Ohikoa den moduan, Euskadiko Orkestrak aurtengoan ere Bilboko Musika-Música jaialdian parte hartuko du, 25. edizioa izango duen honetan. Bi hamarkada eta erdiko epealdi honetan jaialdiak musika-uholde bat ekarri du Bilbora eta erreferente izatera iritsi da mundu guztiko musikazaleen artean.

Musika-Músicaren edizio hau hogeita bost urteko programazio zabalaren oihartzunak jaso eta berriro emititzen dituen bozgorailua da, bertakoen eta hiri musikazale hau bisitatzen dutenen gozamenerako. Eta unibertso emankor bezain erakargarri batean murgiltzeko gonbidapena ere bada.

Euskadiko Orkestrak edizio honetako ezinbesteko hitzorduetako bat eskainiko du ostiralean, martxoak 6, 20:30ean, Euskalduna Jauregian. Bertan, Carl Orffen Carmina Burana interpretatuko du ordubete inguruko kontzertu batean, Victor Pablo Perezek zuzenduko duena. Ahotsen kapituluan, orkestrak ondoan izango ditu Iruñeko Orfeoia, Andrea Marti sopranoa, Toni Marsol baritonoa eta David Azurza tenorra.

Informazio gehiago eta sarreren salmenta

Sarrerak 15 eurotan daude salgai Musika-Músicaren webgunean, Euskalduna Jauregiko leihatiletan eta webgunean, baita Kutxabanken zerbitzu anitzeko kutxazainetan ere.

Jaialdiari eta 70 hitzorduei buruzko informazio guztia hemen.

Informazio gehiago

Euskadiko Orkestrak eta EITBk orkestraren jarduera grabatu eta zabaltzeko duten konpromisoaren baitan, katearen larunbat goizetako tartera itzuliko da orkestra, Denboraldiko kontzertuak erakusten jarraitzeko.

Emisio-bloke berriak etenik gabe jarraituko du datozen lau hilabeteetan, eta 25/26 Denboraldiko kontzertu berrienak eskainiko ditu, aurreko denboraldiko berremisioekin tartekatuta.

Honako hauek dira datozen kontzertuak (beti larunbatetan eta 11:00etan):

• Otsailak 28: Arriaga / Strauss. Jaime Martin / Rachel Willis-Sorensen
• Martxoak 7: (Berremisioa) Schubert / Strauss (24/25)
• Martxoak 14: (Berremisioa) Mahler 7 (24/25)
• Martxoak 21: Franck / Bruckner. Joana Carneiro / Marta Zabaleta
• Martxoak 28: (Berremisioa) Aldave / Mahler (24/25)
• Apirilak 11: Abestu Euskadiko Orkestrarekin. Schumann / Respighi. Riccardo Frizza / Johannes Moser
• Apirilak 18: (Berremisioa) Mozart / Schubert (24/25)
• Apirilak 25: (Berremisioa) Faure / Schumann (24/25)
• Maiatzak 2: (Berremisioa) Mozart / Bruckner (24/25)
• Maiatzak 9: (Berremisioa) Brahms / Dvorak (24/25)
• Maiatzak 16: (Berremisioa) Aldave (24/25)
• Maiatzak 23: (Berremisioa) Abestu Euskadiko Orkestrarekin / Brahms (24/25)
• Maiatzak 30: Strauss / Mendelssohn. Alexander Liebreich / Sophie Harmsen / Werner Güra / Florian Boesch / Markus Volpert / Donostiako Orfeoia
• Ekainak 6: (Berremisioa) Dvorak (24/25)
• Ekainak 13: (Berremisioa) Logelan logale (24/25)
• Ekainak 20: Bernaola / Mendelssohn. François Lopez-Ferrer / Elena Sancho Pereg / Marife Nogales / Vocalia Taldea
• Ekainak 27: Prokofiev / Txaikovski. Michal Nesterowicz / Boris Giltburg

ETBk grabatu ditu kontzertuak, gehienak Euskalduna Jauregian.

Eduki gehiago YouTube kanalean

Telebistako emisio berriak egin ahala, Euskadiko Orkestrak kontzertuetan interpretatutako obrak bere YouTubeko kanalean publikoaren eskura jartzen jarraituko du. Gaur egun, kanal honek 160 bideo baino gehiago ditu HDn, Euskadiko Orkestraren kontzertu sinfoniko onenekin, eta baita beste eduki batzuekin ere, hala nola kontzertu didaktikoak edo esparru sinfonikokoak ez diren beste euskal artista batzuekin egindako kolaborazioen bideoklipak.

