere, Abbado Lucas Maciasen mentorea izan zen zuzendari gisa egin zituen lehen urratsetan.

Sarrerak eta abonamenduak

Donostia, Bilbo eta Iruñeko kontzertuetarako sarrerak salgai daude euskadikoorkestra.eus webgunean eta auditoriumetako leihatila eta webguneetan, 10 eurotik aurrera. Bestalde, hiru hiri horietako abonuen salmenta ere zabalik dago, 87 eurotik aurrera, euskadikoorkestra.eus webgunean edo 943013232 telefonoan.

26/27, Hunkitzeko Denboraldia

Denboraldi berriak giza izaeraren galdera handietan barrena doan ibilbidea proposatzen du: bizitza eta heriotza, patua, itxaropena, memoria, identitatea edo askatasuna. Gustav Mahlerren espiritualtasunetik Dmitri Xostakovitxen tentsio politikora; Bachen soinu-unibertsotik Stravinskiren modernitatera; Aita Donostiaren eta Jesus Guridiren euskal musika-ondaretik Pacho Floresen latinoamerikar bizitasunera doan bidaia.

Denboraldiko erradiografia musikalean, Aita Donostiak orain 100 urte, 1926an, Parisen estreinatu zuen La vie profonde de Saint François D’Assise obra berreskuratzeko egindako lanarekin egingo dugu dardara. Frantziako hiriburuak, abangoardiaren erdigune gisa, beste konpositore garaikide batzuk ere bildu zituen: Falla eta haren lagun Debussy eta Stravinski, adibidez. Hain zuzen ere, programa honek erakutsiko digu XX. mendeko musika berritzeko prozesuan ezinbesteko hiru zutabe bihurtu zirela. Musika-arkitekturaren beste zutabe garrantzitsu batek Bachengana eramango gaitu, aitzakia eta inspirazio gisa. Izan ere, XIX. eta XX. mendeetako zazpi sortzailek jenio alemaniarraren perfekzio teknikoa berrasmatu zuten, bizitza berria emanez. Denboran jauzia eginda, Pacho Flores venezuelarraren Amerikara iritsiko gara eta tronpetan duen birtuosismoa ezagutuko dugu, lore, tango, kantu eta bihurguneen istorioekin jolasteko.

Urte askoren ondoren, Denboraldira itzuliko dira pianoan eta musika garaikidearen historian erreferente diren bi: Christian Zacharias, pianista eta zuzendari gisa arituko dena, eta Elisabeth Leonskaja. Artista handi horien beteranotasunarekin kontrajarrita iritsiko dira abesbatzen harrobitik ateratako Luken Munguira tenorraren gaztetasun oparoa eta Jone Martinez, dagoeneko nazioartean ibilbide entzutetsua egiten ari dena. Eta lurraldeko abesbatza ugari izango ditugu ondoan: Donostiako Orfeoia, Easo Abesbatza eta Bilboko Koral Elkartea. Beste ahots batzuek, kasu honetan anonimoek, abesbatza berria osatuko dute Abestu Euskadiko Orkestrarekin ekimenaren hirugarren ediziorako.

26/27 Denboraldiari buruzko informazio osoa hemen

Informazio gehiago

Urriaren 3an, larunbata, hasiko da Euskadiko Orkestraren egoitzan Miramongo Matinéeen 2026/2027 Denboraldia; 35 denboraldi daramatzate formazio handiaren soinu sinfonikoari kalitatezko alternatiba bat eskaintzen, formatu arin eta hurbil batean. Euskadiko Orkestraren ganbera-zikloak larunbat goizetako musika erritual txiki bat eskaintzen du, eta denboraldiro hamasei hitzordu ezberdin eta iradokitzaile ekartzen ditu. Sortu zenetik Kutxa Fundazioaren babesa duen zikloak ekainaren 19ra arte iraungo du.