Informazio gehiago

Larunbat honetan, otsailak 28, 11:00etan, Euskadiko Orkestraren ganbera-musika ziklo Miramongo Matinéeen Denboraldiko hurrengo hitzordua izango da, Belharra taldeak eskainiko duena. Bost interpreteetatik lau Euskadiko Orkestraren kideak dira: Annemarie Harmat (biolina), David Carmona (biolina), Natacha Dupuy-Scordamaglia (biola) eta Pascale Michaud (biolontxeloa). Javier Perez Azpeitiak osatuko du taldea pianoan.

EROSI SARRERAK HEMEN

Dmitri Xostakovitxen Pianodun 2. Trioa elegia moduko bat da, 1944an idatzia bere lagun min Ivan Sollertinskiren omenez —musikologo eta kritikari literario eta musikala—, bihotzekoak jota hil berria zenean. Bere izaera goibela lehen mugimenduan nabaritzen da bereziki, biolontxeloaren harmonikoen soinu hauskor ia naturaz gaindikoak hasitako fugato hileta batean. Baita hirugarren mugimenduan ere, txakona batean, non pianoak zortzi akordeko segida bat jotzen duen, beste bi instrumentuak auhen antzeko batean babesten dituena. Bigarren eta laugarren mugimenduak, scherzo bat eta finalea, zorrotzagoak eta bortitzagoak dira.

Robert Schumannek, bere aldetik, gau ugari lorik egin gabe igaro zituen bere Pianodun Kintetoa Op.44 konposatzen. Amaitu zuenean, 1842an, musikagilea fisikoki eta mentalki bere indarren mugan zegoen; obrak, ordea, ez du ahalegin horietatik ezer adierazten, kontrakoa baizik. Clara Schumannen arabera, hari eskainitako lan hau “indarrez eta freskotasunez beteta” zegoen, eta “bikaina eta txundigarria” zen. Wagnerrek berak ere bat egin zuen aintzatespen orokor honekin. Obra hau berehala bihurtu zen Schumannen konposizio ezagunenetako batean, eta ganbera-musikako literaturaren altxorretako bat izaten jarraitzen du.

Sarrera solteak (11€) salgai daude euskadikoorkestra.eus webgunean eta Kursaal Auditoriumeko leihatilan. Gainera, orkestraren egoitzako leihatilan bertan ere eros ahal izango dira kontzertuaren egunean, leku libreak geratzen badira.

Miramongo Matinéetara eroso joateko, Euskadiko Orkestrak doako autobus-zerbitzua eskainiko du. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Informazio gehiago

Euskadiko Orkestrak 2025/26 Denboraldi Sinfonikoaren zazpigarren programa aurkezten du, ‘Franck / Bruckner’; kontzertuak datozen egunotan izango dira: ostiralean, otsailak 27, Iruñeko Baluarte Auditoriumean; eta larunbatean, otsailak 28, Gasteizko Jesus Guridi Kontserbatorioan. Bi kontzertuak 19:30ean izango dira.

Marta Zabaletak, Euskadiko Orkestrarekin lotura luzea duen euskal pianojoleak, orkestrak inoiz interpretatu ez duen obra bat aurkeztuko du gaur: Cesar Francken Bariazio sinfonikoak. Zabaletak kontzertu-karrera zabala du, sari handiak ditu, gaur egun Musikeneko piano irakaslea da eta Bartzelonako Marshall Akademiako zuzendaria, bere aurreko Alicia de Larrochak hala eskatuta. Interpretatuko duen obra originaltasun handiko sorkuntzatzat jotzen da, Franckek pianorako kontzertu mota berri batekin esperimentatu zuelako. «Minikontzertu» modu bat da, baina etengabeko mugimendu bakar batean; eta pianoak eta orkestrak bazkide berdin gisa hitz egiten dute aurkari gisa baino gehiago. Horregatik guztiagatik, Francken partitura bukatuenetako eta «perfekziotik hurbil» daudenetako bat bezala laudatu zuten, eta hil ondorengo ospea lortzen lagundu zuen.

Programaren bigarren zatian, orkestrak Anton Brucknerren 4. Sinfoniari egingo dio aurre, ia 70 minutuko iraupena duen eta benetako erronka musikaltzat jotzen den obra.

«Erromantikoa» ezizena Brucknerrengandik berarengandik dator eta giro jakin bati erantzuten dio. Lagunei idatzitako gutun eta iruzkinetan, Brucknerrek azaldu zuen sinfoniak Erdi Aro idealizatu bat gogorarazten duela, hiri harresitu bat pizten duten korneta deiekin, txorien kantuarekin, ehizaldiekin, erlijioaren barnera biltzearekin... Pieza honen konposizioa 1874 eta 1888 artean garatu zen, eta aldi horretan lanak berrikuspen prozesu luzea izan zuen. Hala, Simon Rattle orkestra-zuzendariak sinfonia horren hamalau bertsio aurkitu zituela adierazi zuen.