Askotariko egitaraua

Denboraldi honetako hitzordu berezienen artean urtarrileko San Sebastian Egunaren ospakizuna nabarmentzen da, Danborradaren eta Donostiako inauteriaren iruditeria musikalean inspiratutako programa batekin. Jazzak presentzia nabarmena izango du, lehenik Claude Bollingen unibertsoaren bitartez zortzigarren Matinéeean eta ondoren Tcha Limberger multiinstrumentista, abeslari eta konpositore belgikarraren bisitarekin, jazz manouchearen nazioarteko erreferentzia handienetako bat. Gonbidatuen atalean, gainera, musika garaikidearen interpretazioan erreferentziazkoa den Kea Ahots Taldeak ere parte hartuko du, bere 30. urteurrena ospatzeko Josu Okiñenarekin batera. Horrez gain, gaur egungo piano-panoramako interprete paregabe eta originalenetako bat ere izango dugu, Steven Lin, Arthur Rubinstein Nazioarteko Lehiaketaren irabazlea. Gonbidatuen kapituluari amaiera emateko, Miramongo Matinéeetara itzuliko da Ensemble Diatessaron. Musika barrokoan eta errenazentistan espezializatutako taldeak Humanismo Errenazentista: Margarita Nafarroakoa eta François Rabelais izeneko programa ekarriko du, eta musika eta Jose Luis Toledano narratzaileak errezitatutako testuak uztartuko ditu.

Gainera, Euskadiko Orkestrako hamaika kidek instrumentu-konbinazio ugariko hirukoteak, laukoteak eta boskoteak osatu dituzte, barrokotik gaur egunera arteko askotariko errepertorioa eskaintzeko. Hori guztia formatu arin, lasai eta kalitatezkoan, ordubete inguruko iraupenekoa, musikariei dibertsifikatzeko aukera ematen diena, ohiko habitat sinfonikotik ateratzen baitira. Zeruko Laukotea, Camerata Iberia, Xarma eta Barrococo dira Miramongo eszenatokira igoko diren taldeetako batzuk.

Hamasei hitzordu

Proposamen horiek guztiek menu erakargarri bat osatzen dute, eta bertan edonork aurki dezake bere altxor berezi eta propioa. Hona hemen Miramongo Matinéeen Denboraldiko egutegia:

• Urriak 3: Zeruko Laukotea
• Urriak 24: H.E.C.
• Urriak 31: Ensemble Diatessaron
• Azaroak 14: La Brisa Ensemble
• Azaroak 28: Eguzkilore
• Abenduak 12: Camerata Iberia
• Urtarrilak 16: Irauli
• Otsailak 6: ClasiJazz Quintet
• Otsailak 13: Xarma
• Otsailak 27: Kea Ahots Taldea & Josu Okiñena
• Martxoak 13: Steven Lin
• Apirilak 10: Tcha Limberger Quintet
• Apirilak 24: Trio 23
• Maiatzak 15: Duo Cantabile
• Maiatzak 29: Euskadiko Celli
• Ekainak 19: Barrococo

Sarrerak eta azken abonamenduak

Sarrera solteek 11 euroko prezio bakarra dute eta salgai daude euskadikoorkestra.eus webgunean eta Kursaal Auditoriumeko leihatilan. Gainera, eserleku librerik balego, orkestraren egoitzako leihatilan bertan erosi ahal izango dira dagokion kontzertuaren egunean.

16 kontzertuetarako abonamenduak 96 euroko prezioa orokorra du, eta 75,20 euroko tarifa berezia onuradunentzat (65 urtetik gorakoak, 30 urtetik beherakoak, orkestrako beste zikloetako abonatuak, Kursaal Eszenako abonatuak, Eureka! Zientzia Museoko lagunak eta Musikene). Jada eskuragarri dago euskadikoorkestra.eus webgunean eta orkestraren bulegoetako telefonora deituz (943 01 32 32). Azken abonamenduak baino ez dira geratzen.

Autobus-zerbitzua

Kontzertuak larunbatetan izango dira, goizeko 11:00etan, Euskadiko Orkestraren Miramongo egoitzan. Horietara eroso joateko, Euskadiko Orkestrak doako autobus zerbitzua eskaintzen jarraituko du Matinéetara bertaratu nahi duen ororentzat. 10:25ean abiatzen da Gipuzkoa Plaza 4 zenbakitik eta geldialdiak egiten ditu Antso Jakituna 18an eta Madril Hiribidea 34an.

Informazio gehiago

Juan Jose Ocon donostiarra izango da oraingoan ere zine eta soinu-banden elkartze hau zuzentzeaz arduratuko dena. Kontzertua hasteko, belaunaldi oso baten soinu-banda den Carmelo Bernaolaren pieza-sorta izango dugu: Verano Azul, Tormento, El jorobado de la morgue, La clave eta Espérame en el cielo. Horren ostean izango ditugu Carla F. Benedictoren Papeles; Beatriz Lopez-Nogalesen Sacamantecas; Diego Navarroren Winnipeg, el barco de la Esperanza; Alfred Tapscotten Evolution; eta azkenik Francis Lopezen El cantor de México eta El amor es como un ramo de violetas operetak, Luis Mariano abeslari irundarra gorenera eraman zuten obrak, kasu honetan Andoni Martinez Barañano tenor getxotarrak abestuko dituenak. Kontzertu berri honetarako Euskadiko Orkestrak Donostiako Orfeoia gonbidatu du, eta Winnipeg, Evolution, El cantor de México eta Violetas imperiales obretan parte hartuko du.