2022ra arte Portugalgo Orkestra Sinfonikoaren zuzendari titularra izan zena eta operaren arloan oso eskatua den Joana Carneiro igoko da Euskadiko Orkestraren podiumera kontzertuok zuzentzeko. Hirugarren aldia da lisboarra Euskadiko Orkestraren buru jarriko dela, 2010 eta 2013an Denboraldi Sinfonikoan egon ostean.

Sarreren salmenta

Iruñeko kontzerturako sarrerak salgai daude, euskadikoorkestra.eus webgunean eta auditoriumeko leihatila eta webgunean, 10 eurotik aurrera.

Informazio gehiago

Larunbat honetan, otsailak 21, 11:00etan, Euskadiko Orkestraren ganbera-musika ziklo Miramongo Matinéeen Denboraldiko hurrengo hitzordua izango da, Sibel taldeak eskainiko duena. Bost interpreteetatik lau Euskadiko Orkestraren kideak dira: Xabier de Felipe (biolina), Maite Abasolo (biola), Beatriz Linares (biolontxeloa) eta Luis Camara (klarinetea). Itxaso Sainz de la Mazak osatuko du taldea pianoan.

EROSI SARRERAK HEMEN

Jean Françaixen Klarinete, biola eta pianorako trioa konpositore frantsesaren obra goiztiarra da, 1932an idatzia, Frantzia gerren arteko garaiaren irakinaldi kulturalean murgilduta zegoenean. Obra hau Françaixen estilo neoklasikoaren adibide ezin hobea da, bere argitasun, dotorezia eta birtuosismoagatik bereizten dena, Stravinski eta Ravel bezalako konpositoreen eraginez. Bitxiena da Françaixek 20 urterekin konposatu zuela obra hau, eta horrek erakusten du bere talentu goiztiarra, baita teknika musikala aski menderatzen zuela ere. Trioa instrumentuen konbinazio paregabea da, soinu fresko eta delikatua sortzen duena, hiru instrumentuen arteko etengabeko elkarrizketarekin, garaiko musika areto bateko giroa gogora ekarriz.

Françaixek trioa konposatu zuenetik 60 urte baino gehiago igaro zirenean, Krzysztof Pendereckik bere Klarinete eta hari-hirukoterako kuartetoa idatzi zuen, poloniar konpositorearen heldutasuna eta esperientzia islatzen dituen obra. Ordurako Pendereckik musika serialarekin eta ausazkotasunarekin esperimentuak eginak zituen, eta Threnody to the Victims of Hiroshima bezalako maisulanak konposatuak zituen. Klarinete eta harirako kuartetoa bere estilo helduenaren adibide bat da, tradizio klasikoa eta musika garaikidearen elementuak uztartzen dituena. Obra klarinetearen eta harien arteko elkarrizketa bizi eta hunkigarria da, eta soinu eta emozio konplexuen mundura garamatza.

Sarrera solteak (11€) salgai daude euskadikoorkestra.eus webgunean eta Kursaal Auditoriumeko leihatilan. Gainera, orkestraren egoitzako leihatilan bertan ere eros ahal izango dira kontzertuaren egunean, leku libreak geratzen badira.

Miramongo Matinéetara eroso joateko, Euskadiko Orkestrak doako autobus-zerbitzua eskainiko du. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Informazio gehiago

Joan den urtarrilaren 14an hasi ziren Abestu Euskadiko Orkestrarekin proiektuaren bigarren edizioko entseguak. Proiektu horretan, abeslari ez-profesionalek Euskadiko Orkestrarekin bat egiteko aukera paregabea dute. Asteazkenero, bi hilabetez, 600 ahotsen artean zozketa bidez hautatutako 132 herritarrez osatutako talde bat biltzen da orkestrak Miramonen duen egoitzan entseatzeko. Parte hartu ahal izateko, ezinbestekoa izan zen gutxieneko musika-prestakuntza izatea eta partiturak irakurtzen jakitea, baita entseguetara ahalik eta gehien joateko konpromisoa hartzea ere.

Saio hauetan egindako lanaren (ikusi egutegi osoa hemen) emaitza ikusgai izango da orkestraren Denboraldi Sinfonikoaren baitan, Schumann / Respighi izeneko programan, Riccardo Frizzaren zuzendaritzapean. Kontzertuak honako egunetan izango dira: martxoak 13, Iruñeko Baluarte Auditoriumean; martxoak 14, Bilboko Euskalduna Jauregian; eta martxoak 16 eta 18, Donostiako Kursaal Auditoriumean. Pablo Sorozabalen Euskalerria, Georges Bizeten Carmeneko ‘Martxa eta korua’ eta Antonio Vivaldiren Gloriaren interpretazioak 10 eta 15 minutu artean iraungo ditu abesbatza misto eta orkestrarako, eta Easo Abesbatzako 40 kide izango ditu aukeratutako abesbatza-taldeari laguntzeko. Gorka Mirandak zuzenduko du talde korala.

Parte-hartzaileen lekukotzak

Ekimena prestatzeko prozesuaren lehen zati honen ostean jaso ditugun lekukotza batzuk bideo honetan ikus daitezke:

Entseguen argazkiak

Kontzertuak

Schumann / Respighi programa sinfonikoa
Zuzendaria: Riccardo Frizza
Abesbatzaren zuzendaria: Gorka Miranda
Abesbatza: Easo Abesbatza

Datak:

• Iruña (Baluarte Auditoriuma): martxoak 13
• Bilbao (Euskalduna Jauregia): martxoak 14
• Donostia (Kursaal Auditoriuma): martxoak 16 eta 18

Obrak:

• Euskalerria (Pablo Sorozábal)
• Carmen. Martxa eta korua (Georges Bizet)
• Gloria In Excelsis Deo (Antonio Vivaldi)

ARTIS+, artea gizarteratzeko

Ekimen hau ARTIS+, artea gizarteratzeko proiektuaren baitan sartzen da. Euskadiko Orkestrak 2027ra arte parte hartuko du mugaz gaindiko lankidetza sustatzen duen Europako proiektu honetan, beste hainbat bazkiderekin batera, tartean, Orchestre National du Capitole de Toulouse, L’Auditori eta Bartzelonako OBC Orkestra, eta Pauko Orkestra.

Jarduera hau ARTIS+ proiektuaren parte da, eta proiektu hau Europako Batasunak finantzatzen du %65ean Interreg VI-A Espainia-Frantzia-Andorra (POCTEFA 2021-2027) programaren bidez

Informazio gehiago

Musika Gelaren 25/26 Denboraldiko bigarren programa aste honetan eta hurrengoan egingo da, ia 30 udalerritako 2.200 ikasle baino gehiagori zuzendutako Eskola Kontzertu ugarirekin: Aia, Aizarnazabal, Alegia, Altzo, Anoeta, Astigarraga, Beasain, Berrobi, Deba, Donostia, Errenteria, Ezkio-Itsaso, Gabiria, Gasteiz, Hernani, Itsasondo, Irun, Legazpi, Legorreta, Lizartza, Mendaro, Oiartzun, Olaberria, Urnieta, Zarautz, Zegama eta Zestoa. Gainera, bi Musika Familian kontzertu programatu dira larunbat honetan Miramonen, eta otsailaren 1ean familiei zuzendutako beste bi kontzertu ere eman ziren Gasteizko Garcia Lorca Antzokian.

Maurice Ravelek Ma mère l’oye lana (‘Nire ama antzara’ euskaraz) lagun batzuen seme-alabentzat idatzi zuen. Haurrentzako bost pieza azpitituluarekin, lan hau Charles Perrault idazlearen ipuinetan oinarritzen da. Elementu horietatik abiatuta, gure proposamenak hitzen ordez irudiak jarriko ditu zuzeneko musika duen itzal-antzerki batean, eta haur bakoitzaren esku utziko du kontakizunak norbere iruditerian berreraikitzeko lana. Euskadiko Orkestrako musikariz osatutako haize-boskote batek interpretatuko du lan eder hay: Oihana Kontxeso (flauta), Oscar Diago (oboea), Luis Camara (klarinetea), François Proud (fagota) eta Marianne Tauzin (tronpa). Marta Bocos-ek emango dio bizia itzal-antzerkiari, eta bera izan da gida didaktikoaren egilea, baita gidoiarena ere, Musika Gelaren koordinatzaile Mikel Cañadaren jatorrizko ideian oinarrituta.

3 eta 6 urte bitarteko haurrei zuzendutako Musika Familian kontzertuak izango dira larunbatean, otsailak 14, 11:00etan eta 12:30ean Miramonen. Bigarrena saio lasaia izango da; saio lasaiak familia guztientzat daude irekita, desgaitasunen bat duten kideak dituzten familientzat zein halako kiderik ez dutenentzat.

Sarrerak salgai daude, 5 eurotan 12 urtetik beherakoentzat eta 8 eurotan adin horretatik gorakoentzat. Euskadiko Orkestraren webgunean eta Kursaaleko leihatilan eros daitezke, baita Miramongo leihatilan ere kontzertu-egunean, baldin eta lekurik badago.

ARTIS+, artea gizarteratzeko

Ekimen hau ARTIS+, artea gizarteratzeko proiektuaren baitan sartzen da. Euskadiko Orkestrak 2027ra arte parte hartuko du mugaz gaindiko lankidetza sustatzen duen Europako proiektu honetan, beste hainbat bazkiderekin batera, tartean, Orchestre National du Capitole de Toulouse, L’Auditori eta Bartzelonako OBC Orkestra, eta Pauko Orkestra.