Aurreko urteetan bezala, kontzertuan ikusizko elementu bat gehituko da: musika pelikuletako eszena-muntaketa baten proiekzioarekin uztartuko da 400 metro karratuko pantailan, eta muntaketa hori Morgancrea taldeak sortu du kontzertu honetarako espresuki. Gainera, hainbat konpositore kontzertuan izango dira Belodromoko oholtzan beren lana aurkezteko.

Sarrera doakoa da eta gonbita irailaren 12tik 18ra jaso beharko da Zinemaldiak Kursaal jauregian duen informazio-puntuan edo Donostia Turismoren bulegoan (Ijentea, 1), 9:00etatik 20:00etara, astelehenetik igandera. Sarrerarik geratuko balitz, belodromoko leihatiletan jaso ahal izango dira kontzertuaren egunean bertan goizeko 16:00etatik aurrera.

Urteetan zehar, Euskadiko Orkestra modu askotan egon da presente Donostia Zinemaldian. Bere parte-hartze nabarmenetako bat 2012ko edizioan egin zuen, orkestrak mundu osoan ospetsua den Juan Antonio Bayonaren The Impossible filmaren soinu-bandaren zuzeneko estreinaldian parte hartu zuenean (Fernando Velazquezek sortutako partiturarekin). Hurrengo urtetik aurrera, 2013tik aurrera, orkestra modu jarraituan hasi zen zinema-musikako kontzertua zuzenean eskaintzen, lehenik Miramongo egoitzan, eta 2015etik aurrera Belodromoan. Toki horretan bertan eskainiko du kontzertua aurten ere. Zinema-musikako kontzertuen hamarkada honetan, orkestrak hainbat film luzeren soinu-bandak interpretatu ditu, besteak beste: Handia, Errementari, Arrugas, Pájaros de Papel, Los crímenes de Oxford, Tadeo Jones 2, Mientras dure la guerra, Buñuel en el laberinto de las tortugas… Guztira, gure zinemako pelikulen 70 soinu-banda baino gehiago interpretatu eta erakutsi ditu denbora honetan Euskadiko Orkestrak. Gainera, aipatzekoa da orkestrak Zinemaldiaren sintonia grabatu zuela 1991 eta 1992ko edizioetan.

Zinemaldian daukan parte-hartze sendoaz gain, Euskadiko Orkestrak filmetako musikarekin lotutako lan handia egin du. Aipatzekoak dira Patria eta Maixabel filmen soinu-banden grabazioak, bai eta aurreko film batzuenak ere, hala nola A Monster Calls —Fernando Velazquezek 2016ko jatorrizko musika onenaren Goya saria jaso zuen—, Ocho Apellidos Vascos, Contratiempo, Submergence, Momias, eta abar.

2012az geroztik, SGAE Fundazioak Made in Spain sail ez-lehiakorra antolatzen du beste batzuekin batera. Sail horrek azken urtean ekoitzitako Espainiako filmen aukeraketa bat biltzen du, estreinatuak izan ala ez, eta Zinemaldiak plataforma bikaina eskaintzen die nazioartean hedatzeko. Lan horiek irailaren 22tik 26ra bitartean proiektatuko dira Madrilgo Berlanga Aretoan.

Bestalde, SGAEren Euskadiko Lurralde Kontseiluak euskal sorkuntzako gidoi onenaren GIDOI-SGAE saria babesten du. Sari hori Euskal Herriko Gidoigileen Elkarte Profesionalak ematen du urtero jaialdian bertan, eta Euskal Zinemaren EiTB Galan banatzen da irailaren 22an. Besteak beste, Enrique Urbizu, Jose Mari Goenaga, Aitor Arregi, Maider Oleaga, Marina Parés, Telmo Esnal, Iñaki Rikarte, David Pérez-Sañudo eta Borja Cobeaga euskal gidoilariak saritu dituzte orain arte.

SGAE Fundazioak eta Donostia Zinemaldiak Jatorrizko musika onenari SGAE Sari berria iragarri dute aurten. Lehen aldiz Zinemaldiko Sail Ofizialean parte hartzen duten 17 filmetako baten partitura bereiziz, Beste Sari Ofizial batzuen kategorian txertatuko da eta musika-sorkuntzaren arloan ospe handia duten hiru profesionalez osatutako epaimahai baten bidez izendatuko dute. Aitorpen hau Zinemaldiak eta SGAE Fundazioak duela hamarkada bat baino gehiagotik duten lankidetza estuari gehitzen zaio, “jatorrizko musika-konposizioaren bikaintasuna eta lan zinematografiko osoari egindako ekarpen artistikoa” azpimarratu nahian. Saria emanaldiaren itxiera-ekitaldian emango da.

Informazio gehiago

Grabazio diskografikoak funtsezko zutabea dira Euskadiko Orkestraren jardueran, 80 disko baino gehiagoko fonoteka baitu, batez ere euskal sorkuntzan oinarritua. Jose Maria Sanmartinen figurak leku nabarmena izango du atal honetan, eta bidegabe ahanzturara baztertutako sortzaile baten berraurkikuntza baliotsua izango da.

Pablo Urbina gasteiztarrak zuzendutako proiektu honetan hiru obra grabatu dira: Suite Arabarra, 1963an Musikako Sari Nazionala eskuratu zuen orkestrarako lana; Danzas Sabbáticas, hil baino urtebete lehenago orkestrarako idatzitako hiru mugimendutako lana; eta Cuatro piezas, jatorrian hari-boskoterako idatzia, Oiongo Francisco Ibañez Iribarriak Euskadiko Orkestrarentzat espresuki egindako moldaketa sinfonikoa izango duena. Sanmartinek bere ibilbideko hainbat unetan idatzitako lanen bilduma honek ordubete inguru iraungo du guztira. Arabako musika-ondarearen parte izango da musika hau, eta Euskadiko Orkestrak konpositore gasteiztarrari egingo dion omenaldi nabarmena izango da.

Konpositorea

Jose Maria Sanmartin pianojole, organojole eta konpositorearen ibilbide musikal garrantzitsua tamalez ahaztuta geratu da historian zehar. Arabako hiriburuan Luis Arambururekin eta Bilbon ikasketak amaitu ondoren, Parisera joan zen 1953an. Handik, Europan zehar musika-ibilbide bat hasi zuen Berlin, Bonn, Geneva edo Lyon bezalako hirietan, eta hainbat errekonozimendu eta sari jaso zituen. Arthur Honeggerren konposizio-ikaslea izan zen. Alfred Cortotekin lan egin zuen, eta ondoren Genevan jarraitu zuen, Marescottirekin, eta Berlingo Unibertsitate Teknikoan, Rolofekin. 1958an Unescoren Musikaren Nazioarteko Kontseiluak beka eman zion. 1966an, oposizio bidez, Espainiako Irrati-telebistako Orkestra Sinfonikoko pianojole plaza lortu zuen. Han jarraitu zuen bere karrera, 50 urte eskasekin hil zen arte.

Omenaldiaren jarraipena 2027an

Grabazio honekin Euskadiko Orkestrak Jose Maria Sanmartini egin nahi izan dion omenaldiaren jarraipen gisa, nabarmentzekoa da 27/28 Denboraldiaren hasieran RTVE Orkestrak eta Euskadiko Orkestrak elkartruke bat egingo dutela beren programazioetan. Bi taldeek Suite arabarra interpretatuko dute.

Fitxa teknikoa

CD MONOGRAFIKOA
Jose Maria Sanmartin Fernandez de Pinedo
(Gasteiz, 1927 - Madril, 1977)

Titulua: José María Sanmartín
Sustatzailea: Euskadiko Orkestra
Parte-hartzaileak: Euskadiko Orkestra, Pablo Urbina (zuzendaria). 
Argitaletxea: Sonora Estudios, Vitoria
Grabazioa: abuztuak 31 - irailak 4, 2026
Grabazio-tokia: Euskadiko Orkestraren egoitza, Miramon
Kontzertuak: Elkartrukea ORTVErekin 2027an
Obrak: 

• Suite Arabarra - Danzas de corte y profanas [19’]

1. Contrapás
2. Gavota
3. Contradanza
4. Minuetto-Paspié
5. Burlesca
6. Pastoril
7. Contrapás-Pasacalle

• Danzas Sabbáticas [24’]

1. Aker-Dantza
2. Illargi-Betea
3. Sorgiñ-Dantza

• Cuatro piezas [13’]

1. Minueto
2. Alleluia
3. Divino espejo
4. Nochebuena 

Informazio gehiago