Informazio gehiago

Larunbat honetan, urtarrilak 31, 11:00etan, Euskadiko Orkestraren ganbera-musika ziklo Miramongo Matinéeen Denboraldiko hurrengo hitzordua izango da, Dialogos Armonicos taldeak eskainiko duena. Sei interpreteetako bost Euskadiko Orkestraren kide dira: Ander Erburu (flauta), Oscar Diago (oboea), Luis Camara (klarinetea), François Proud (fagota) eta Marcos Cruz Pardeiro (tronpa). Itxaso Sainz de la Mazak osatuko du taldea pianoan.

EROSI SARRERAK HEMEN

XIX. eta XX. mendeetan zehar, konpositore ugarik pianoa eta haizezko instrumentuei eskainitako ganbera-musikako piezak idatzi zituzten. Pianoa eta haize-laukote edo -boskotearena, zalantzarik gabe, orkestrazio-modu osoenetako bat da, koloretan aberatsenetakoa eta soinu-unibertso aldi berean fin eta indartsua eskaintzen duena. Programa honetan aurkeztutako hiru piezak beren konpositoreen heldutasun artistiko handienekoak dira. Beethoven, Roussel eta Poulenc-ek, bakoitzak bere estiloarekin, instrumentu bakoitza bere erregistro onuragarrienean tratatzen dute, bere tinbre, gaitasun eta birtuosismo onenarekin.

Miramongo Matinéea hasteko Ludwig van Beethovenen Piano eta haize-kintetoa Op.16 izango dugu, 1797an sortua, konpositorea bera pianoan zela. Beethovenek 26 urte zituen eta ordurako trioak eta sonatak argitaratuak zituen pianoan, baina artean teklatuaren bidez inprobisatzeko eta birtuosismoa erakusteko zuen gaitasunagatik zen gehienbat ezaguna. Obra honek aukera eman zion konpositore eta interprete gisa zuen talentua erakusteko.

Ondoren, Albert Rousselen 1906ko Divertimentoa etorriko da, Harry Halbreichek horrela izendatu zuena: “konpositorearen jatorrizko lehen maisulana, bere berdetasun zoragarriarekin eta erritmo liluragarriekin”.

Matinéea Francis Poulenc-en Sextetoarekin iritsiko da amaierara. Obra horren lehen bertsioa 1931 eta 1932 bitartean konposatu zuen, eta bigarrena 1939an. Henri Hell biografoak honako hau adierazi zuen lan honi buruz: “zati instrumental bakoitza modu harrigarrian eraikita dago doitasunik handienean eta kalitate bikaineko konposizio bat sortzen du”.

Sarrera solteak (11€) salgai daude euskadikoorkestra.eus webgunean eta Kursaal Auditoriumeko leihatilan. Gainera, orkestraren egoitzako leihatilan bertan ere eros ahal izango dira kontzertuaren egunean, leku libreak geratzen badira.

Miramongo Matinéetara eroso joateko, Euskadiko Orkestrak doako autobus-zerbitzua eskainiko du. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

Informazio gehiago

Euskadiko Orkestrak 2025/26 Denboraldi Sinfonikoaren seigarren programa aurkezten du, ‘Txaikovski / Musorgski’; kontzertuak datozen egunotan izango dira: astelehenean, urtarrilak 26, Donostiako Kursaal Auditoriumean; asteartean, urtarrilak 27, Gasteizko Jesus Guridi Kontserbatorioan; asteazkenean, urtarrilak 28, Bilboko Euskalduna Jauregian; eta ostegunean, urtarrilak 29, berriz Kursaal Auditoriumean. Kontzertu guztiak 19:30ean izango dira.

EROSI SARRERAK HEMEN

Programa honetan Euskadiko Orkestrak Felix Ibarrondo Oñatiko konpositorearen sorkuntza sinfoniko berrienaren estreinaldiari ekingo dio: Guernica. Obra hau Bizkaiko hiribilduaren 1937ko bonbardaketaren inguruko gogoeta artistikoen tradizio luzean sartzen da. Elegiatik salaketa politikora, musika-hurbilketak askotarikoak izan dira, baina Ibarrondok gertaeraren edozein irakurketa deskriptibo edo programatiko baztertzen duen ikuspegia aukeratu du, haren dimentsio hunkigarri eta sinbolikoan zentratzeko: «garrasia, barneratutako mina, zauri iraunkorra, gau amaigabea eta, azkenik, iraungipena» dira obra osatzen duten bost atalak nabarmentzen dituzten gaiak.

Estreinaldi garrantzitsu honetatik haratago, programa sinfoniko honek errusiar kutsua du nagusiki, Txaikovski, Musorgski eta Glinkaren obra handiekin.

Sormen-zurrunbilo batean idatzi zuen Txaikovskik 1878an Biolinerako Kontzertua. Bere eskaintzaileak, Leopold Auer birtuoso handiak, errefusatu egin zuen obra, «joezina» iruditu baitzitzaion; dena den, laster ohorezko postu bat beteko zuen biolinerako kontzertu handien artean. Hori interpretatzeko, Euskadiko Orkestrak Bomsori gonbidatu du, Hego Koreak azken urteetan eman duen interpreterik bikainenetako bat. Deutsche Grammophon zigiluko artista, munduko hiru biolin lehiaketa garrantzitsuenetan irabazle edo finalista izan da: Helsinkiko Sibelius, Belgikako Queen Elizabeth eta Moskuko Txaikovski lehiaketetan, non, hain zuzen ere, egunotan entzungo dugun kontzertua interpretatu zuen.

Programari amaiera emateko, beste klasiko errusiar batean murgilduko gara: Musorgskiren Erakusketa bateko koadroak. Egileak bere lagun Viktor Hartmann 1873an hil zenari omenaldia egin zion obra honekin. Haren lana sakon ezagutu zuen San Petersburgon, hil ondorengo erakusketa batean parte hartu zuenean. Erakusketa horretara egindako bisita biziak inspiratu zuen musikagilea suitea sei aste eskasetan idaztera. XIX. mendearen amaieratik hona, hainbat moldaketa egin zaizkio obrari, eta aipatzekoa da Maurice Ravelen 1922ko orkestrazioa, Euskadiko Orkestrak kontzertu hauetan eskainiko duena. Musorgskiren obraren arrakasta bere melodien indarrari, irudimen musikalari eta musikaren eta pinturaren arteko lotura estuari zor zaie. Artelana, batez ere, bisitariaren esperientzia estetikoa artearen botere eraldatzailearen soinu-kontakizun bihurtzeagatik nabarmentzen da.

Kontzertuak Mikhail Glinkaren Ruslan eta Liudmilaren Oberturarekin hasiko dira. Bost minutu eskasetan instrumentu-familia desberdinetatik txinpartak ateratzea lortzen du obrak, bereziki harien ataletik.

Gaur orkestra-zuzendaritzan etorkizun handia duen Kolonbiako gazte bat igoko da Euskadiko Orkestraren podiumera. 1995ean jaioa, Ana Maria Patiñok Medellinen ikasi zuen, Alejandro Posadaren gidaritzapean eta, ondoren, Zurichen, Johannes Schlaeflirekin. Sir George Solti Nazioarteko Zuzendaritza Lehiaketan finalista izan zen 2020an, eta Alemaniako Direcenten Foruma irabazi zuen 2019an.

Sarreren salmenta

Kontzertu guztietarako sarrerak salgai daude, Gasteizkorako izan ezik, euskadikoorkestra.eus webgunean eta auditoriumetako leihatila eta webguneetan, 10 eurotik aurrera.

Informazio gehiago

PROGRAMAZIOA

Urtez urte, Euskadiko Orkestrak bere hezkuntza-zikloaren baitan estreinatzeko produkzio propioak prestatzeko apustua egiten du, jatorrizko gidoiak erabiliz. Denboraldi honetan bi produkzio propio aurkeztuko ditu Gasteizen (Nire ama antzara eta Arriaga bizi da) eta beste bat errepikatuko du, Logelan logale.

Hiru produkzio hauek bi formatutan aurkezten dira, Eskola Kontzertuetan eta Musika Familian kontzertuetan, eta zikloaren ardatz nagusia dira.

Ibilbide luze eta finkatuena duen atala Musika Familian kontzertuena da. Haurrek familiekin gozatzeko kultur aisialdiko eskaintza honek 29 urte daramatza orkestraren egitarauan. Arabako hiriburuko kontzertuek Gasteizko Udal Antzoki Sarearen lankidetza dute hasieratik. Ikuskizunetarako sarrerek 12 euroko prezioa dute (heldu bat + haur bat) eta vitoria-gasteiz.org eta euskadikoorkestra.eus webguneen bidez eta areto bakoitzaren leihatiletan eros ahal izango dira.

Eskola Kontzertuek hamar edizio gainditu dituzte Gipuzkoan eta denboraldi honetan bigarrenez eskainiko dira Gasteizen, kantuaren festa bat izango den ekimen batekin. Formatu hau hainbat hezkuntza-etapatako gazteei zuzenduta dago, eskola-orduetan, eta Gasteizko Udalaren laguntza dute. Ekimen honek Euskadi kantutik egituratzeko dohaina du, urtebete geroago Bilboko Orkestra Sinfonikoa eta Bizkaiko abesbatzak proiektu honetara gehituko baitira, Euskal Herriko Abesbatzen Konfederazioaren bitartez.

Jarraian ekoizpenei buruzko informazio xehea aurki daiteke, baita kontzertuen datak ere:

1) NIRE AMA ANTZARA

Maurice Ravelek Ma mère l’oye lana lagun batzuen seme-alabentzat idatzi zuen. Haurrentzako bost pieza azpitituluarekin, lan hau Charles Perrault idazlearen ipuinetan oinarritzen da. Elementu horietatik abiatuta, gure proposamenak hitzen ordez irudiak jarriko ditu zuzeneko musika duen itzal-antzerki batean, eta haur bakoitzaren esku utziko du kontakizunak norbere iruditerian berreraikitzeko lana. Haize-boskote batek emango dio bizia lan eder honi.

Parte-hartzaileak: Oihana Kontxeso (flauta); Oscar Diago (oboea); Luis Camara (klarinetea); François Proud (fagota); Marianne Tauzin (tronpa); Mikel Cañada (ideia); Marta Bocos (itzal-antzerkia, gidoia, gida didaktikoa).

MUSIKA FAMILIAN (3 < 6 urte)
Otsailak 1 (17:00 / 18:30), Garcia Lorca (Gasteiz)

2) ARRIAGA BIZI DA

Emiliano Arriagak, ganbara txukuntzen ari dela, biolin zahar bat aurkitu du eta, bere hari desafinatuak laztantzean, memoriaren teklak sakatu ditu. Osaba musikari Juanitotaz gogoratzen hasi da: Parisen hil zen, aspaldi, 20 urte bete baino egun batzuk lehenago... Ez dakigu ia ezer bere nortasunari buruz, ezta bere bizitzari buruz ere, Bilbo alde zaharraren eta Parisen, une horretako musika-hiriburuaren, artean igaro baitzen. Horregatik, gure kontzertuan Juanito benetan nolakoa zen asmatzera edo irudikatzera jolastuko dugu, beti bere musikaren bidez, bere garaiko beste musikari batzuen bidez eta agian bilbotar maitagarri eta bikain honekin une batez hitz egiteko aukera emango digun Adimen Artifizialaren laguntzaz.

Parte-hartzaileak: Piano eta hari-laukote taldea, Luken Munguira (tenorra).

Programa: J. C. Arriaga (Nada y mucho / Los esclavos felices / 1. Kuartetoa); M. Albéniz (Pianorako Sonata); P. Albéniz (Alboradetako soinua / San Sebastian, soinu zaharra) / Garbizu, Aita Donostia, Guridiren abestiak

MUSIKA FAMILIAN (6 < 10 urte)
Maiatzak 10 (18:00*), Félix Petite (Gasteiz)

*Kontzertuaren aurretik, 16:45ean, sentsibilizazio-tailerra eskainiko da, osagarria, aukerakoa eta doakoa. Izen-ematea: 945161045

3) LOGELAN LOGALE

Irisgarritasunak eta parte-hartzeak, Musika Gelaren proposamenaren oinarri diren ardatzek, kantata honen bidez dute adierazpen gorena. Bertan, Euskadiko Orkestrak 1.000 ikaslerekin partekatzen du eszenatokia, Leire Bilbaok idatzi eta Jagoba Astiazaranek musikatutako Logelan Logale lana osatzen duten 10 abestiak interpretatzeko. Kantata honek ahalegin handia eskatzen die musikako irakasle, parte hartzen duten ikastetxe, orkestrako musikari, administrazio eta laguntzaileei eta, horri esker, ikasleek kantu sinfoniko-koralak dakarren esperientzia paregabea bizi dezakete. Euskadiko Orkestrak 2025eko maiatzean estreinatu zuen ekoizpen hau Donostian eta Gasteizen Eskola Kontzertu formatuan. Gasteizera itzuliko da aurten, San Viator, Errekabarri, Araia Herri Eskola eta Divino Maestro – María de Maeztu ikastetxeen parte-hartzearekin.

Parte-hartzaileak: Jagoba Astiazaran (jatorrizko musika); Leire Bilbao (libretoa); Euskadiko Orkestra; Juanjo Ocon (zuzendaria); Kepa Errasti (abeslari eta aktorea); Maria Goiricelaya (eszena-zuzendaria)

Programa: Preludioa / Kask-kask! / Gauaren beltza / Oheko burkoa / Gaueko / Harri, orri, ar / Mamua ote da? / Nire itzala / Hitz jolasak / Ispiluaren aurrean / Logelan logale

ESKOLA KONTZERTUAK (Lehen Hezkuntza)
Apirilak 23 (12:00), Jesus Guridi (Gasteiz)

TAILER INKLUSIBOAK: MUSIKAZALEAK

Euskadiko Orkestrak ibilbide luzea darama Musika Gelan inklusioaren alde, FEVAS Plena Inclusion Euskadiren eskutik. Bi erakundeak duela 16 urte hasi ziren elkarlanean, adimen- edo garapen-desgaitasuna duten pertsonen inklusioa eta kulturarako eskubidea sustatzeko. Harrezkero, 1.600 pertsona inguruk hartu dute parte hainbat jardueretan, eta horien artean nabarmenenak, Bilbo, Gasteiz eta Donostian egin diren tailerrak eta Miramongo egoitzan egin diren kontzertuak izan dira. Jarduera horiek “Praktika On” izendatu zituen FEAPSek, Adimen ezintasuna dutenen aldeko Elkarteen Espainiar Konfederakuntzak. Soinu Mosaikoa egitasmoak ere lankidetza horretan du sorburua. Ekimen hori Espainiako 14 orkestretara hedatu zen, musika garapen pertsonalerako eta gizarteratzeko tresna bihurtzen duen praktika aitzindari gisa. Ekimen honek CERMI 2018 sari nazionala jaso zuen musikaren bidez desgaitasunaren inklusioa sustatzeagatik.

Musikazaleakek aurten Gasteizen jarraituko du, berriz ere Usoa Fundazioaren parte-hartzearekin. Ekimena adimen- edo garapen-desgaitasuna duten hamabost bat pertsonako hiru talde egonkor osatzean datza (bana Bilbo, Donostia eta Gasteizen). Talde horiek zortzi musika-tailerretan parte hartuko dute ikasturtean zehar. Tailerrei amaiera emateko, kontzertu bat eskainiko da 2026ko ekainean, ikasturtean egindako lana erakusteko.

Tailer hauek babesle dituzte Bilboko Juan Crisostomo de Arriaga Kontserbatorioa eta Gasteizko Udal Antzoki Sarea.

MUSIKA GELA YOUTUBEN

Musika Gelak atal propioa du Euskadiko Orkestraren YouTubeko kanalean, eta bertan zikloko ikuskizun osoak ikus daitezke, besteak beste, Logelan Logale; Ilargiari kantari; Polikinela; Living Room Music; eta Mozart, Nannerl eta Lagunak. Gainera, aurtengo Denboraldiko kontzertuen bideoak ere igoko dira bertara, ikuskizunak gauzatu ahala.

LANKIDETZA-SARE ZABALA

Euskadiko Orkestraren Musika Gelak inguruko erakunde ugarirekin elkarlana sustatzen jarraitzen du. Lankide ditu Gipuzkoako Batzar Nagusiak, Gipuzkoako Foru Aldundia, Donostiako Udalaren Hezkuntza Saila, Gasteizko Udal Antzoki Sarea, Kursaal Eszena eta El Diario Vasco.

INKLUSIOA SUSTATZEN DUTEN PROIEKTU ETA SAREAK

Musika Gela ziklo osoa ARTIS+: Artea, gizarteratzeko ekimenaren parte da. Mugaz gaindiko Europako lankidetza-proiektu honek helburu du kultura-ekipamenduen irisgarritasuna hobetzea bazterketa-arriskuan dauden biztanle-taldeentzat, dela desgaitasunagatik, dela arrazoi sozialengatik. Proiektu hau 2027ra arte luzatuko da eta honako bazkideak izango ditu, besteak beste: Orchestre National du Capitole de Toulouse, Bartzelonako L’Auditori eta OBC Orkestra eta Paueko Orkestra.

Ildo beretik, Musika Gelaren programazioa Gertu Kulturaren parte da, hau da, zaurgarritasun egoeran dauden pertsonek kultura eskura izan dezaten laguntzeko elkartu diren kultura-programatzaileen sarearen parte.

Irabazi asmorik gabeko ekimen honen helburua kulturaren bitartez pertsonen bizi-kalitatea hobetzea da. Horretarako, kultura-espazio eta -esperientzia bereziak biltzen ditu prezio oso murritzetan, lehentasunarekin eta kolektibo ezberdinen beharrak entzutean eta behar horiei erantzutean oinarritutako tratu pertsonalizatuarekin. Gertu Kultura Apropa Cultura Saretik dator; sare hori Bartzelonako Auditori musika-zentroan abiarazi zen eta, Katalunian ia bi hamarkadako ibilbidea egin ondoren, erreferentziazko sare inklusiboa da gaur egun, 190 kultura-programatzaile baino gehiagorekin, 1.800 gizarte-erakunde baino gehiagorekin eta 54 udalerri baino gehiagorekin.

ARTIS+

Ziklo hau ARTIS+ proiektuaren parte da, eta proiektu hau Europako Batasunak finantzatzen du %65ean Interreg VI-A Espainia-Frantzia-Andorra (POCTEFA 2021-2027) programaren bidez.

Informazio gehiago